Mathais Sau 28:1-20
28 Hnub* tom qab hnub Xanpataus, thaum kaj ntug txoog, Maivliag Madalas thiab tus Maivliag i txawm mus saib Yexus lub qhov ntxa.
2 Thaum Vajtswv Yehauvas* tus tub txib saum ntuj nqes los, av txawm qeeg loj heev. Nws muab daim lag zeb uas npog lub rooj ntxas dov rau ib cag ces nws txawm zaum kiag saud.
3 Nws ci cuag xob laim thiab nws cev tsoos dawb paug li daus.
4 Thaum cov neeg uas zov ntxa pom li no, lawv ntshai tshee hnyo ib ce txhav tag.
5 Tus tub txib saum ntuj thiaj hais rau ob tug poj niam tias, “Txhob ntshai, kuv paub tias neb tuaj nrhiav Yexus tus uas raug tua saum ncej ntoo.
6 Yexus twb ciaj sawv rov los li nws hais tseg lawm. Los saib nws lub chaw seb! Nws tsis nyob no lawm.
7 Cia li mus qhia nws cov thwj tim tias nws twb ciaj sawv rov los lawm tiag! Nws yuav ua nej ntej mus rau pem Kalilais. Nej yuav ntsib nws ped. Nco ntsoov kuv tej lus no.”
8 Ob tug poj niam ntawd thiaj tawm nrawm nroos ntawm lub qhov ntxa mus qhia Yexus cov thwj tim. Nkawd ntshai los ntshai, zoo los zoo siab!
9 Ua ciav Yexus txawm ntsib nkawd thiab hais tias, “Neb nyob li cas?” Nkawd thiaj los txhos caug ntua ntawm Yexus thiab tuav nkaus nws ko taw hawm nws.
10 Yexus hais rau nkawd tias, “Txhob ntshai! Cia li mus qhia tej no rau kuv cov kwv tij paub, kom lawv mus rau pem Kalilais ces lawv yuav ntsib kuv ped.”
11 Thaum nkawd mus lawd, cov uas zov ntxa ib txhia txawm mus rau hauv nroog mus qhia txhua yam uas lawv pom rau cov pov thawj hlob.
12 Tom qab ntawd, cov pov thawj hlob thiaj mus nrog cov txwj laus sab laj. Thaum lawv hais haum, lawv thiaj muab nyiaj xiab cov tub rog
13 hais tias, “Hais li no, ‘Thaum ib tag hmo peb tsaug zog tas, nws cov thwj tim tuaj nyiag nws lub cev mus lawm.’
14 Nej tsis tas txhawj. Yog tus tswv xeev hnov txog tej no ces peb mam li nrog nws hais.”
15 Cov tub rog thiaj txais tej nyiaj ntawd thiab ua raws li lawv hais. Zaj no txawm nrov ncha mus rau cov neeg Yudais los txog niaj hnub nim no.
16 Ces 11 tug thwj tim txawm mus pem Kalilais mus ntsib Yexus saum lub roob uas nws tau teem tseg lawd.
17 Thaum lawv pom dheev Yexus, lawv txhos caug ntua hawm nws. Tiam sis tej tug tseem ua xyem xyav.
18 Yexus thiaj hais rau lawv tias, “Vajtswv twb pub hwj chim rau kuv saib xyuas ib puas tsav yam saum ntuj thiab hauv ntiaj teb no lawm.
19 Yog li ntawd, cia li mus coj txhua haiv neeg los ua kuv cov thwj tim. Muab cov uas txais yuav* Leej Txiv, Leej Tub, thiab lub hwj huam dawb huv ua kev cai raus dej.
20 Qhia kom lawv coj raws li tej uas kuv twb sam hwm rau nej lawd. Nco ntsoov, kuv yuav nrog nraim nej mus txog thaum lub sim ceeb* no kawg.”
Cov taw ntawv
^ Lus Kilis yog “Thawj hnub rau lub lim tiam.” Nim no yog Hnub 7.
^ Mus saib Cov Lus Txhais.
^ Lus Kilis yog “tuav Leej Txiv, Leej Tub, thiab lub hwj huam dawb huv lub npe ua kev cai raus dej.” Hauv nqe no, “tuav npe” txhais tias yus lees yuav Leej Txiv thiab Leej Tub. Yus kuj lees tias Vajtswv siv nws lub hwj huam dawb huv ua kom txhua yam muaj tiav raws li nws lub siab nyiam.
^ Los sis “caij nyoog.” Mus saib Cov Lus Txhais.
