1. Dahaka dainai taunimanima edia mauri dekenai ruma bese goadadia be mai anina bada ?

 OREA ibounai amo ruma bese be orea ginigunana tanobada dekenai, bona taunimanima edia mauri dekenai ia be mai anina bada. Idaunega amo ema bona hari, ruma bese goadadia ese edia tano ena bese idia hagoadaia. Ruma bese be natudia hadibaia gabuna hereadaena, idia be laloa namonamo taudia ai idia lao totona.

2-5. (a) Moale ruma besena lalonai natuna ena noho namona oi gwauraia hedinarai. (b) Ruma bese haida edia hekwakwanai be dahaka dahaka?

² Moale ruma besena be noho namo davaria gabuna. Nega sisina ruma bese namona ta ena mauri mani ita laloa. Adorahi ai idia aniani neganai, lalokau tama sina be edia natudia ida idia helai hebou bona dina lalonai idia vara gaudia idia herevalaia. Natudia be mai edia moale ida  sikuli dekenai idia vara gaudia be edia tamana bona sinana dekenai idia kikilaia. Unai laga-ani hebou negana amo goada idia abia, bena dina ma ta ai murimuri ai mauri do idia haheaukalaia diba.

³ Moale ruma besena lalonai, natuna ta ia diba ia gorere neganai ena tamana bona sinana ese ia do idia naria, reana hanuaboi ai idia ta ta be ena nega ena nega ai iena bedi badinai do idia noho. Ia diba ena mauri lalonai ia davaria hekwakwanai be ena sinana eiava tamana dekenai do ia gwauraia diba bona heduru do ia abia. Oibe, herevana ruma murimuri ai mauri ia dika, to natuna be noho namo ena mamina ia abia.

⁴ Natudia idia bada neganai, idia headava, bona sibona edia ruma bese idia havaraia. Orient taudia edia aonega herevana ta ia gwau: “Tau ta be sibona ena natuna ia abia neganai ia lalo-parara, namona be ena tama sina ia tanikiu henia bada.” Idia bada vadaeni natudia ese mai edia lalo-moale bona lalokau ida sibodia edia ruma bese idia hamoalea toho. Idia ese edia tama sina burukadia, tubudia maragidia edia hebamo idia moalelaia taudia, idia naria danu.

⁵ Reana hari oi laloa: ‘Lau ese egu ruma bese lau lalokau henia, to emai mauri be unai bamona lasi. Lau bona egu adavana emai gaukara horadia idia idau bona ta ta ai itaia momo lasi. Nega momo moni ena hekwarahi ai herevalaia sibona.’ Eiava oi gwau, ‘Egu natudia bona tubudia be ma taoni ta dekenai idia noho, bona idia lau itaia lasi, a’? Oibe, nega momo taunimanima ese idia haidaua diba lasi gaudia dainai, edia ruma bese maurina ia idau. To, haida ese edia ruma bese maurina idia moalelaia. Edena bamona unai ia vara? Ruma bese ena moale havaraia dalana ia noho, a? Oibe. To unai dala ita do herevalaia lasi neganai, namona be mai anina bada henanadai ta ita haerelaia guna.

6. Inai buka lalonai edena bamona ruma besedia do ita herevalaia?

⁶ West tanodia ai, ruma bese momo be mai edia tamana ta, sinana ta, bona natudia. Tubudia burukadia be sibona  edia ruma dekenai idia noho, edia goada hegeregerena. Ena be varavara ida idia hebamo noho, to varavara dekenai edia maduna be bada lasi. Inai buka lalonai do ita herevalaia ruma besena be unai bamona. To, vanegai idia hanaia laganidia lalonai ma ruma bese idaudia haida edia namba ia bada ia lao—tama o sina sibona ia noho ruma besedia, tama o sina ia headava lou ruma besedia, bona badina ta dainai tama sina idia noho hebou lasi ruma besedia.

7. Ruma bese badana ena anina be dahaka?

⁷ Gabu haida ai, varavara danu be ruma bese taudia. Unai bamona ruma bese badadia lalonai, bema mai dalana natudia ese tubudia burukadia idia naria, bona varavara ida idia noho hebou namonamo bona idia dekenai edia maduna be bada. Hegeregere, nega haida ruma bese taudia ese edia tadidia bona kakadia edia natudia eiava ma varavara haida idia durua, idia ubua, bona edia edukeisen ena davana idia karaia danu. Inai buka lalonai do ita herevalaia hakaua herevadia be mai edia anina unai bamona ruma bese badadia dekenai danu.

