Yexus tau qhia kom tib neeg nyob sib haum xeeb. Tiam sis muaj ib zaug nws ho hais rau nws cov tub txib tias: “Tsis txhob xav tias kuv los ua kom ntiaj teb sib haum xeeb tiam sis kuv los ua kom ntiaj teb sib cais. Kuv los cais lub cuab lub yig, kom tub tawm tsam txiv, ntxhais tawm tsam niam, thiab nyab tawm tsam pog.” (Mathais 10:34, 35) Ua cas Yexus ho hais li ntawd?

Yexus yeej tsis xav muab lub cuab lub yig sib cais tiam sis nws paub tias tej nws qhia yuav ua rau tej tse neeg nyob tsis sib haum. Yog li ntawd, cov uas xav ua kev cai raus dej thiab xav ua Yexus cov thwj tim yuav tsum paub tias qhov lawv txiav txim siab ua ntawd, lawv tsev neeg ib txhia yuav tsis nyiam. Thaum lawv tus txij nkawm los sis cov hauv lawv tsev neeg tawm tsam lawv, yuav nyuaj heev rau lawv ua raws li Yexus tej lus qhia.

Phau Vajlugkub qhia kom cov ntseeg Vajtswv “nrog sawvdaws nyob sib haum.” (Loos 12:18) Tiam sis tej Yexus qhia yuav ua rau tej tse neeg “sib cais.” Vim li cas? Rau qhov thaum muaj ib tug hauv tsev neeg los coj raws li Yexus tej lus qhia ces tej zaum lwm cov yuav tawm tsam nws. Thaum zoo li no ces cov ntawd yuav ua “yeeb ncuab” rau tus uas kawm Vajlugkub.​—Mathais 10:36.

Khetos cov thwj tim uas nyob hauv tsev neeg uas ib txhia tsis ntseeg Vajtswv tej thaud yuav raug kev sim siab. Lawv yuav tau txiav txim siab seb lawv yuav ua raws li Yehauvas thiab Yexus nkawd siab nyiam los sis ua raws li lawv tsev neeg siab nyiam. Xws li, thaum tus uas ntseeg raug tsev neeg yuam mus koom lawv txoj kev ntseeg tej koob tsheej. Thaum zoo li no, tus ntseeg yuav ua li cas? Yexus hais tias: “Tus uas hlub nws niam nws txiv heev dua hlub kuv, tsis tsim nyog ua kuv tus thwj tim.” (Mathais 10:37) Yexus hais li no tsis yog hais kom tus uas los ntseeg Vajtswv tsis txhob hlub nws niam nws txiv. Nws tsuas hais kom tus uas ntseeg paub txiav txim siab seb yam twg tseem ceeb dua. Thaum cov uas nyob hauv peb tsev neeg tawm tsam tsis pub peb teev tiam Yehauvas, peb yeej hlub lawv tiam sis peb yuav tsis ua li lawv hais. Peb saib peb txoj kev teev tiam Yehauvas tseem ceeb dua.

Thaum peb tsev neeg tawm tsam peb, yeej mob peb siab heev. Txawm li ntawd los, peb yuav tsum nco ntsoov cov lus Yexus tau hais no: “Tus uas tsis kam kwv nws tus ncej ntoo raws kuv qab tsis tsim nyog ua kuv tus thwj tim.” (Mathais 10:38) Yexus cov lus no qhia tias nws cov thwj tim yuav raug kev tawm tsam hnyav tiam sis yuav tau ua siab ntev thev. Lawv vam thiab cia siab tias yog lawv ua siab ntev thev tej kev tawm tsam ntawd thiab coj zoo ces muaj ib hnub twg lawv tsev neeg yuav thim xav los kawm Vajlugkub.​—1 Petus 3:1, 2.