Dahaka Dainai Iehova Ena Witnes Taudia be Tuari ai Idia Vareai Lasi?
Iehova ena Witnes taudia be tuari ai idia vareai lasi ena badina:
Dirava idia badinaia. Baibel ia gwau Dirava ena hesiai taudia be “edia tuari kaia be tano geia gaudia ai do idia halaoa” bona “tuari do idia dibaia lou lasi.”—Isaia 2:4.
Iesu idia badinaia. Iesu ese aposetolo Petero ia hamaoroa: “emu tuari kaia be ena gabu dekenai oi atoa lou, badina tuari kaia idia gaukaralaia taudia ibounai be tuari kaia amo do idia mase.” (Mataio 26:52) Iesu ese ia hahedinaraia ena murina idia raka taudia be tuari gaudia idia dogoatao lasi.
Iesu ena hahediba taudia be politikol karadia amo idia gini siri, unai amo Iesu ena taravatu idia badinaia, idia be “tanobada ena lasi.” (Ioane 17:16) Ami gaukaradia dekenai protest idia karaia lasi bona ami gaukara idia ura karaia taudia idia koua lasi.
Ma haida idia lalokau henia. Iesu ese ena hahediba taudia ia hagania “umui lalokau heheni.” (Ioane 13:34, 35) Tanobada hegegemadai tadikaka oreana ta idia havaraia bona edia tadikaka bona taihu ida tuari do idia karaia diba lasi.—1 Ioane 3:10-12.
Keristani taudia ginigunadia edia haheitalai. Encyclopedia of Religion and War ia gwau: “Iesu ena murina idia raka taudia ginigunadia be tuari bona ami gaukara idia dadaraia,” idia laloparara unai kara be “Iesu ena hahediba herevadia ida do ia tamona lasi, hegeregere, lalokau bona emu inai henia tauna lalokau henia.” Unai hegeregerena, tomadiho diba bada German tauna ta Peter Meinhold ese Iesu ena hahediba taudia ginigunadia ia herevalaia neganai, ia gwau: “Bema ta be Keristani tauna ta, ami gaukara do ia karaia be hegeregere lasi mommokani.”
Komiuniti idia durua
Iehova ena Witnes taudia be edia komiuniti dekenai heduru idia henia bona edena tano dekenai idia noho neganai tano ena noho namona bona maino idia hadikaia lasi. Gavamani ai mai ena siahu taudia ai matauraia, henunai ia noho Baibel ena taravatu hegeregerena:
“Namona be...gavamani henunai do idia noho.”—Roma 13:1.
“Kaisara ena gaudia be Kaisara dekenai umui henia, to Dirava ena gaudia be Dirava dekenai umui henia.”—Mataio 22:21.
Unai dainai taravatu ai badinaia, takisi moni ai henia, bona gavamani ese taunimanima durua totona ia karaia gaukaradia ai durua.
Reana Inai Danu Oi Ura
Momo Edia Henanadai
Dahaka Dainai Iehova Ena Witnes Taudia be Politikol amo Idia Gini Siri?
Politikol amo idia gini siri karana ese tano ta ena maino ia hadikaia, a?