8, 9. Tano haida ai idia davaria hekwakwanai be edena bamona idia hahedinaraia ruma bese maurina ia idau ia lao?

⁸ Hari inai negai ruma bese maurina ia idau ia lao noho—to madi, ia namo ia lao lasi. Haheitalai ta be India dekenai ia vara karana, unuseniai hahine be ena tau ena ruma bese ida ia noho bona ravana taudia edia hakaua henunai ruma dekenai ia gaukara. To hari, India hahine sisina momo ese moni gaukara idia tahua. To, toana be taunimanima idia do laloa noho, ruma gaukara be guna bamona do idia karaia danu be namo. Tano momo dekenai taunimanima idia henanadai, Bema hahine ese moni gaukara ia karaia, ruma lalonai gaukara badana ia karaia danu bona ruma bese taudia ma haida be ruma dekenai idia gaukara sisina sibona be namo, a?

⁹ Orient besedia lalonai, varavara idia gwauraia ruma bese taudia. To, West tanodia edia mauri dalana, ta ta be sibona ena namo ia laloa bada mauri dalana ia bada dainai,  bona moni ena hekwarahi dainai, unai bamona ruma bese badadia be momo lasi hari. Unai dainai, momo idia abia dae lasi ruma bese taudia burukadia idia naria be maduna huaia karana ta o hahenamo ta, to idia laloa ia be metau gauna ta. Haida ese edia tama sina burukadia idia kara dika henia. Momokani, hari inai negai tano momo dekenai, buruka taudia idia kara dika henia eiava idia naria namonamo lasi.

10, 11. Dahaka gaudia ese idia hahedinaraia Europe tanodia ai ruma bese maurina ia idau ia lao?

¹⁰ Headava hadokoa karana ia bada ia lao. Hari Spain dekenai headava momo idia hadokoa, hegeregere lagani 1990 ia matamaia neganai idia karaia headava 8 8 amo ta ta idia hadokoa. Unai namba ia bada, badina lagani 25 sibona gunanai, headava 100 100 amo ta ta idia hadokoa. Ripoti idia gwau Europe tanodia ibounai amo Britain dekenai headava idia hadokoa momo (headava 10 10 amo reana 4 4 do idia hadokoa), bona unuseniai tama o sina sibona ia noho ruma besedia edia namba ia bada ia lao.

¹¹ Toana be Germany dekenai momo ese guna bamona ruma bese maurina idia dadaraia momokani. Lagani 1990 murinai, Germany ai ruma besedia 35 pesen lalonai taunimanima tamona sibona ia noho bona ruma besedia 31 pesen lalonai taunimanima rua sibona idia noho. France taudia danu idia headava momo lasi, bona hari idia headava taudia be nega momo headava idia hadokoa bona idia headava daudau lasi murinai idia hadokoa. Taunimanima momo idia noho hebou, to idia ura lasi headava ena maduna idia huaia. Unai bamona kara be tanobada hegegemadai idia vara momo.

12. Hari inai negai ruma bese maurina ia idau ia lao dainai, natudia be edena hekwakwanai idia davaria?

¹² Natudia be edena bamona? United States bona tano ma haida dekenai, natudia haida be headava lasi taudia amo idia vara, unai taudia momo be memero bona kekeni matamatadia sibona. Kekeni momo be tatau idauidau amo natudia idia abia. Tanobada ena kahana idauidau amo idia mai sivarai idia hahedinaraia ruma lasi natudia milioni  momo be dala dekenai idia loaloa kava; idia momo be edia ruma idia rakatania badina unuseniai dika idia davaria eiava edia ruma bese taudia ese idia luludia, badina idia naridia diba lasi.

13. Gabu momo ai ruma bese edia moale idia hadikaia hekwakwanai be dahaka dahaka?

¹³ Oibe, ruma bese idia hekwarahi. Ita herevalaia vadaeni gaudia sibona lasi, to memero kekeni edia gwau-edeede karana, natudia hadikaia karana, adavana dagedage henia karana, kekero muramura manadalaia karana, bona dika idia havaraia hekwakwanai ma haida ese ruma bese momo edia moale idia hadikaia. Taunimanima badadia bona natudia momo ese ruma bese lalonai noho namo idia davaria lasi.

