1, 2. (1) Thaum txog hnub Pheethekhoxate xyoo 33, tau muaj li cas? (2) Leejtwg tau los ua Vajtswv haiv neeg tshiab? (Saib daim duab ntawm sab no.)

THAUM txog hnub Pheethekhoxate xyoo 33, Yehauvas tau xaiv ib haiv neeg tshiab los ua “cov tseem Yixayee,” lossis cov Yixayee ntawm sab kev ntseeg. (Kalatia 6:16) Yehauvas tau pub lub hwj huam dawb huv rau cov uas nws xaiv los ua nws haiv neeg. Povlauj sau tias cov uas Vajtswv xaiv tshiab ntawd, tsis tas ua kevcai txiav li Aplahas cov xeeb ntxwv lawm. Tiamsis lawv yuav tsum “ua kevcai txiav . . . hauv lub siab” raws li lub hwj huam dawb huv.​—Loos 2:29.

² Vajtswv xub xaiv Yexus cov tubtxib thiab muaj li 100 tawm leej thwjtim los ua Nws haiv neeg tshiab. Lawv tau mus rau hauv lub nroog Yeluxalees, mus sib txoos rau ib txheej tsev sab saud. Thaum ntawd Vajtswv txawm pub nws lub hwj huam dawb huv rau lawv, qhov ntawd yog nws xaiv lawv ua nws cov menyuam. (Tubtxib Tes Haujlwm 1:12-15; Loos 8:15, 16; 2 Khaulee 1:21) Tej no ua pov thawj tias Vajtswv tau txais tus nqe txhiv uas Yexus Khetos them rau nws lawm. Txij hnub ntawd los, cov lus cog tseg tshiab hloov Mauxe Txoj Kevcai lawm. (Luka 22:20; nyeem Henplais 9:15.) Cov xaiv tseg thiaj tau los ua Yehauvas haiv neeg tshiab. Lub hwj huam dawb huv pab lawv txawj lwm haiv neeg tej lus. Lawv kuj txawj qhia lwm tus txog Vajtswv tes haujlwm zoo kawg nkaus thiab.​—Tubtxib Tes Haujlwm 2:1-11.

3-5. (1) Hnub Pheethekhoxate, Petus hais li cas rau cov Yudai? (2) Vajtswv haiv neeg tshiab huam vam li cas?

³ Yehauvas xub caw leejtwg los ua nws haiv neeg tshiab? Nws txib kom Petus mus caw cov neeg Yudai thiab lwm haiv neeg uas coj Yudai kevcai. Hnub Pheethekhoxate Petus cia li hais hlo rau cov neeg Yudai tias lawv muab Yexus tua pov tseg lawm, tiamsis nimno lawv yuav tsum lees Yexus ua lawv “tus Tswv thiab ua tus Khetos.” Thaum cov tibneeg nug Petus tias lawv yuav tsum hloov li cas, Petus teb tias: “Cia li ntxeev dua siab tshiab thiab txhua tus ua kevcai raus dej hauv Yexus Khetos lub npe kom thiaj daws tau nej lub txim, mas nej yuav tau txais [lub hwj huam] dawb huv uas Vajtswv pub.” (Tubtxib Tes Haujlwm 2:22, 23, 36-38) Hnub ntawd thiaj muaj 3,000 leej ua kevcai raus dej los ua Vajtswv haiv neeg Yixayee ntawm sab kev ntseeg. (Tubtxib Tes Haujlwm 2:41) Tom qab ntawd, cov tubtxib mob siab tshaj tawm tsis tu ncua thiaj coj tau coob leej los ntseeg qhov tseeb. (Tubtxib Tes Haujlwm 6:7) Vajtswv haiv neeg tsuas huam vam coob zuj zus ntxiv xwb.

