Iesu Ena Hereva Idia Badinaia, A?

KERISTANI taudia ibounai be hida? Atlas of Global Christianity bukana ia gwau, lagani 2010 lalonai Keristani taudia ibounai be kahirakahira 2.3 bilioni bamona. Ma ia gwau, unai Keristani taudia be dubu 41,000 dekenai idia lao, bona edia hahediba herevadia bona taravatu be idauidau. Taunimanima haida be unai Keristani dubu momo herea idia itaia dainai idia daradara bada. Reana idia laloa, ‘Sibodia idia gwauraia Keristani taudia ibounai be Iesu ena hereva idia badinaia, a?’

Mani inai haheitalai oi laloa. Provinsi ta ai ia ura lao tauna be airport ai ena tiketi ia hahedinaraia. To, tiketi dekenai ia noho ladana be iena ladana ia hamomokania totona, namona be ID kadi ma ta do ia hahedinaraia danu. Unai hegeregerena, Keristani momokanina do ia gwau ia be Keriso ia abidadama henia sibona be hegeregere lasi, to namona be hamomokania karadia haida do ia hahedinaraia danu. Edena dala ai unai ia karaia diba?

Inai hereva “Keristani” be lagani 44 C.E., ai idia gaukaralaia matamaia. Baibel torea tauna Luka ia gwau: “Antioka ai, Dirava ena hakaua henunai, hahediba taudia ese nega ginigunana inai ladana Keristani idia abia.” (Kara 11:26) Oi itaia unai Keristani taudia be Keriso ena hahediba taudia. Dahaka ese ia hamomokania tau ta be Keriso ena hahediba tauna? The New International Dictionary of New Testament Theology bukana, ia gwau: “Hahediba tauna bamona Iesu murinai ia raka tauna ese ia mauri noho lalonai, . . . iena mauri ibounai be Iesu do ia henia.” Unai dainai, Keristani momokanina ena mauri ibounai lalonai, Iesu ena hahediba herevadia bona hakaua herevadia be mai ena kudouna ibounai ida do ia badinaia momokani.

Hari inai negai, sibodia idia gwau Keristani taudia huanai, unai bamona taudia ita davaria diba, a? Iesu ese iena murinai idia raka taudia edia toana be edena bamona ia gwauraia? Oi ai boiria Baibel amo unai henanadai edia haere do oi tahua. Atikol gabedia ai, Iesu ese iena murinai idia raka taudia momokanidia edia kara be hereva 5 amo ia hahedinaraia. Do ita tahua bema Keristani taudia ginigunadia ese unai kara idia hahedinaraia. Bona do ita tahua, hari sibodia idia gwauraia Keristani taudia huanai, daidia be unai kara idia hahedinaraia danu.