Lukas Sau 19:1-48
19 Ces Yexus nkag mus rau hauv Yelikaus thiab yuav hla dhau plaws mus.
2 Muaj ib tug yawg npe hu ua Xakhais kuj tuaj ntawd thiab. Nws yog ib tug thawj sau se uas nplua nuj heev.
3 Xakhais xav xav pom Yexus, tiam sis muaj tib neeg coob heev thaiv tas, nws tsis pom rau qhov nws qig taub.
4 Xakhais thiaj khiav ceev nrooj mus nce ib tsob ntoo* rau qhov Yexus tseem tab tom yuav dhau txoj kev ntawd mus.
5 Thaum Yexus mus txog ntawd, nws tsa muag pom Xakhais thiab hais tias, “Xakhais, kav tsij nqes los. Hnub no kuv yuav mus so tom koj tsev.”
6 Xakhais txawm nqes los tam sid, thiab nws zoo siab hlo tos txais Yexus mus rau hauv nws tsev.
7 Thaum sawv daws pom li ntawd, lawv txawm yws zom zaws tias, “Ua cas nws tseem mus so hauv niag neeg txhaum ntawd lub tsev thiab?”
8 Tiam sis Xakhais sawv tsees hais rau Tus Tswv tias, “Tus Tswv, koj saib kuv tej qhov txhia chaw. Kuv yuav muab ib nrab coj mus pab rau cov txom nyem. Thiab tej uas kuv tau ntxo lwm tus lawd kuv yuav them plaub npaug rov qab.”
9 Yexus thiaj hais rau Xakhais tias, “Hnub no Vajtswv cawm tsev neeg no lawm, rau qhov nws kuj yog Anplahas ib tug xeeb ntxwv thiab.
10 Twb yog neeg Leej Tub los nrhiav thiab cawm cov uas yuam kev* lawd.”
11 Thaum cov tib neeg tab tom mloog Yexus qhia, nws piav dua ib zaj lus piv txwv, rau qhov lawv twb mus yuav txog Yeluxalees thiab cov tib neeg vam tias lawv yuav pom Vajtswv txoj kev kav* tam sid.*
12 Yexus thiaj piav tias, “Muaj ib tug yawg noob nom noob tswv yuav sawv kev mus rau ib lub teb chaws deb deb. Nws yuav mus kom luag muab nws tsa ua vaj ntxwv tso nws mam rov los.
13 Tus yawg ntawd thiaj hu kaum tus tub qhe los. Nws muab kaum minas* rau lawv thiab hais rau lawv tias, ‘Coj cov nyiaj no mus ua luam mus txog hnub kuv rov los.’
14 Tiam sis laj mej pej xeem ntxub nws thiab txib neeg mus raws nws qab thiab hais tias, ‘Peb tsis xav kom koj ua vaj ntxwv kav peb.’
15 “Thaum nws tau ua vaj ntxwv thiab rov los txog tsev lawd, nws txawm hu cov tub qhe uas nws muab nyiaj rau los cuag nws, seb lawv coj mus ua luam tsam ntau npaum li cas.
16 Thawj tug thiaj los hais tias, ‘Yawg hlob, saib koj muab ib minas rau kuv, kuv coj mus ua luam tsam kaum minas ntxiv.’
17 Nws thiaj hais rau tus tub qhe tias, ‘Koj yog ib tug tub qhe uas ua tau zoo heev. Koj twb ua tau ncaj rau tej yam me me no, kuv yuav tsa koj ua tus kav kaum lub nroog.’
18 Tus ob thiaj los hais tias, ‘Yawg hlob, koj muab ib minas rau kuv, kuv coj mus ua luam tsam tau tsib minas ntxiv.’
19 Nws kuj hais rau tus no tias, ‘Kuv yuav muab tsib lub nroog rau koj kav.’
20 Tiam sis muaj ib tug los hais tias, ‘Yawg hlob, ib minas uas koj muab rau kuv, kuv muab qhwv zoo zoo zais cia xwb.
21 Twb yog kuv ntshai koj rau qhov koj yog ib tug neeg nyaum heev. Koj muab tej nyiaj uas tsis yog koj tseg cia, koj sau tej uas tsis yog koj cog.’
22 Nws hais rau tus tub qhe tias, ‘Niag qhev phem, kuv mam txiav txim rau koj raws li koj cov lus. Koj paub kawg yom, koj nim hais tias kuv yog neeg nyaum heev es kuv muab tej nyiaj uas tsis yog kuv tseg cia, thiab sau tej uas tsis yog kuv cog, yod?
23 Vim li cas koj ho tsis muab kuv cov nyiaj coj mus tso rau tom txhab es thaum kuv rov qab los kuv thiaj tau me ntsis paj?’
24 “Nws thiaj hais rau cov uas sawv ntawd tias, ‘Cia li muab minas ntawm tus niag qhev ntawd mus rau tus uas tau kaum minas.’
25 Tiam sis lawv hais rau nws tias, ‘Yawg hlob, nws twb tau kaum minas diam ne?’
26 Nws teb lawv tias, ‘Kuv hais rau nej li no, txhua tus uas muaj tseem yuav muab rau nws ntxiv. Tiam sis tus uas tsis muaj, txawm nws muaj me ntsis xwb los yuav muab rho ntawm nws mus.
