1, 2. Iehova ese ena turana ai ia halaoa taudia haida mani oi gwauraia.

EDENA bamona tauna be emu turana ai oi halaoa diba? Reana oi ura bamoa tauna ena lalohadai, ura bona ia abia dae gaudia be oiemu hegeregerena. Bona oi ura kara namodia, hegeregere kara momokani bona hebogahisi ia hahedinaraia tauna oi bamoa.

² Histori lalonai, Dirava ese taunimanima haida ia abia hidi ena turana ai idia lao totona. Hegeregere, Iehova ese Aberahamo ia gwauraia ena turana. (Isaia 41:8; Iamesi 2:23) Dirava ese Davida ia gwauraia “egu lalokau tauna.” (Kara 13:22) Bona Iehova ese peroveta tauna Daniela “ia lalokau henia bada.”​—Daniela 9:23.

3. Dahaka dainai Iehova ese taunimanima haida be iena turana ai ia halaoa?

³ Dahaka dainai Iehova ese Aberahamo, Davida bona Daniela be ena turadia ai ia halaoa? Aberahamo ia hamaoroa: “Oi ese lauegu oda oi kamonai henia.” (Genese 22:18) Unai dainai Dirava be ena ura idia karaia taudia kahirakahira ia noho. Israela taudia ia hamaoroa: ‘Lauegu hereva do umui kamonai henia, unai neganai lau be emui Dirava do lau lao, bona umui be lauegu bese do umui lao.’ (Ieremia 7:23) Bema Iehova oi kamonai henia, oi danu be iena turana ai oi lao diba!

4, 5. Edena dala ai Iehova ese ena taunimanima ia hagoadaia?

⁴ Dirava tura henia karana amo ita abia namo mani ita laloa. Baibel ia gwau Iehova ese dala ia tahua noho “ia dekenai idia badinaia momokani taudia do ia hagoadaia totona.” (2 Sivarai 16:9) Edena dala ai Iehova ese oi ia hagoadaia diba? Dala ta be Salamo 32:8 ese ia gwauraia: “Lau [Iehova] ese oiemu raka dalana oi dekenai do lau hadibaia. Lau ese oi do lau hakaua, bona sisiba oi dekenai do lau henia.”

⁵ Unai amo Iehova ia hahedinaraia ia ese ita ia laloa bada! Iena dala oi badinaia neganai, ia ese oi do ia hakaua bona oi do ia gimaia. Dirava ia ura oi do ia durua oi davaria hahetoho idauidau oi hanaia totona. (Salamo 55:22) Unai dainai bema mai kudouna ibounai ida Iehova oi hesiai henia, salamo torea tauna bamona oi gwau diba: “Nega ibounai lau diba, Lohiabada be lau dekenai ia noho. Ia be lau kahirakahira dainai, gau ta ese lau ia hagaria lasi.” (Salamo 16:8; 63:8) Oibe, Iehova ese oi do ia durua ia moalelaia mauri dalana oi badinaia totona. To, Dirava ena inai tauna ta ia ura lasi unai bamona do oi karaia.

6. Taunimanima ese Iehova idia hesiai henia ena badina be Satani ese edena bamona ia hepapahuahulaia?

⁶ Inai buka ena karoa 11 ai, Satani Diabolo ese Dirava ena lohia siahuna ia hepapahuahulaia dalana ita herevalaia. Satani ia gwau Dirava be koikoi tauna, bona Iehova ese Adamu bona Heva dekenai maoro ia henia lasi dahaka be namo bona dahaka be dika idia abia hidi totona. Adamu bona Heva idia kara dika bona edia natudia ese tanobada idia hahonua matamaia neganai, taunimanima ese Iehova idia hesiai henia ena badina be Satani ese ia hepapahuahulaia. Reana ia gwau: “Taunimanima be Dirava idia lalokau henia dainai ia idia hesiai henia lasi. Lau dekenai nega oi henia, bona Dirava amo taunimanima ibounai lau hakaua siri diba.” Iobu ena sivarai ese ia hahedinaraia Satani be unai bamona lalohadai ia abia. Iobu be daika, bona edena dala ai Iobu be Satani ese ia havaraia hepapahuahuana lalonai ia noho?

7, 8. (a) Edena dala ai Iobu be ena negai idia noho taudia amo ia idau? (b) Iobu ese Dirava ia hesiai henia ena badina, be Satani ese edena bamona ia hepapahuahulaia?

