Hauv tebchaws Kanada (Canada), muaj ib lub tsev kawm ntawv coj ib pab tub kawm ntawv mus ua si. Thaum lawv mus ntawd, lawv ib co tub hluas cia li rov muab lawv ib tug tub hluas txhom ua phem. Lawv puavleej mus ib lub tsev kawm ntawv uas nto moo heev. Tom qab qhov teeb meem ntawd, ib tug kws sau xwm txheej hu ua Li-aunaw Xwtee (Leonard Stern) thiaj sau tias: “Txawm tej tub ntxhais hluas yuav kawm txawj kawm ntse, kawm txuj ci siab, thiab yug hauv cuab neeg muaj txiag nplua nuj los, tsis yog cov hluas ntawd yuav tsim txiaj.”​—Ottawa Citizen.

Tus yawg Li-aunaw sau ntxiv tias: “Tsim nyog tej niam tej txiv xub cob kom tej menyuam paub cais qhov zoo qhov phem. Tiamsis lawv feem coob tsuas qhia kom menyuam vuag kev kawm ntawv qeb siab thiab khwv nyiaj khwv txiaj xwb.”

Kev kawm ntaub kawm ntawv yeej tseem ceeb kawg li. Tiamsis txawm ib tug neeg kawm ntawv siab npaum li cas los yeej kho tsis tau nws lub siab kom txhob ntshaw kev phem. Puas muaj ib txojkev kawm uas pab kom peb ua neeg zoo, paub cais qhov zoo qhov phem?

Phau Vajlugkub zoo li daim tsom iav uas ua rau koj pom tseeb txog tej yam uas koj yuav tau kho. (Yakaunpau 1:23-25) Phau Vajlugkub kuj pab koj hloov koj lub neej koj thiaj nrog tau luag nyob sib haum xeeb. Yuav pab koj coj zoo, paub khuvleej luag, ua siab ntev, paub tswj koj tus kheej, thiab txawj hlub luag. Kev hlub muaj peevxwm “khi tau txhua yam sib koom ua ke.” (Khaulauxi 3:14) Kev hlub tshwj xeeb npaum li cas? Cia peb kawm seb phau Vajlugkub qhia li cas txog kev hlub.

• “Txojkev hlub ua tau siab ntev, muaj siab khuvleej, tsis khib luag, tsis khav theeb, tsis tsab ua loj, tsis ua tej uas rhuav ntsej muag, tsis xam pom nws xwb, tsis chim sai, tsis cim ntsoov luag tej kev txhaum, tsis xyiv fab rau tej kev phem tiamsis xyiv fab rau txojkev tseeb. Txojkev hlub nyiaj taus txhua yam, . . . thiab ua siab ntev thev txhua yam. Txojkev hlub tsis txawj kawg kiag li.”​—1 Khaulee 13:4-8.

• “Kev hlub tsis ua phem rau kwvtij zej zog kiag li.”​—Loos 13:10.

• “Qhov uas tseem ceeb dua ntais huvsi, cia li siv zog sib hlub vim txojkev hlub tswj tau ntau yam kev txhaum.”​—1 Petus 4:8.

Thaum koj nrog cov uas hlub koj, koj yeej tsis txhawj ntshai ib yam dabtsi li. Lawv hlub koj thiab xav kom koj tau zoo xwb. Koj paub tias lawv yeej tsis txhob txwm ua rau koj tu siab.

Kev hlub muaj zog heev. Yog peb muaj kev hlub rau lwm tus, peb yuav tso tau tej uas peb lub siab ntshaw tseg thiab hloov tau peb lub neej. Xav txog tus qauv no: Muaj ib tug yawm txiv uas hlub nws tus tub xeeb ntxwv kawg li. Nws xav nrog nws tus xeeb ntxwv ua ke, tiamsis tus vauv tsis kam rau qhov nws haus luam yeeb loj heev. Cov pa luam yeeb tsis zoo rau tus xeeb ntxwv. Yog li ntawd, nws thiaj txiav txim siab thum luam yeeb. Txawm nws twb haus luam yeeb tau 50 xyoo lawm los, nws tseem thum tau vim yog txojkev hlub xwb. Kev hlub hloov tau peb lub neej tiag!

Peb yuav tsum kawm thiaj txawj hlub luag. Niam txiv ua qauv, menyuam thiaj txawj hlub luag. Tej niam txiv uas zoo yeej nrhiav noj rau menyuam  thiab tiv thaiv lawv kom txhob muaj mob muaj nkeeg. Lawv nrog menyuam hais lus tsis tseg, cob qhia lawv ua neej. Thaum menyuam ua yuam kev, lawv qhuab ntuas thiab qhia menyuam kom paub qhov zoo qhov phem. Niam txiv yuav tsum xub tso tus qauv zoo rau menyuam xyaum.

Tu siab kawg uas muaj tej nkawm niam txiv tsis cob qhia lawv tej metub menyuam. Txawm li ntawd los, puas yog menyuam yuav tsis tsim txiaj mus li? Tsis yog! Txawm yus niam yus txiv tsis txawj cob qhia los, yus tseem ua tau neeg tsim txiaj thiab. Coob tus twb tiav niam tiav txiv lawm los lawv tseem hloov tau lawv lub neej. Muaj ib txhia ua ntau yam phem, luag xav tias yuav tsis muaj hnub hloov tau li los tseem hloov tau thiab. Nyeem txog 2 tug qauv seb nkawd hloov tau li cas.