27 Tsis tas li ntawd, cia li muab cov yeeb ncuab uas tsis lees yuav kuv ua vaj ntxwv los tua kiag ntawm no rau kuv saib.’”
28 Tom qab Yexus hais tej no tas, lawv txawm sawv kev mus rau Yeluxalees.
29 Thaum Yexus mus yuav txog lub zos Npefantsis thiab Npethanis ntawm lub Roob Txiv Aulib, nws txawm txib nws ob tug thwj tim
30 tias, “Cia li mus rau lub zos tom hauv ntej. Thaum mus txog, neb yuav pom ib tug me nyuam nees luav khi cia, tsis tau muaj neeg caij dua li. Neb muab daws cab los rau kuv.
31 Tiam sis yog leej twg nug neb tias, ‘Neb daws mus ua dab tsi?’ Cia li teb tias, ‘Tus Tswv yuav siv.’”
32 Ob tug thwj tim txawm mus pom ib tug me nyuam nees luav raws li Yexus tau hais.
33 Thaum nkawd tab tom daws tus me nyuam nees luav, tus tswv nug nkawd tias, “Neb daws mus ua dab tsi?”
34 Nkawd teb tias, “Tus Tswv yuav siv.”
35 Nkawd thiaj cab los rau Yexus. Lawv hle tsho* pua tus me nyuam nees luav rau Yexus caij.
36 Thaum Yexus caij tus me nyuam nees luav mus, lawv hle lawv tej tsho* los pua kev.
37 Thaum nws los yuav txog txoj kev uas nqes saum lub Roob Txiv Aulib los, tag nrho cov thwj tim xyiv fab kawg li. Lawv tsa suab hlo qhuas Vajtswv rau qhov lawv tau pom ntau yam txuj ci tseem ceeb.
38 Lawv qhuas tias, “Tus uas tuav Vajtswv Yehauvas* lub npe los ua Vaj Ntxwv yog tus uas tau koob hmoov nplua mias! Thov kom Vajtswv thiab peb noob neej sib raug zoo thiab thov cia Vajtswv tau koob meej saum ntuj uas siab kawg nkaus!”
39 Cov Falixais uas nrog cov neeg coob coob ntawd thiaj hais rau Yexus tias, “Xib Hwb, txwv koj cov thwj tim maj.”
40 Tiam sis Yexus teb lawv tias, “Kuv qhia rau nej tias, yog lawv ua twj ywm ces tej pob zeb yuav quaj qw.”
41 Thaum Yexus los yuav txog lub nroog Yeluxalees, nws saib lub nroog mas ua rau nws los kua muag kawg li.
42 Yexus hais tias, “Kheev lam nej nkag siab tej uas yuav pab kom nej nyob sib haum xeeb, tiam sis nim no twb muab tej ntawd npog cia, tsis pub rau nej paub lawm.
43 Muaj ib hnub ces nej cov yeeb ncuab yuav tuaj txhua ceg kaum tuaj ua ntsa loog vij nej thiab puav nkaus nej.
44 Lawv yuav muab nej thiab nej cov me nyuam tsuj pes ntiag rau hauv pem teb puas tsuaj tas. Lawv yuav ua rau tej pob zeb no pluam tas nyias nyob nyias, vim Vajtswv twb los txiav txim* rau nej, tiam sis nej tsis paub li.”
45 Thaum Yexus mus rau hauv lub tuam tsev, nws txawm muab cov tub lag tub luam ntiab tib si tawm.
46 Nws hais rau lawv tias, “Vajtswv Txoj Lus twb hais tias, ‘Kuv lub tsev yuav yog qhov chaw thov Vajtswv.’ Tiam sis nej ho muab ua chaw rau tub sab nkaum.”
47 Yexus niaj hnub mus qhia ntawm lub tuam tsev. Tiam sis cov pov thawj hlob, cov xib hwb,* thiab cov Yudais tej thawj coj nrhiav nrhw kev muab nws tua pov tseg.
48 Txawm li ntawd los lawv ua tsis tau li cas rau Yexus rau qhov cov tib neeg dai lias nws xav mloog nws qhuab qhia.
Cov taw ntawv
^ Tsob ntoo cev no hu ua xikamos.
^ Los sis “ploj.”
^ Lus Kilis yog “lub Nceeg Vaj.” Mus saib Cov Lus Txhais.
^ Los sis “lawv yuav pom Vajtswv lub Nceeg Vaj tshwm plaws tam sid.”
^ Tsis yog ib lub nyiaj, tiam sis cov Kilis suav tias ib minas hnyav li 340 nkas, thiab raug nqi li 100 damas. Yuav tsum khwv peb lub hlis mam tau ib minas.
^ Yog lub tsho sab nraud los sis yog daim ntaub vas. Mus saib Cov Lus Txhais.
^ Yog lub tsho sab nraud los sis yog daim ntaub vas. Mus saib Cov Lus Txhais.
^ Mus saib Cov Lus Txhais.
^ Lus Kilis yog “los tshuaj nej.”
^ Los sis “xib hwb qhia Vajtswv kev cai.” Mus saib Cov Lus Txhais.
