Tub Txib Tes Hauj Lwm 22:1-30
22 “Cov kwv tij thiab cov uas yog txiv tsev, thov nej mloog kuv hais tso.”
2 Thaum lawv hnov nws hais lus Henplais rau lawv ces lawv thiaj ntsiag tas ua twj ywm mloog. Nws hais rau lawv tias,
3 “Kuv yog neeg Yudais, kuv yug hauv lub nroog Thaxas, xeev Xilixias. Kamali-ees yog tus xib hwb qhia ntawv rau kuv hauv lub nroog no ntag. Kuv kawm paub txhua nqe thiab coj raws li Mauxes Txoj Kev Cai uas peb poj koob yawm txwv ib txwm coj. Kuv yeej kub siab lug ua Vajtswv tes hauj lwm ib yam li nej.
4 Kuv tsim txom cov uas coj tus Tswv Txoj Kev Cai. Tsis hais poj niam txiv neej los kuv ntes coj mus kaw hauv tsev loj cuj tib si thiab muab lawv tua pov tseg.
5 Tus tuam pov thawj hlob thiab cov kev txwj laus neeg puav leej ua tau tim khawv txog tej no. Kuv thov ntawv tso cai ntawm lawv nqa mus rau cov thawj coj Yudais hauv lub nroog Damaxakas. Kuv thiaj npaj mus ntes cov ntseeg hauv lub nroog ntawd thiab muab lawv khi cab los rau txim hauv Yeluxalees.
6 “Tiam sis thaum kuv mus yuav txog Damaxakas, kwv lam tav su, txawm muaj duab tshav ntuj ci dawb paug saum ntuj tuaj vij nkaus kuv.
7 Kuv thiaj ntog kiag rau hauv pem teb, thiab hnov ib lub suab hais rau kuv tias, ‘Xolaus’os, Xolaus’e, koj tsim txom kuv ua dab tsi?’
8 Kuv thiaj nug tias, ‘Tus Tswv, koj yog leej twg?’ Nws teb tias, ‘Kuv yog Yexus tus neeg Naxales, tus uas koj tsim txom ntag.’
9 Cov txiv neej uas nrog kuv ua ke pom tus duab tshav ntuj tiam sis lawv tsis hnov lub suab uas hais lus rau kuv.
10 Kuv thiaj nug tias, ‘Tus Tswv, kuv yuav ua li cas?’ Tus Tswv teb kuv tias, ‘Cia li sawv tsees mus rau hauv Damaxakas mas yuav muaj neeg qhia txhua yam uas koj yuav tsum tau ua.’
11 Tus duab ntawd ci kawg nkaus li, ua rau kuv tsis pom kev lawm. Cov uas nrog kuv thiaj cab kuv tes coj kuv mus rau hauv lub nroog Damaxakas.
12 “Muaj ib tug yawg hu ua Ananias uas hwm Vajtswv thiab coj raws li Mauxes Txoj Kev Cai. Cov Yudais uas nyob hauv lub nroog ntawd yeej qhuas txog nws.
13 Nws txawm tuaj saib kuv. Nws los sawv ntawm kuv thiab hais tias, ‘Kwv tij Xolaus’e, cia li rov pom kev!’ Tam sim ntawd, kuv tsa hlo qhov muag saib ua ciav kuv txawm pom nws lawm.
14 Nws hais rau kuv tias, ‘Peb cov yawg koob tus Vajtswv tau xaiv koj ua tus paub tej uas nws lub siab nyiam, thiab kom koj pom tus uas ncaj ncees thiab hnov nws lub suab.
15 Nws xaiv koj ua tim khawv qhia rau txhua leej txhua tus txog tej uas koj tau hnov thiab tau pom.
16 Koj tseem tos dab tsi? Cia li sawv tsees ua kev cai raus dej, thiab tuav Yexus lub npe thov, Vajtswv thiaj zam koj tej kev txhaum.’
17 “Tiam sis thaum kuv rov los rau hauv Yeluxalees thiab tseem tab tom thov Vajtswv hauv lub tuam tsev, kuv ua yog toog
18 pom nws hais rau kuv tias, ‘Cia li tawm hauv Yeluxalees mus tsuag tsuag, rau qhov lawv yuav tsis mloog tej uas koj ua tim khawv txog kuv.’
19 Kuv thiaj hais tias, ‘Tus Tswv, lawv yeej paub tias yav tas los kuv mus ib lub tsev pe hawm rau ib lub, mus ntes cov uas ntseeg koj thiab muab lawv nplawm.
20 Thaum lawv muab Xatefanaus uas yog koj ib tug tim khawv tua, kuv yeej pom zoo thiab. Kuv sawv ntawd zov cov neeg uas tua nws tej tsho.’*
21 Tiam sis nws hais rau kuv tias, ‘Cia li mus, rau qhov kuv yuav txib koj mus rau lwm haiv neeg uas nyob deb heev.’”
22 Thaum lawv mloog nws hais tas lawv txawm qw nrov nrov tias, “Tsim nyog muab tus neeg zoo li no tua pov tseg!”
23 Lawv qw nrov heev, muab lawv tej tsho* cuam rau ub rau no, thiab tsuab hmoov av w rau saum ntuj.
24 Tus thawj tub rog* thiaj hais kom coj Povlauj los rau hauv lub yeej thiab muab nws nplawm xwv thiaj nug tau tias yog tim li cas cov tib neeg yuav tawm tsam nws heev ua luaj.
25 Tiam sis thaum lawv muab Povlauj khi yuav muab nws nplawm, nws hais rau tus thawj tub rog* uas sawv ntawd tias, “Puas raug cai rau nej nplawm ib tug neeg Loos uas tsis tau taug nws zaj?”
26 Thaum nws hnov li ntawd nws thiaj mus hais rau tus thawj tub rog* tod tias, “Yuav ua li cas? Rau qhov tus yawg no yog ib tug neeg Loos.”
27 Tus thawj tub rog tod thiaj los hais rau Povlauj tias, “Qhia kuv soj, koj yog neeg Loos lod?” Povlauj teb tias, “Yog.”
28 Tus thawj tub rog* teb tias, “Kuv them nyiaj kim heev kuv thiaj tau los ua neeg Loos hod.” Povlauj teb tias, “Tiam sis kuv yeej yug los ua neeg Loos.”
29 Tam sim ntawd, cov txiv neej uas tab tom yuav thom thiab yuav nplawm Povlauj txawm thaub ncho lawm. Tus thawj tub rog* kuj pib ntshai thiab, rau qhov Povlauj yog neeg Loos tiam sis nws twb muab saw hlau khi Povlauj lawm.
30 Nws xav paub tseeb tias vim li cas cov Yudais yuav tawm tsam Povlauj ua luaj. Hnub tom qab, nws thiaj kom muab tej saw hlau uas khi Povlauj daws thiab kom cov pov thawj hlob thiab tag nrho lub rooj Xahenrees* tuaj txoos ua ke. Nws thiaj coj Povlauj los sawv tab meeg sawv daws.
Cov taw ntawv
^ Yog lub tsho sab nraud los sis yog daim ntaub vas. Mus saib Cov Lus Txhais.
^ Yog lub tsho sab nraud los sis yog daim ntaub vas. Mus saib Cov Lus Txhais.
^ Uas yog tus kav 1,000 tus tub rog.
^ Uas yog tus kav 100 tus tub rog.
^ Uas yog tus kav 1,000 tus tub rog.
^ Uas yog tus kav 1,000 tus tub rog.
^ Uas yog tus kav 1,000 tus tub rog.
^ Mus saib Cov Lus Txhais.