14. (a) Haida edia lalohadai hegeregerena ruma bese idia hekwarahi ena badina be dahaka dahaka? (b) Keristani ginigunadia edia negai ia noho loea tauna ta be edena bamona hari inai negai maurina ia herevalaia, bona ena hereva ia guguru ena anina be dahaka ruma bese mauri dekenai?

¹⁴ Dahaka dainai ruma bese momo idia hekwarahi? Haida idia gwau hahine ese moni gaukara idia karaia dainai unai ia vara. Ma haida idia gwau taunimanima ese kara maoromaoro taravatudia idia badinaia lasi dainai ia vara. Bona ma badina haida idia gwauraia danu. Kahirakahira lagani 2,000 gunanai, momo idia diba loea tauna ta ese ia hahedinaraia ruma bese do idia hekwarahi, ia gwau: “To namona be oi diba, nega ena dokona dekenai, metau dikadia momo do idia vara. Badina taunimanima ese idia edia ura sibona do idia tahua, moni do idia mataganigani henia, do idia hekokoroku bona heagi. Do idia hereva dika, edia tamana bona sinana do idia kamonai henia lasi, tanikiu henia kara do idia diba lasi, bona helaga karadia do idia negea. Idia be lalokau do idia diba lasi, do idia bogahisihisi lasi, haida edia ladana do idia hadikaia kava, do idia lebulebu, do idia dagedage, kara namodia do idia ura henia lasi. Edia turana do idia samania henia, do idia kara kava. Do idia gwau idia be tau badadia momokani, vadaeni lebulebu karadia idauidau do idia ura henia bada, to Dirava do idia ura henia maragi.” (2 Timoteo 3:1-4) Hari  inai negai unai hereva ia guguru be ta ese ia daradaralaia lasi, ani? Unai bamona tanobadana ai ruma bese momo idia hekwarahi be ita hoalaia lasi, ani?

15-17. Inai buka lalonai ita do ia hadibaia ruma bese ena moale havaraia dalana be edeseniai ita davaria diba?

¹⁵ Ruma bese lalonai moale davaria totona sisiba be momo herea. West tanodia ai, heduru daladia idia gwauraia buka bona magasin momo herea idia halasia noho. To ita daradara, badina sisiba idia henia taudia idia lalo-tamona lasi, bona hari momo ese idia abia dae sisiba be gabeai idia gwauraia dika.

¹⁶ Unai dainai, ruma bese hakaua totona ita abidadama henia sisiba be edeseniai ita davaria diba? Oi ura lagani 1,900 gunanai idia torea ore bukana amo oi tahua, a? Eiava oi laloa unai bamona buka ena sisiba be hari ia hegeregere lasi, a? To momokani, ruma bese ena moale havaraia dalana korikorina be unai buka lalonai ia noho.

¹⁷ Unai buka be Baibel. Hamomokania gaudia ese idia hahedinaraia hegeregerena, Baibel be Dirava ena lauma amo ia vara. Ita ese Baibel dekenai inai hereva ita duahia: “Buka Helaga ibounai be Dirava ena lauma amo ia vara bona ia be mai ena namo hadibaia totona, sisiba henia totona, gau idauidau hamaoromaoroa totona, kara maoromaoro ai matahakani henia totona.” (2 Timoteo 3:16, NW) Inai buka lalonai, ai ese oi ai hagoadaia, hari inai negai ruma bese edia hekwarahi bona edia hekwakwanai oi hanaia toho lalonai, Baibel ia henia heduru do oi laloa “gau idaui dau hamaoromaoroa” totona.

18. Ruma bese ena moale havaraia totona, dahaka dainai Baibel ena sisiba ita abia dae be maoro?

¹⁸ Baibel ena heduru ese ruma bese ena moale ia havaraia diba oi abia dae be auka neganai, mani inai oi laloa: Ena lauma amo Baibel ia havaraia Tauna be headava ia Hamatamaia Tauna. (Genese 2:18-25) Baibel ia gwau ena ladana be Iehova. (Salamo 83:18) Ia be Havaraia Tauna bona ‘famili ibounai be unai Tamana amo edia ladana idia abia.’  (Efeso 3:14, 15) Iehova ese taunimanima ginigunadia ia havaraia negana amo ruma bese edia mauri ia itaia. Idia vara diba hekwakwanai ia diba bona hamaoromaorodia totona sisiba ia henia. Idaunegai amo ema bona hari, ruma bese lalonai mai momokani ida Baibel ena hakaua herevadia idia badinaia taudia ese moale bada idia davaria.

