Malakaus Sau 7:1-37
7 Cov Falixais thiab cov xib hwb* uas tuaj nram Yeluxalees tuaj txawm los rau ntawm Yexus.
2 Lawv pom Yexus cov thwj tim ib txhia tes tsis huv es cia li noj mov. Qhov no yog lawv tsis ntxuav tes raws kev cai.
3 (Cov Falixais thiab cov Yudais yeej tuav rawv lawv cov yawg koob tej kev cai. Ua ntej noj mov, lawv yuav tsum ntxuav tes txij ntawm luj tshib los mas thiaj huv.
4 Thaum lawv mus kav kiab kav khw los, lawv yuav tsum ua kev cai ntxuav tso mam noj mov. Tseem muaj ntau txoj kev cai uas lawv tau kawm thiab coj nruj heev, xws li muab tej khob, tej tais, tej lauj kaub toog raus dej ua kev cai ntxuav huv si.)
5 Cov Falixais thiab cov xib hwb thiaj nug Yexus tias, “Ua cas koj cov thwj tim ho hla peb yawg koob tej kev cai, tes tsis huv los cia li noj mov?”
6 Yexus teb lawv tias, “Cov niag neeg siab nkhaus,* yeej tsim nyog rau Yaxayas hais txog nej lawm tias, ‘Cov neeg no hwm kuv ntawm lub ncauj xwb, tiam sis lawv lub siab tsis npuab kuv kiag li.
7 Qhov uas lawv pe hawm kuv tsis muaj qab hau, rau qhov lawv muab neeg tej kev cai los qhia ib yam li yog kuv tej.’
8 Nej hla Vajtswv tej kev cai, tiam sis nej ho tuav rawv neeg tej.”
9 Yexus hais ntxiv rau lawv tias, “Nej muaj tswv yim diam, nej muab Vajtswv tej lus sam hwm ntxeev kom nej tau coj nej tej kev cai xwb.
10 Mauxes twb qhia lawm tias, ‘Hwm koj niam koj txiv,’ thiab, ‘Cia li muab tus uas foom nws niam nws txiv tua pov tseg.’
11 Tiam sis nej ho qhia dua ib zaj tias, ‘Yog ib tug yawg twb muab nws tej qhov txhia chaw pub rau Vajtswv lawm, tsis tas nws muab tej ntawd los pab nws niam nws txiv.’
12 Yog nej qhia li no ces twb yog nej txwv tsis pub tus ntawd pab nws niam nws txiv ib yam dab tsi li.
13 Tej kev cai uas nej qhia ib tiam dhau ib tiam li no, ua saib tsis taus Vajtswv tej kev cai lawm. Nej ua ntau yam zoo li no.”
14 Ces Yexus txawm hu cov neeg coob coob rov los rau ntawm nws thiab hais tias, “Nej sawv daws ua tib zoo mloog kuv hais, nej thiaj txais raug lub ntsiab.
15 Tsis yog yam uas nkag hauv neeg lub qhov ncauj mus ua rau neeg qias tsis huv, tiam sis yog yam uas tawm hauv neeg lub qhov ncauj los thiaj ua rau neeg qias tsis huv xwb.”
16 *——
17 Thaum Yexus mus deb zog ntawm cov neeg coob coob thiab mus rau hauv ib lub tsev lawm, nws cov thwj tim txawm los nug kom nws txhais cov lus piv txwv ntawd.
18 Nws thiaj hais rau lawv tias, “Nej txais tsis raug lub ntsiab ib yam li lawv thiab lod? Nej tsis paub tias yam uas nkag rau neeg lub qhov ncauj ua tsis tau kom neeg qias tsis huv lod?
19 Yam uas poob rau hauv lub plab tsis zoo li yam uas poob rau hauv lub siab. Tej uas poob rau hauv lub plab tsuas tawm mus lawm xwb.” Yog li, Yexus tus nru lus qhia tias txhua yam zaub mov yeej huv tib si.