 ⁷ Iobu be lagani 3,600 gunanai ia noho. Ia be tau namona, badina Iehova ia gwau: “Tanobada dekenai ia be tau ta ese ia hereaia lasi, ani? Ia be kerere ta lasi, bona kara maoromaoro tauna. Ia ese lau Dirava dekenai ia gari, bona kara dika dekena amo ia siri momokani.” (Iobu 1:8) Dirava be Iobu dekenai ia moale.

⁸ Iobu ese Dirava ia hesiai henia ena badina, be Satani ese ia hepapahuahulaia. Diabolo be Iehova dekenai ia gwau: “Oi be nega ibounai oi ese ia [Iobu] bona iena famili oi naria noho. Oi ese ia biagua gaudia ibounai danu oi naria noho. Oi ese Iobu ena kara ibounai oi hanamoa, bona iena boromakau ese tanobada idia hahonua momokani. To, bema iena kohu, bona ia biagua gaudia ibounai oi kokia neganai, ia ese oiemu ladana do ia hadikaia momokani!”​—Iobu 1:​10, 11.

9. Iehova ese Satani ena hepapahuahu herevana be edena bamona ia haerelaia, bona dahaka dainai?

⁹ Satani ia gwau Iobu ese Dirava ia hesiai henia badina ia ura gau namodia ia abia. Bona ia gwau bema Iobu ese hahetoho ta ia davaria, ia ese Dirava do ia rakatania. Edena dala ai Iehova ese Satani ena hepapahuahu herevana ia haerelaia? Iobu ese Dirava ia hesiai henia ena badina be Satani ese ia hepapahuahulaia dainai, Iehova ese Satani ia koua lasi Iobu ia tohoa totona. Unai dala amo, Iobu ese do ia hahedinaraia ia be lalokau dainai Dirava ia hesiai henia eiava lasi.

10. Iobu ese edena hahetoho ia davaria, bona edena bamona ia kara?

¹⁰ Daudau lasi murinai, Satani ese dala idauidau ai Iobu ia tohoa. Haida ese Iobu ena animal haida idia henaoa bona ma haida idia hamasedia. Iena hesiai taudia momo idia hamasea. Unai ese moni ena hekwakwanai ia havaraia. Unai murinai dika ma ta ia vara, Iobu ena natudia 10 be lai gubana ese ia hamasea. To ena be unai gau dikadia idia vara, “Iobu ese kerere ta ia karaia lasi, bona ia ese Dirava dekenai ia badu henia lasi.”​—Iobu 1:22.

11. (a) Satani ese dahaka samania hereva iharuana be Iobu dainai ia gwauraia, bona Iehova be dahaka ia karaia? (b) Iobu ese gorere dikana ia abia neganai, ia be edena bamona ia kara?

 ¹¹ Satani ese Iobu ma ia toho lou. Reana ia laloa Iobu ia haheauka diba ena be ia ese ena kohu, hesiai taudia bona natudia ia haboioa, to bema ia gorere, unai neganai Dirava do ia rakatania. Satani ese Iobu dekenai gorere dikana ta ia henia neganai, Iehova ese ia koua lasi. To Iobu ese Dirava ia abidadama henia noho. Ia gwau: “Egu laloa maoromaoro [“abidadama,” NW] bona egu kerere lasi, do lau gwauraia noho.”​—Iobu 27:5.

12. Iobu ese edena dala ai Diabolo ena hepapahuahu herevana ia haerelaia?

¹² Iobu be ia diba lasi ia dekenai idia vara noho gau dikadia be Satani ese ia havaraia. Bona Diabolo ese Iehova ena lohia siahuna ia hepapahuahulaia neganai, Iobu be unai ia diba lasi, unai dainai ia laloa Dirava ese ia dekenai unai hekwakwanai ia havaraia. (Iobu 6:4; 16:​11-14) To, Iehova ia badinaia noho. Bona Iobu ese Iehova ia abidadama henia, unai amo ia hahedinaraia Satani ena hereva​—Iobu be sibona ena ura gaudia ia abia totona Dirava ia hesiai henia herevana unai​—ia hakoikoia!

13. Iobu ese Dirava ia abidadama henia dainai dahaka ia vara?

¹³ Iobu ese Iehova ia abidadama henia dainai, Iehova ese Satani ena hepapahuahu herevana ia haerelaia diba. Iobu be Iehova ena turana, bona ena abidadama dainai Dirava ese ia hanamoa.​—Iobu 42:​12-17.

14, 15. Dahaka dainai ita gwau diba, Satani ena hepapahuahu herevana be Iobu sibona dekenai ia gwauraia lasi, to taunimanima ibounai dekenai ia gwauraia?

