Tus tub txib Povlauj sau rau cov Khixatias uas nyob hauv Thexalaunikes tias: “Yog leejtwg tsis mloog tej lus uas kuv hais hauv tsab ntawv no, cia li cim tus ntawd cia.” (2 Thexalaunikes 3:14) Yav tas los thaum muaj ib tug uas cov txwj laus ntuas mus ntuas los tiam sis nws haj tseem tsis mloog tej hauv paus ntsiab lus hauv phau Vajlugkub, ces cov txwj laus yuav tau cev ib zaj lus qhuab qhia los mus ceeb toom lub koom txoos txog tus ntawd. Tom qab ntawd, cov nyob hauv lub koom txoos thiaj tsis nrog tus ntawd noj haus los sis ua ub ua no ua ke.

Txij no mus tau muab hloov li no lawm. Tam sim no peb nkag siab tias Povlauj cov lus ntuas yog hais rau cov Khixatias txhua tus kom nyias yuav tsum cim nyias cia. Tsis tas cov txwj laus yuav cev ib zaj lus qhuab qhia los ceeb toom sawv daws lawm. Vim li cas ho muab hloov li no? Cia peb rov mus ua tib zoo soj ntsuas Povlauj cov lus kom tshab tshab.

Povlauj tau hais li no txog ib co hauv lub koom txoos ntawd tias: “Lawv cov ntawd tsis ua raws li tej lus uas peb qhia rau nej lawm.” Zaum tag los lawm uas Povlauj tuaj xyuas, nws hais rau lawv li no tias: “Yog leejtwg tsis kam ua haujlwm, nej tsis txhob pub mov rau tus ntawd noj.” Txawm li ntawd los ib txhia xib tim tsis kam ua hauj lwm tab txawm lawv twb ua taus. Tsis tas li ntawd, lawv tseem mus txob plaub kom tab kaum lwm tus. Yog li ntawd, cov Khixatias yuav coj li cas thaum muaj tej tug zoo li no?​—2 Thexalaunikes 3:6, 10-12.

Povlauj hais tias kom “cia li cim tus ntawd cia.” Cov lus Kilis hais tias kom cim ntsoov tej tug zoo li no cia thiab tsis txhob cia tus ntawd txw tau yus. Povlauj hais cov lus no rau txhua tus hauv lub koom txoos, tsis yog cov txwj laus xwb. (2 Thexalaunikes 1:1; 3:6) Yog cov Khixatias pom ib tug kwv tij los sis nkauj muam tsis mloog tej lus qhuab ntuas hauv Vajtswv txoj lus ces lawv yuav tau txiav txim siab seb lawv yuav nrog los sis tsis “nrog nws ua ke.”

Raws li hais no puas yog kom peb suav tus ntawd yam li ib tug uas tau muab tshem tawm hauv lub koom txoos mus lawm? Tsis yog li ntawd vim Povlauj hais tias: “Nej yuav tsum ntuas nws ib yam li nej ntuas nej tej kwvtij.” Yog li ntawd ib tug Khixatias twg haj tseem nrog tau tus ntawd thaum mus kev sib txoos thiab thaum mus qhia txoj xov zoo tiam sis yuav tsis nrog tus ntawd noj haus los sis ua si ua ke. Vim li cas ho hais li ntawd? Povlauj hais tias “xwv nws thiaj li txaj muag.” Yog peb tsis nrog tus ntawd raws li hais no ces tej zaud yuav ua rau nws txaj muag thiab hloov nws txoj kev coj noj coj ua.​—2 Thexalaunikes 3:14, 15.

Ua li cas ib tug Khixatias niaj hnub nim no thiaj li paub cim ib tug twg cia? Ib, peb yuav tsum paub tseeb tseeb tias tus ntawd tsis ua li Vajtswv txoj lus qhia lawm. Nco ntsoov tsis txhob xav yuam kev, Povlauj tsis yog hais txog tej tug uas ua ub ua no uas tsis xis peb los sis xav txawv dua peb tiam sis tsis hla Vajtswv tej kev cai. Txuas ntxiv ntawd, Povlauj tsis yog hais txog tej tug uas tau ua rau peb chim siab. Tiam sis Povlauj yog hais txog cov uas twb raug ntuas mus mus los los tiam sis cuaj kaum los tsis kam mloog Vajtswv Txoj Lus.

Niaj hnub nim no yog tias peb paub ib tug Khixatias twg muaj tus cwj pwm uas tsis kam mloog lus a ces peb txiav txim siab tsis kam nrog nws noj haus los sis mus ua si los tau. Vim tej uas peb ua no yog nyias txiav txim siab rau nyias tus kheej xwb, tsis txhob muab piav tawm rau sab nraum peb lub cuab lub yig. Nco ntsoov tias peb haj tseem nrog tau tus ntawd mus kev sib txoos thiab mus qhia txoj xov zoo. Thaum peb pom tias nws hloov lawm ces peb mam li rov qab nrog nws noj haus los sis ua si li qub.