Genese 40:1-23
40 Unai murinai, Aigupito ena king ena wain bubua taudia edia biaguna+ bona paraoa gabua taudia edia biaguna be edia lohia, Aigupito ena king, dekenai idia kara dika.
2 Unai dainai Farao be ena hesiai taudia rua, wain bubua taudia edia biaguna bona paraoa gabua taudia edia biaguna,+ dekenai ia badu,
3 bona ia ese idia be gima tauna badana ena dibura ruma dekenai ia koudia,+ Iosepa be unuseni ia noho.+
4 Bena gima tauna badana ese Iosepa ia abia hidi idia ida ia noho bona idia ia naria totona.+ Bona idia be dina haida dibura ruma dekenai idia noho.
5 Aigupito ena king ena wain bubua tauna bona paraoa gabua tauna, dibura ruma ai idia atoa taudia rua unai, be hanuaboi tamona lalonai idia nihi, bona unai nihi ta ta edia anina be idauidau.
6 Daba ai Iosepa ia raka vareai bona idia ia itaia neganai, edia toana be idia moale lasi.
7 Vadaeni Iosepa ese Farao ena hesiai taudia, ia ida iena biaguna ena dibura ruma ai idia atoa taudia unai, ia nanadaia: “Dahaka dainai hari dina lalohisihisi toana umui hahedinaraia?”
8 Unai neganai ia dekenai idia gwau: “Ai ruaosi ai nihi, to nihi ena anina gwauraia tauna ta be lasi.” Iosepa be idia dekenai ia gwau: “Dirava sibona ese nihi edia anina ia hahedinaraia, ani?+ Mani, lau dekenai umui gwauraia.”
9 Bena wain bubua taudia edia biaguna ese Iosepa dekenai ena nihi ia herevalaia, ia gwau: “Lauegu nihi lalonai, lau ese vain auna ta lau itaia.
10 Bona unai vain auna dekenai be rigi toi idia noho, bona toana be idia amo rigi matamata idia tubu, ena flaoaflaoa ia atoa bena idia mage greips ai idia lao.
11 Bona lau ese Farao ena kapusi lau dogoatao, bona greips lau abia bona Farao ena kapusi lalonai lau gigia. Unai murinai kapusi be Farao ena imana dekenai lau atoa.”
12 Bena Iosepa be ia dekenai ia gwau: “Emu nihi ena anina be inai: Rigi toi be dina toi.
13 Hari amo ela bona dina ihatoina ai, Farao ese oi do ia ruhaia bona oi dekenai emu dagi do ia henia lou.+ Bona oi ese Farao ena kapusi be iena imana dekenai do oi atoa, guna iena wain oi bubua neganai oi karaia bamona.+
14 To oi totona gau ibounai idia lao namonamo neganai, lau oi laloatao be namo. Mani lau dekenai lalokau* oi hahedinaraia bona Farao dekenai lau oi gwauraia, inai gabu amo lau raka-lasi totona.
15 Badina lau be Heberu taudia edia tano amo idia henaoa.+ Bona iniseniai kerere ta lau karaia lasi, to dibura ruma* ai lau idia atoa.”+
16 Paraoa gabua taudia edia biaguna ia itaia Iosepa ese nihi ena anina namona ia gwauraia neganai, ia danu be Iosepa dekenai ia gwau: “Lau danu lau nihi, bona egu kwarana latanai paraoa kurokuro bosea toi idia noho,
17 bona ataiai ia noho bosea lalonai gabua paraoa idauidau idia noho, unai be Farao ena, bona manu ese unai bosea lalonai idia noho gaudia idia ania.”
18 Bena Iosepa ia gwau: “Emu nihi ena anina be inai: Bosea toi be dina toi.
19 Hari amo ela bona dina ihatoina ai, Farao ese emu kwarana do ia utua oho bona au ta dekenai oi do idia tauadae, bena manu ese emu hidio do idia ania.”+
20 Vadaeni dina ihatoina be Farao ena vara dinana,+ bona ena hesiai taudia ibounai totona aria ia karaia, bona ena hesiai taudia edia vairanai wain bubua taudia edia biaguna bona paraoa gabua taudia edia biaguna ia abia raka-lasi.
21 Bona wain bubua taudia edia biaguna dekenai ena wain bubua gaukarana ia henia lou, bona ia ese Farao dekenai kapusi henia gaukarana ia karaia noho.
22 To paraoa gabua taudia edia biaguna ia tauadae, Iosepa ese nihi ena anina idia dekenai ia gwauraia hegeregerena.+
23 To, wain bubua taudia edia biaguna ese Iosepa ia laloatao lasi, ia laloaboio.+