¹⁴ Satani ese Iobu ena Dirava badinaia karana sibona ia hepapahuahulaia lasi. Oi danu be unai hepapahuahu lalonai. Aonega Herevadia 27:11 ese unai ia hahedinaraia goevagoeva, Iehova ia gwau: “Egu natuna e, do oi aonega, vadaeni do lau moale, bona unai dainai, bema tau ta ese lau ia gwauraia kerere neganai, lau ese iena hereva do lau halusia diba.” Iobu ia mase bena lagani handred momo idia hanaia murinai unai hereva idia torea, unai ese ia hahedinaraia Satani ese Dirava ia gwauraia  kerere bona Ena hesiai taudia ia samania noho. Iehova ia moalelaia mauri dalana ita badinaia neganai, ita ese Satani ena hereva ita hakoikoia bona unai dala amo Dirava ita hamoalea. Emu hemami unai kara dekenai be edena bamona? Herevana gau haida iseda mauri lalonai do ita haidaua, to Diabolo ena hereva ita hakoikoia dainai ita moale, ani?

¹⁵ Satani ia gwau: “Tau ta ese iena gau ibounai do ia negea, iena mauri do ia dogoatao totona.” (Iobu 2:4) Satani ia gwau “tau ta” neganai, ia hahedinaraia goevagoeva ena hepapahuahu herevana be Iobu sibona dekenai ia gwauraia lasi, to taunimanima ibounai dekenai ia gwauraia. Unai be mai anina bada herevana. Satani ese emu Dirava badinaia karana ia hepapahuahulaia. Diabolo ia ura oi ese Dirava do oi kamonai henia lasi bona hekwakwanai idia vara neganai mauri dala maorona do oi rakatania. Edena dala ai Satani ese unai ura ia hagugurua diba?

16. (a) Satani ese dahaka ia gaukaralaia toho, unai amo taunimanima be Dirava amo ia veridia siri? (b) Edena bamona Diabolo ese unai dala idauidau ia gaukaralaia oi ia tohoa totona?

¹⁶ Karoa 10 dekenai ita herevalaia bamona, Satani ese dala idauidau ia gaukaralaia taunimanima be Dirava amo ia veria oho totona. Bona danu, ia be “laiona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho.” (1 Petero 5:8) Baibel oi stadilaia bona oi dibaia gaudia oi badinaia neganai, Satani ese emu turadia, varavara eiava ma haida do ia gaukaralaia oi idia dagedage henia totona. * (Ioane 15:​19, 20) Bona danu, Satani ese “iena kara ia senisia diba, bona ia ese diari aneruna ena kopina ia atoa diba.” (2 Korinto 11:14) Diabolo ese hehuni gaudia ia gaukaralaia diba oi ia koia bona Dirava ia moalelaia mauri dalana oi rakatania totona. Ia ura do oi lalometau bona reana do oi laloa oi ese Dirava oi hamoalea diba lasi. (Aonega Herevadia 24:10) Herevana Satani be “laiona mai ena boiboi bada” eiava “diari aneruna”  ta bamona ia kara, to ia hepapahuahulaia herevana be tamona: Ia gwau hahetoho eiava hedibagani oi davaria neganai, Dirava hesiai henia karana do oi rakatania. Iobu ia karaia bamona, edena dala ai Satani ena hepapahuahu herevana oi hakoikoia bona emu Dirava badinaia karana oi hamomokania diba?

17. Iehova ena taravatu ita kamonai henia ena badina badana be dahaka?

¹⁷ Satani ena hepapahuahu herevana oi haerelaia diba, bema Dirava ia moalelaia mauri dalana oi badinaia. Unai ena anina be dahaka? Baibel ia gwau: “Lohiabada oiemu Dirava do oi lalokau henia, mai oiemu kudouna ibounai, mai oiemu lauma ibounai, bona mai oiemu goada ibounai danu.” (Deuteronomi 6:5) Emu lalokau Dirava dekenai ia bada daekau noho lalonai, do oi ura bada Dirava ena ura karadia oi karaia. Aposetolo Ioane ia gwau: “Dirava ita lalokau henia ena anina be inai: Dirava ena taravatu do ita badinaia.” Bema emu kudouna ibounai ida Iehova oi lalokau henia, do oi davaria “iena taravatu be metau lasi.”​—1 Ioane 5:3.