⁴ Tom qab no, Yexus cov thwjtim mam li mus tshaj tawm rau cov neeg Xamali. Cov Xamali coob tus kuj los ntseeg qhov tseeb thiab ua kevcai raus dej, tiamsis lawv tsis tau txais Vajtswv lub hwj huam dawb huv. Cov laus neeg uas ntaus thawj nyob hauv Yeluxalees, thiaj txib Petus thiab Yauhas mus xyuas cov kwvtij Xamali uas los ntseeg tshiab ntawd. Thaum Petus nkawd tsa tes npuab cov kwvtij, ua ciav lawv txawm tau “txais [lub hwj huam] dawb huv.” (Tubtxib Tes Haujlwm 8:5, 6, 14-17) Cov Xamali ntawd thiaj muaj feem nrog cov xaiv tseg los ua Vajtswv haiv neeg Yixayee ntawm sab kev ntseeg thiab.

⁵ Thaum xyoo 36, Vajtswv tau txib Petus mus caw ib pab los ntxiv rau nws haiv neeg Yixayee ntawm sab kev ntseeg. Petus tau mus qhia ib tug thawj rog Loos hu ua Khaunelia thiab nws cov nruab ze. (Tubtxib Tes Haujlwm 10:22, 24, 34, 35) Phau Vajlugkub qhia tias thaum Petus tseem tabtom hais lus, Vajtswv txawm pub nws lub hwj huam dawb huv rau txhua tus uas tuaj mloog ntawd. “Cov uas twb ua kevcai txiav thiab ntseeg uas nrog Petus tuaj kuj phimhwj heev vim tias Vajtswv hliv [lub hwj huam] dawb huv rau lwm haiv neeg thiab.” (Tubtxib Tes Haujlwm 10:44, 45) Txij thaum ntawd, txawm tias lwm haiv neeg tsis tau ua kevcai txiav los, lawv tau ua Vajtswv haiv neeg Yixayee ntawm sab kev ntseeg lawm.

6, 7. Haiv neeg Yixayee ntawm sab kev ntseeg hwm Yehauvas lub npe li cas?

⁶ Nyob rau xyoo 49, thaum pab ua ntaus thawj sab laj ua ke, tus thwjtim Yakaunpau hais li no: “Xis Moos nyuam qhuav piav tias txij lub hauv paus los, Tswv Ntuj yeej xaiv tej tus nyob hauv cov neeg teev dab los ua ib haiv neeg hwm nws lub npe.” (Hauj Lwm [Tubtxib Tes Haujlwm] 15:14, Ntawv Ntshiab 2002) Yog li ntawd, haiv neeg uas hwm Vajtswv lub npe no yuav los ntawm cov Yudai thiab lwm haiv neeg los. (Loos 11:25, 26a) Tom qab no, Petus sau tias: “Yav tag los nej tsis yog nws haiv neeg tiamsis nimno nej yog Vajtswv haiv neeg lawm.” Petus piav li no: “Nej yog haiv neeg uas xaiv cia lawm, yog Vajntxwv cov pov thawj thiab ua neeg dawb huv, yog cov neeg  uas ua Vajtswv tug, kom nej thiaj qhia nws tes haujlwm tseem ceeb, yog tus uas hu nej tawm hauv qhov tsaus ntuj los nyob rau hauv nws qhov kaj uas phimhwj kawg.” (1 Petus 2:9, 10) Lawv yuav tsum muaj lub siab tawv ua timkhawv rau ib tsoom tebchaws paub tias, Yehauvas yog tus muaj hwjchim kav ib puas tsav yam.

⁷ Nimno cov Yixayee ntawm sab kev ntseeg yog Vajtswv haiv neeg lawm tiag. Yehauvas hais tias: Lawv “yog haiv neeg uas kuv tsim los rau kuv, xwv thiaj li qhia tej uas tsim nyog qhuas kuv.” (Yaxaya 43:21) Lawv tsis ntshai tshaj tawm tias Yehauvas thiaj yog tus tseem Vajtswv, dua li tej yog vajtswv cuav xwb. (1 Thexalaunika 1:9) Lawv ua timkhawv txog Yehauvas thiab Yexus “hauv lub nroog Yeluxalees thiab thoob plaws lub xeev Yudia thiab lub xeev Xamali thiab mus thoob qab ntuj kawg.”​—Tubtxib Tes Haujlwm 1:8; Khaulauxi 1:23.

