“Egu Hereva Umui Badinaia”

“Bema egu hereva umui badinaia, umui be momokani egu hahediba taudia, bona hereva momokani do umui diba, bona hereva momokani ese umui do ia ruhaia.”—IOANE 8:31, 32.

Anina be Dahaka: “Hereva” ena anina be Iesu ena hahediba herevadia, bona idia be siahu tauna amo idia mai. Iesu ia gwau: “Lau ia siaia Tamana ese lau ia hagania hegeregerena lau hereva bona hadibaia.” (Ioane 12:49) Iena guba Tamana, Iehova Dirava, ia guriguri henia neganai, Iesu ia gwau: “Oiemu hereva be momokani.” Nega momo ena hahediba herevadia hamomokania totona, Iesu be Dirava ena Hereva dekenai ia tabekau. (Ioane 17:17; Mataio 4:​4, 7, 10) Unai dainai, Keristani momokanidia be ‘iena hereva idia badinaia,’ anina be idia abia dae Dirava ena Hereva, Baibel “be momokani,” bona ia be edia hahediba herevadia bona kara ibounai ena badina.

Keristani Ginigunadia be Unai Idia Karaia, A?: Baibel ena buka momo ia torea tauna, aposetolo Paulo be Iesu hegeregerena Dirava ena Hereva ia matauraia. Ia gwau: “Toretore Helagadia be Dirava ena siahu amo idia torea, bona ia be mai ena namo.” (2 Timoteo 3:​16) Idia abia hidi tatau ese edia Keristani tadikaka taihu idia hadibaia totona, namona be “ia koikoi diba lasi hereva momokanina [do idia] dogoatao auka.” (Tito 1:​7, 9, The Amplified Bible) Paulo ese Keristani ginigunadia ia sisiba henidia “taunimanima edia aonega hereva” do idia dadaraia. Badina “inai bamona hereva be sene taudia edia kara, bona tanobada idia gunalaia lauma dikadia dekena amo idia mai, Keriso dekena amo lasi.”—Kolose 2:8, BH.

Hari Daidia be Unai Idia Karaia?: Catechism of the Catholic Church bukana, ia gwau: “[Katolik] Dubu be Buka Helaga sibona ia gaukaralaia lasi idia hedinarai gaudia ia hamomokania totona. Unai dainai, sene hereva helagadia bona Buka Helaga be nega tamona ai abia dae bona matauraia.” Toronto, Canada ai, Maclean magazine ese haroro hahinena ta ena henanadai idia torea, ia gwau: ‘Dahaka dainai lagani 2000 gunanai ia noho tauna ena gadona ese ita ia hakaua? Ita be mai iseda lalohadai namodia to Iesu bona Buka Helaga ese iseda lalohadai idia abia dae lasi, unai dainai edia heduru ita tahua be anina lasi.”

New Catholic Encyclopedia ese Iehova ena Witnes taudia be inai bamona ia herevalaia: “Edia hahediba herevadia bona kara ibounai be Baibel amo idia abia.” Vanegai, Iehova ena Witnes hahinena ta be tau ta ia ura haroro henia neganai, unai tauna ese ena hereva ia utua, Baibel ia poinia ma ia gwau: “Lau diba vadaeni oi be daika, badina Baibel oi dogoatao.”