20 Yexus hais ntxiv tias, “Yam uas tawm hauv neeg lub qhov ncauj los thiaj ua rau neeg qias tsis huv.
21 Rau qhov yam uas tawm hauv neeg lub siab los yog kev xav phem, kev nkauj kev nraug,* kev tub sab tub nyiag, kev tua neeg,
22 kev deev luag poj luag txiv,* kev siab hlob, kev lim hiam, kev dag ntxias, kev ua vuab tsuab tsis paub txaj muag li, kev khib xeeb, hais lus tuam mom Vajtswv, kev khav theeb, thiab lub siab ruam.
23 Tag nrho tej kev phem no tawm hauv neeg lub siab los thiab ua rau neeg tsis huv.”
24 Yexus txawm sawv kev mus rau pem cheeb tsam Thailab thiab Xaidoos. Nws nkag mus rau hauv ib lub tsev kom txhob muaj neeg paub, tiam sis nws nraim tsis tau li.
25 Txawm muaj ib tug poj niam uas nws tus me ntxhais raug dab* hnov txog Yexus. Tam sim ntawd, nws tuaj khwb nkaus ntawm Yexus ko taw.
26 Tus poj niam ntawd yog neeg Kilis. Nws yug hauv Finixias nyob xeev Xilias. Nws pheej thov Yexus kom ntiab tus dab hauv nws tus me ntxhais tawm mus.
27 Tiam sis Yexus hais rau tus poj niam tias, “Cia cov me nyuam noj mov kom tsau tso. Tsis tsim nyog muab me nyuam tej mov pov rau me nyuam aub noj.”
28 Tus poj niam thiaj teb Yexus tias, “Yawg hlob, yog li koj hais los mas, tiam sis tej me nyuam aub hauv qab rooj los tseem tau noj tej mov uas me nyuam ua txeej thiab.”
29 Yexus txawm hais rau nws tias, “Vim koj cov lus ko, tus dab twb tawm hauv koj tus me ntxhais mus lawm. Cia li mus tsev.”
30 Ces tus poj niam rov loo mus tsev pom nws tus me nyuam pw saum txaj. Tus dab twb tawm mus lawm tiag.
31 Thaum Yexus tawm hauv Thailab mus, nws hla Xaidoos, mam nqes los rau Dekapaulis* hla mus rau nram Hiav Txwv Kalilais.
32 Lub sij hawm ntawd,* lawv coj ib tug yawg lag ntseg uas hais lus txhav txhav tuaj cuag Yexus. Lawv thov kom Yexus tsa tes npuab nws kom nws zoo.
33 Yexus thiaj coj tus yawg ntawd ib leeg mus rau lwm qhov kom nrug deb cov neeg coob coob. Yexus muab ntiv tes ntsaws tus yawg ntawd ob lub qhov ntsej thiab nto qaub ncaug tas ces kov nws tus nplaig.
34 Yexus txawm tsa muag ntsia saum ntuj, xyu ib suab thiab hais rau tus yawg ntawd tias, “Efathas.” Lo lus ntawd txhais tias, “Cia li qhib plho.”
35 Tam sim ntawd nws ob lub qhov ntsej cia li qhib plho, thiab nws txawm hais lus tsis txhav lawm.
36 Yexus txwv kom lawv txhob qhia tej no rau leej twg li. Tiam sis nws yim huab txwv, lawv yim huab qhia xwb.
37 Cov tib neeg xav tsis thoob li, lawv thiaj qhuas tias, “Nws ua tau txhua yam zoo huv si. Txawm cov lag ntseg thiab cov hais tsis tau lus los nws kho zoo tib si.”
Cov taw ntawv
^ Los sis “xib hwb qhia Vajtswv kev cai.” Mus saib Cov Lus Txhais.
^ Los sis “Cov niag neeg ncauj lus zoo siab phem.”
^ Tej phau Vajlugkub kuj muaj nqe no, tiam sis cov ntawv Kilis uas qub tshaj tsis pom muaj.
^ Lus Kilis yog “phauni-as.” Mus saib Cov Lus Txhais.
^ Lo lus Kilis hais txog tus uas muaj txij nkawm tiam sis mus deev lwm tus. Mus saib Cov Lus Txhais.
^ Lus Kilis yog “ib tug plig tsis huv.” Mus saib lo lus “Dab” hauv Cov Lus Txhais.
^ Los sis “kaum lub nroog.”
^ Uas yog thaum Yexus tseem nyob hauv Dekapaulis.