8. Tus tubtxib Povlauj ceeb toom lub koom txoos li cas?

⁸ Povlauj muaj lub siab tawv qhawv ua timkhawv txog Yehauvas. Nws tshaj tawm tias Yehauvas tib leeg xwb thiaj yog tus tseem Vajtswv. Nws qhia txhua leej txhua tus, tsis hais tej xibhwb qhia ntawv tibsi. Povlauj piav rau lawv tias Vajtswv “tsim lub ntiajteb thiab txhua yam uas nyob hauv, nws yog lub ntuj thiab lub ntiajteb tus Tswv.” (Tubtxib Tes Haujlwm 17:18, 23-25) Povlauj kuj ceeb toom cov kwvtij hauv lub koom txoos li no: “Kuv paub tias thaum kuv ncaim nej lawm yuav muaj hma nyaum tuaj rau hauv nej, thiab yuav tsis tseg pab yaj kiag li. Thiab yuav muaj qee leej hauv nej cov sawv los ntxeev txojkev tseeb thiaj rub tau cov thwjtim raws lawv qab.” (Tubtxib Tes Haujlwm 20:29, 30) Thaum cov tubtxib tseem ua neej nyob los, hauv lub koom txoos twb muaj coob tus fav xeeb rau Yehauvas lawm.​—1 Yauhas 2:18, 19.

9. Tom qab cov tubtxib dua tag lawd, ua li cas rau Vajtswv cov tibneeg?

⁹ Tom qab cov tubtxib dua tag lawd, cov fav xeeb huam vam coob heev tuaj thoob cov koom txoos. Lawv thiaj tawg ua pab ua pawg mus ua cov Khixatia cuav lawm. Lawv tsis hwm Yehauvas lub npe hlo li, thiab tseem muab nws lub npe tshem tawm hauv phau Vajlugkub mus. Lawv ua ntau yam los rhuav Vajtswv lub npe. Lawv muab neeg tej kevcai dab qhuas los txuam nrog phau Vajlugkub. Lawv kuj tuav Vajtswv lub npe mus ua tsov ua rog. Lawv tso kev dav heev rau lawv cov tswv cuab mus ua nkauj ua nraug thiab ua phem ua qias tsis huv. Ntau pua xyoo tom qab no, thiaj muaj tsawg tsawg tus pe hawm Yehauvas hauv ntiajteb no lawm xwb. Txij thaum ntawd los tsis muaj ib pawg ntseeg lossis ib lub koom haum twg, hwm Yehauvas lub npe li lawm.

10, 11. (1) Yexus qhia li cas txog “cov txhauv” thiab “cov mog”? (2) Yexus cov lus muaj tiav li cas tom qab xyoo 1914?

¹⁰ Yexus qhia tias nyuaj heev rau sawvdaws paub tias pawg ntseeg twg yog pawg tseeb, nws thiaj hais ib zaj lus piv txwv txog cov noob mog thiab cov noob txhauv. Yexus piav tias “thaum sawvdaws tsaug zog lawm,” Ntxwg Nyoog yuav tseb noob txhauv xyaw  rau tej noob mog uas Neeg Leej Tub tau tseb. Yexus piav tias cov “noob zoo” piv txog lub Nceeg Vaj cov menyuam. Cov “txhauv” yog “tus uas Phem li menyuam.” Cov txhauv thiab cov mog yuav hlob ua ke mus txog “lub sijhawm kawg.” Thaum ntawd Neeg Leej Tub mam li xa nws cov tubtxib saum ntuj mus hlais cov txhauv pov tseg thiab sau cov mog uas yog lub Nceeg Vaj cov menyuam, los cia hauv lub txhab. (Mathai 13:24-30, 36-43) Cov lus no muaj tiav li cas? Thiab muaj xaus rau Vajtswv cov tibneeg li cas?

