RAU COV NIAM TXIV UAS MUAJ MENYUAM
6: Qhuab Ntuas Menyuam
YOG LI CAS?
Qhuab ntuas yog li cas? Yog qhov uas cov niam txiv yuav tsum cob menyuam. Yog menyuam tsis mloog lus, niam txiv yuav tsum ntuas thiab rau txim. Tsis tas li ntawd, cov niam txiv yuav tsum qhia kom menyuam paub cais qhov zoo qhov phem xwv lawv thiaj paub zam teeb meem.
VIM LI CAS TSIM NYOG UA?
Niaj hnub no cov niam txiv tsis tshua qhuab ntuas menyuam heev lawm. Yog vim li cas? Tau ntau xyoo no, coob tus txhawj tsam yog niam txiv ntuas lossis rau txim rau menyuam ces ho ua rau lawv saib lawv tus kheej tsis muaj nqes lawm. Tiamsis cov niam txiv uas muaj tswvyim paub tias lawv yuav tsum qhuab ntuas menyuam thiaj mloog lus.
Paj Nyiag tau hais tias: “Yuav tsum muaj tus qhia menyuam tias yam twg tsim nyog ua, yam twg tsis tsim nyog. Thaum lawv hlob lawd lawv thiaj paub ua neej. Cov menyuam uas tsis muaj tus cob qhia zoo ib yam li lub nkoj tsis muaj tus duav hlais dej. Lub nkoj zoo li ntawd yeej mus tsis txog chaw, tej zaum tseem ntxeev los muaj.”
KOJ YUAV UA LI CAS?
Ua li koj tau hais. Yog yus tus menyuam tsis mloog lus, yus yuav tsum rau txim li yus tau hais. Tiamsis yog yus tus menyuam mloog lus, yus yuav tsum qhuas nws thiab.
Hnub Ci tau hais tias: “Hauv lub qab ntuj no tibneeg tsis nyiam mloog lus. Yog li ntawd thaum kuv cov menyuam mloog lus kuv nco ntsoov qhuas lawv. Vim kuv qhuas lawv li ntawd, thaum lawv tsis mloog lus es kuv ho ntuas lawv los, lawv thiaj mloog.”
VAJLUGKUB TEJ HAUV PAUS NTSIAB LUS: “Leejtwg tseb yam twg nws kuj yuav sau yam ntawd.”—Kalatia 6:7.
Txawj xav. Ua ntej yus yuav rau txim rau yus tus menyuam, muab xav thiab muab luj li no: Tus menyuam muaj hnub nyoog pes tsawg? Nws puas tau paub tab? Yam uas nws ua ntawd txhaum loj npaum li cas? Nco ntsoov tias kev qhuab ntuas yuav tsum phim lub txim. Piv tias yus tus menyuam tham xov tooj heev dhau lawm ces muab nws lub xov tooj tshem ib ntus tso. Yog tias tus menyuam ua tej yam meem txom yus los, nco ntsoov rau txim hauj sim xwb.
Vam Duas tau hais tias: “Kuv ua tib zoo xav seb puas yog kuv tus menyuam txhob txwm tawv ncauj, los yog nws yuam kev xwb. Yog tias nws pheej ua qhov txhaum qub ces kuv yuav tsum tshuaj saib thiab ntuas kom nws kho nws tus cwj pwm. Tiamsis yog nws ua yuam kev ib zaug xwb ces kuv tsuas ntuas zaum ntawd thiab xwb.”
VAJLUGKUB TEJ HAUV PAUS NTSIAB LUS: “Nej cov uas yog txiv, nej tsis txhob zes nej tej menyuam lawv thiaj tsis poob siab.”—Khaulauxi 3:21.
Hlub tshua tej menyuam. Yog tej menyuam pom tias yus ntuas lawv vim yus hlub lawv xwb ces lawv yeej mloog lus dua.
Tshuas Ntaj tau hais tias: “Thaum wb tus tub ua yuam kev, wb txhawb nws tias wb yeej nco ntsoov tej yam zoo uas nws tau ua los lawm. Yog nws hloov ces nws yuav tsis tau ris tej kev txhaum ntawd mus li. Wb cog lus tias wb mam pab nws.”
VAJLUGKUB TEJ HAUV PAUS NTSIAB LUS: “Txojkev hlub ua tau siab ntev, muaj siab khuvleej.”—1 Khaulee 13:4.