19-21. Edena sivarai hari inai negai ese idia hahedinaraia Baibel be mai ena siahu ruma bese ena hekwakwanai idauidau hanaia totona?

¹⁹ Hegeregere, Indonesia dekenai ruma hahinena ta be laki gadara ia karaia hanaihanai. Lagani momo lalonai, ena natudia toi ia naria namonamo lasi bona ena tau ida ia heai hanaihanai. Bena Baibel stadi ia hamatamaia. Unai hahine ese Baibel ena hereva ia abia dae matamaia. Ena sisiba ia badinaia neganai, ia be adavana namona ai ia lao. Baibel ena hakaua herevadia badinaia totona ia hekwarahi dainai, ena ruma bese ese moale ia davaria.

²⁰ Spain dekenai ruma hahinena ta ia gwau: “Ai headava bena lagani tamona sibona murinai, hekwakwanai badadia ai davaria.” Ia bona ena tau edia lalohadai momo be idau, bona idia hereva heheni momo lasi, to idia hepapahuahu neganai sibona idia hereva momo. Ena be idia be mai edia kekeni maragina, to edia lalona idia hadaia do idia parara. To, unai idia do karaia lasi neganai, haida ese idia hagoadadia Baibel do idia tahua. Idia ese Baibel ena sisiba headava tatau bona hahine dekenai idia stadilaia bona idia badinaia matamaia. Nega sisina murinai, maino dalana ai idia herevahereva diba, bona edia ruma bese maragina ia lalo-tamona mai moale ida.

²¹ Baibel ese buruka taudia ia durua danu. Hegeregere, Japan tauna ta bona ena hahine edia mauri mani oi laloa. Unai tau be badu haraga tauna bona nega haida ia dagedage danu. Edia natudia kekeni be Baibel stadi idia hamatamaia, herevana edia tama sina idia ura lasi. Bena, unai tau be ena natuna kekeni ia bamodia, to ena adavana be stadi ia dadaraia noho. To, idia hanaia laganidia lalonai, unai hahine ia itaia Baibel ena hakaua herevadia ese ena ruma bese idia durua. Ena natuna kekeni ese ia idia naria  namonamo, bona ena adavana ese ena badu karana ia rakatania. Edia kara idia haidaua dainai, unai hahine ia ura Baibel ia stadilaia, bona Baibel ena hereva ese ena mauri ia haidaua danu. Nega momo unai hahine burukana ia gwau: “Hari ai be headava taudia korikoridia.”

22, 23. Edena dala ai Baibel ese tano idauidau taudia ia durua, edia ruma bese maurina lalonai moale idia davaria totona?

²² Unai taudia bona ma taunimanima momo be ruma bese ena moale havaraia dalana idia dibaia. Idia ese Baibel ena sisiba idia abia dae bona idia badinaia. Momokani, taunimanima ibounai hegeregerena inai tanobada mai ena dagedage, matabodaga, bona moni ena hekwarahi lalonai idia noho. Danu, idia be goevadae lasi taudia, to moale idia davaria badina ruma bese ia Havaraia Tauna ena ura idia karaia toho. Baibel ia gwau bamona, Iehova Dirava ese ‘emui namo habadaia dalana be umui dekenai ia hadibaia noho bona emui raka dalana namona dekenai umui ia hakaua noho.’—Isaia 48:17.

²³ Ena be kahirakahira lagani 2,000 gunanai Baibel idia torea ore, to ena sisiba be mai anina bada hari inai nega totona. Danu, taunimanima iboudiai totona idia torea. Baibel be America taudia eiava West tanodia ai idia noho taudia sibona edia buka lasi. ‘Rara tamona dekenai Iehova ese taunimanima bese ibounai ia karaia,’ bona gabu iboudiai dekenai idia noho taudia Ia diba namonamo. (Kara 17:26) Baibel ena hakaua herevadia ese taunimanima iboudiai idia durua. Bema idia oi badinaia, oi danu ese ruma bese ena moale havaraia dalana do oi dibaia.