¹¹ Lub “sijhawm kawg” pib xyoo 1914. Thaum ntawd tsuas muaj 5,000 tus Khixatia uas yog cov xaiv tseg nyob hauv ntiajteb no xwb. Lub sijhawm ntawd lawv tseem coj raws li lub Tuam Ceeb Npanpiloo uas yog kev ntseeg cuav. Tiamsis thaum txog xyoo 1919, Yehauvas tso lawv dim. Thaum ntawd sawvdaws yeej pom tseeb tias pawg ntseeg twg yog cov tseem Khixatia. Vajtswv pib sau nws “cov menyuam” los ua ib lub koom haum raws li Yaxaya tau hais no: “Ib hnub xwb yuav tshwm sim tau lub tebchaws lov? Ib pliag ntshis xwb yuav yug tau ib haiv neeg lov? Thaum Xi-oo pib mob plab yug nws yug tau nws tej tub tamsim ntawd.” (Yaxaya 66:8) Hauv cov nqe no Xi-oo piv txog Yehauvas lub koom haum uas yog nws cuab tubtxib saum ntuj. Xi-oo “yug tau” nws tus menyuam thaum Vajtswv sau cov xaiv tseg los ua ib haiv neeg hauv ntiajteb no.

12. Cov xaiv tseg hwm Yehauvas lub npe li cas?

¹² Cov xaiv tseg niaj hnub no, kuj ua timkhawv txog Yehauvas ib yam li cov Khixatia uas nyob thawj 100 xyoo. (Nyeem Yaxaya 43:1, 10, 11.) Lawv coj txawv ntawm lwm pab lwm pawg rau qhov lawv coj lub neej dawb huv raws li tsim nyog ib tug Khixatia coj. Lawv kuj tshaj tawm txoj xov zoo txog Vajtswv lub Nceeg Vaj “rau ib tsoom tebchaws.” (Mathai 24:14; Filipi 2:15) Lawv kub siab lug tshaj tawm lawv thiaj pab tau ntau plhom leej los nrog Vajtswv Yehauvas sib raug zoo.​—Nyeem Daniyee 12:3.

13, 14. (1) Cov uas xav teev tiam Vajtswv yuav tsum nrog leejtwg pe hawm ua ke, Yehauvas thiaj txais yuav lawv? (2) Phau Vajlugkub twb qhia ua ntej li cas txog tej no lawm?

¹³ Yav tas los lwm haiv neeg yuav tsum pe  hawm Vajtswv nrog haiv neeg Yixayee ua ke, Vajtswv thiaj txais yuav lawv. (1 Vajntxwv 8:41-43) Ib yam li ntawd, niaj hnub no cov uas xav teev tiam Vajtswv los, yuav tsum nrog cov xaiv tseg pe hawm ua ke, Yehauvas thiaj txais yuav lawv.

¹⁴ Thaum ub cov uas cev Vajtswv lus twb qhia tseg lawm hais tias, nyob rau lub sijhawm kawg tibneeg yuav sib yaum daws los nrog Vajtswv haiv neeg pe hawm Yehauvas. Yaxaya hais tias: “Ntau haiv neeg yuav tuaj hais tias, ‘Cia li los, cia peb nce mus saum [Yehauvas] lub roob, mus rau hauv Yakhauj tus Vajtswv lub tuam tsev, mas nws yuav qhia nws txojkev rau peb kom peb thiaj taug tau nws txojkev.’ Rau qhov txoj kevcai yuav tawm hauv Xi-oo tuaj thiab [Yehauvas] txojlus yuav tawm hauv Yeluxalees tuaj.” (Yaxaya 2:2, 3) Xekhaliya hais tseg li no: “Yuav muaj neeg coob coob thiab ntau lub tebchaws uas muaj zog tuaj nrhiav [Yehauvas] uas muaj hwjchim loj kawg nkaus hauv Yeluxalees thiab thov [Yehauvas] tsa muag zaj saib lawv.” Cov neeg coob coob no yuav “tuaj ntawm txhua lub tebchaws thiab txhua haiv neeg” tuaj. Lawv yuav nrog cov Yixayee ntawm sab kev ntseeg pe hawm Vajtswv. Lawv thiaj hais li no: “Thov cia peb nrog nej mus thiab, vim peb twb hnov tias Vajtswv nrog nraim nej.”​—Xekhaliya 8:20-23.

