MAUXE Txoj Kevcai yeej tsis txwv kom txhob twv ntuj twv teb. Yog lawv hais tias, “Kuv cog lus twv rau Vajtswv pom,” lossis “Kuv tuav Yehauvas lub npe twv” los kuj tau thiab. Tiamsis thaum Yexus los, cov Yudai lam tau lam twv txog tej yam uas twb tsis tseem ceeb li. Vim li cas? Vim lawv xav kom luag ntseeg lawv tej lus. Txawm lawv ua li no los tsis muaj qabhau dabtsi. Muaj 2 zaug Yexus thiaj txwv hlo kom lawv tsis txhob twv ntuj twv teb lawm. Nws hais tias: “Thaum nej hais lus, lo uas ‘Yog’ kuj hais tias ‘Yog,’ lo uas tsis yog cia li hais tias ‘Tsis yog’ xwb.”​—Mathai 5:33-37; 23:16-22.

Muaj ib phau ntawv txhais lus uas piav txog Yudai phau ntawv kevcai hu ua Tamus (Talmud). Phau ntawd qhia tshab tshab tias thaum lawv cog lus twv, lo twg yuav tsum ua raws li, lo twg tsis tas ua los tau. Tej no qhia tias cov Yudai niaj hnub cog lus twv.

Tsis yog Yexus ib leeg thiaj ntuas kom txhob lam tau lam twv ntuj. Muaj ib tug yawg tshawb fawb txog Yudai tej keeb kwm hu ua Falevu Yauxifa (Flavius Josephus) tau sau txog ib pab neeg Yudai uas tsis kam twv ntuj twv teb. Lawv ntseeg tias yog hais dag tseem zoo dua hais lus twv. Lawv hais tias yog tsis muaj neeg ntseeg yus tej lus es yuav tau twv ntuj ces yuav tsum yog yus dag xwb. Cov Yudai kuj muaj ib phau ntawv hu ua Xaila Lub Laj Lim Tswvyim (Wisdom of Sirach) uas hais tias: “Tug neeg twv ntuj yeej tsis yog ib tug neeg coj ncaj.” Yexus hais tias yuav tsum tsis txhob lam tau lam twv. Yog peb hais lus tseeb txhua lub sijhawm ces tsis tas peb yuav twv ntuj, luag yeej ntseeg peb lawm.