18, 19. (a) Iehova ena taravatu haida be dahaka? (Rau 122 dekenai ia noho maua itaia.) (b) Edena bamona ita diba Dirava be ita amo gau momo ia noia lasi?

¹⁸ Iehova ena taravatu be dahaka? Taravatu ese ita ia koua gau haida ita karaia lasi totona. Hegeregere, rau 122 dekenai ia noho maua ladana “Iehova Ia Inai Henia Gaudia Dadaraia” itaia. Unuseniai Baibel ese ia gwauraia dika kara haida idia noho. Unai kara idauidau oi itaia neganai, reana do oi laloa idia haida be idia dika momokani lasi. To lista lalonai idia gwauraia siri haida oi laloa dobu murinai, do oi laloparara Iehova ena taravatu ita badinaia be aonega karana. Reana emu mauri dekenai kara haida oi haidaua totona do oi hekwarahi bada. To, Dirava ia moalelaia mauri dalana oi badinaia neganai, moale bada do oi davaria. (Isaia 48:​17, 18) Bona unai oi karaia diba. Edena bamona ita diba?

¹⁹ Iehova be ita amo gau momo ia noia lasi, to ita henia diba gaudia sibona ia abia dae. (Deuteronomi 30:​11-14) Ia diba dahaka gaudia ita karaia diba bona dahaka gaudia ita karaia diba  lasi. (Salamo 103:14) Danu, Iehova ese ita ia hagoadaia ia ita kamonai henia totona. Aposetolo Paulo ia gwau: “Dirava be ia momokani. Ia ese umui do ia naria, emui goada ia hanaia dibagani ese umui do ia pidia garina. Bona dibagani ia mai neganai, emui dala ta do ia kehoa. Vadaeni inai dala dekena amo unai dibagani dekena amo do umui kwalimu diba.” (1 Korinto 10:13) Hekwakwanai idauidau oi haheaukalaia totona, Iehova ese oi dekenai “siahu badana” do ia henia. (2 Korinto 4:7) Paulo ese hahetoho momo ia haheaukalaia murinai, ia gwau: “Lau dekenai goada ia henia Diravana dainai, lau be mai egu goada gau iboudiai karaia totona.”​—Filipi 4:13, BHğ.

20. Edena kara namodia oi hahedinaraia be namo, bona dahaka dainai unai be mai anina bada?

²⁰ Oibe, Iehova ia moale bema ia inai henia gaudia oi dadaraia, to unai sibona oi karaia be hegeregere lasi. Namona be ia ura henia gaudia oi ura henia. (Roma 12:9) Emu turadia ai oi halaoa taudia edia lalohadai, ura bona idia abia dae gaudia be oiemu hegeregerena, a? Iehova danu be unai bamona. Unai dainai Iehova ia ura henia gaudia oi dibaia be namo. Unai gaudia haida be Salamo 15:​1-5 ese ia gwauraia bona unai kara idia hahedinaraia taudia be Dirava ese ena turadia ai ia halaoa. Iehova  ena turadia ese lauma ena huahua idia hahedinaraia. Unai kara haida be “lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana.”​—Galatia 5:​22, 23.

21. Dahaka ese oi do ia durua Dirava ia moalelaia karadia oi hahedinaraia totona?

²¹ Hanaihanai Baibel oi duahia bona stadilaia karana ese oi do ia durua unai kara idauidau oi hahedinaraia totona. Bona Dirava ia ura oi karaia gaudia oi dibaia neganai, unai ese oi do ia durua Dirava ena lalohadai hegeregerena oi laloa totona. (Isaia 30:​20, 21) Emu lalokau Iehova dekenai oi hagoadaia noho lalonai, do oi ura bada Dirava ia moalelaia mauri dalana oi badinaia.

22. Bema Dirava ia moalelaia mauri dalana oi badinaia, unai ese dahaka namo ia havaraia?

²² Namona be oi hekwarahi Iehova ia moalelaia mauri dalana oi badinaia totona. Baibel ese emu mauri oi haidaua dalana be dabua gunadia oi kokia bona dabua matamata oi atoa karana ida ia hahegeregerea. (Kolose 3:​9, 10) To salamo torea tauna ese Iehova ena taravatu be inai bamona ia gwauraia: “Lau ese idia lau badinaia neganai, noho mauri namona momokani lau davaria.” (Salamo 19:11) Dirava ia moalelaia mauri dalana oi badinaia neganai, mauri namona momokani do oi davaria. Unai bamona oi karaia neganai, Satani ena hepapahuahu herevana oi haerelaia bona Iehova oi hamoalea!