15. Lwm pab yaj yuav “nrog” cov xaiv tseg li cas?

¹⁵ Lwm pab yaj yuav “nrog” cov Yixayee ntawm sab kev ntseeg li cas? Lawv yuav nrog cov xaiv tseg tshaj tawm txoj xov zoo txog lub Nceeg Vaj. (Malakau 13:10) Lwm pab yaj los muaj feem ua Vajtswv haiv neeg lawm thiab. Lawv tau nrog cov xaiv tseg “ua ib pab” uas “muaj ib tug tswv yug xwb.” Tus tswv ntawd yog Yexus Khetos.​—Nyeem Yauhas 10:14-16.

16. Yuav muaj dabtsi tshwm sim ua ntej Amakedoo los?

¹⁶ Tom qab lub Tuam Ceeb Npanpiloo raug rhuav tshem lawd, Dab Ntxwg Nyoog yuav tig tawm tsam Vajtswv cov tibneeg. Yuav tsum muaj Yehauvas tiv thaiv peb thiaj dim tau. Thaum txog lub sijhawm ntawd, Yehauvas yuav ua rau Kau uas yog Ntxwg Nyoog, pom nws haiv neeg nyob tso siab plhuav tsis muaj ntsa loog tiv thaiv li. Thaum ntawd Kau thiaj tuaj ua rog rau lawv. Thaum muaj li ntawd ces qhia tias lub caij muaj kev ceeblaj txom nyem loj kawg li yuav xaus nrog Amakedoo. (Mathai 24:21; Exekhee 38:2-4) Kau yuav “ua rog rau tej neeg uas sau hauv ib tsoom tebchaws los.” (Exekhee 38:10-12) Yehauvas mam li los tav kiag Kau thiab ntaus rog tawm tsam nws pab tub rog. Yehauvas yuav ua kom sawvdaws pom tias nws tib leeg xwb thiaj muaj hwjchim kav ib puas tsav yam. Sawvdaws yuav qhuas txog nws lub npe dawb huv. Yehauvas hais tias: “Ua li no mas kuv thiaj ua kuv lub hwjchim thiab kuv txojkev dawb huv tshwm los, thiaj qhia kuv rau ntau lub tebchaws pom. Mas lawv yuav paub tias kuv yog [Yehauvas].”​—Exekhee 38:18-23.

17, 18. (1) Yehauvas yuav qhia li cas rau nws cov tibneeg thaum Kau tawm tsam lawv? (2) Yog tias peb xav tau chaw nraim, peb yuav tsum ua dabtsi?

¹⁷ Thaum Kau sau nthwv tawm tsam Vajtswv cov tibneeg, Yehauvas yuav qhia nws cov tibneeg li no: “Kuv cov neeg, cia li los, cia li nkag rau hauv nej chav tsev thiab kaw qhov rooj rau. Nej cia li mus nraim cev ib ntus mus txog thaum [Yehauvas] kev npau taws dhau lawm.” (Yaxaya 26:20) Lub sijhawm ntawd Yehauvas yuav qhia tias peb yuav tsum ua li cas peb thiaj muaj chaw nkaum. Tej zaum tej “chav tsev” ntawd piv txog cov koom txoos ntag.

¹⁸ Yog tias peb xav tau chaw nraim thaum txog lub caij muaj kev ceeblaj txom nyem loj kawg nkaus, peb yuav tsum xam pom tias Vajtswv twb xaiv ib co los ua nws haiv neeg hauv ntiajteb no lawm tiag. Vajtswv twb sau lawv los nyob ua pab ua pawg hauv tej koom txoos lawm. Peb yuav tsum nrog lawv tuaj Vajtswv tog thiab nyob twjywm hauv lub koom txoos. Peb yuav tsum xav ib yam li tus sau nkauj tau hais: “Kev dim nyob ntawm [Yehauvas]. Thov koj foom koob hmoov rau koj cov neeg.”​—Ntawv Nkauj 3:8.