1. Yexus tau ua dab tsi rau peb?

 TSIS tau muaj ib tug tib neeg uas yuav siab dawb npaum li Yexus. Thaum nws los hauv ntiaj teb no nws siv nws tej txuj ci los pab tib neeg. (Lukas 9:12-17) Yam uas nws muab uas zoo tshaj plaws rau tib neeg yog los tuag this tib neeg txoj sia. (Yauhas 15:13) Yexus haj tseem niaj hnub pab peb. Yexus tau thov Yehauvas kom muab lub hwj huam dawb huv los qhia thiab nplig peb. (Yauhas 14:16, 17; 16:13) Tsis tas li ntawd, Yexus kuj cob qhia peb tom tej kev sib txoos kom peb thiaj txawj mus qhia tib neeg thoob plaws ntiaj teb no los ua nws cov thwj tim.​—Mathais 28:18-20.

2. Raws li Efexus 4:7, 8, cov txiv neej uas Yexus “pub” rau peb yog leej twg?

² Muaj dua ib qho uas Yexus pub rau peb. Tom qab Yexus mus saum ntuj, tus tub txib Povlauj sau tias Yexus “pub” ib co txiv neej los tuav hauj lwm hauv lub koom txoos. (Nyeem Efexus 4:7, 8.) Cov txiv neej no yuav saib xyuas lub koom txoos rau txhua txoj ke. (Efexus 1:22, 23; 4:11-13) Niaj hnub no cov txiv neej uas Yexus pub yog cov tub leg num, cov txwj laus, thiab cov saib xyuas thaj tsam. a Cov txiv neej no yog noob txaug neeg txhaum ces lawv yeej yuav ua tau yuam kev. (Yakaunpaus 3:2) Tiam sis Yexus Khetos haj tseem siv lawv los pab peb.

3. Piav seb peb txhawb tau cov txiv neej uas Yexus “pub” los pab peb li cas.

³ Yexus “pub” cov txiv neej no los mus txhawb lub koom txoos. (Efexus 4:12) Txawm li ntawd los peb yeej muaj feem pab tau lawv thiab. Piv txwv li no tias peb tab tom tsa ib lub  Tsev Nceeg Vaj. Ib txhia yog cov tsa vaj tsa tsev. Hos lwm tus kuj pab ua zaub ua mov, thauj khoom ub khoom no, los sis pab lwm txoj ke. Zoo ib yam li ntawd, peb kuj pab cov tub leg num, cov txwj laus, thiab cov saib xyuas thaj tsam los ntawm tej yam peb hais thiab ua. Cia peb mus kawm seb lawv tes hauj lwm pab tau peb li cas, thiab peb yuav ua li cas los qhia tias peb ris lawv thiab Yexus tus txiaj tus ntsig.

COV TUB LEJ NUM “PAB TAU LWM TUS”

4. Nyob rau thawj 100 xyoo, cov tub leg num pab rau txoj ke twg?

⁴ Nyob rau thawj 100 xyoo, ib txhia kwv tij kuj yog cov tub leg num. (1 Timautes 3:8) Lawv tej zaum yog cov uas Povlauj sau txog tias nqis tes “pab lwm tus.” (1 Kauleethaus 12:28) Yog li ntawd, cov tub leg num ua qee yam hauj lwm xwv cov txwj laus thiaj li dim tes los mus cob qhia thiab saib xyuas cov kwv tij nkauj muam Khixatias. Xws li tej zaum cov tub leg num pab theej tej nqe hauv Vajtswv Txoj Lus los sis yuav tej khoom los siv kom thiaj tau theej.

5. Niaj hnub no cov tub leg num tes hauj lwm yog dab tsi?

⁵ Muaj tej yam uas cov tub leg num pab nyob rau hauv lub koom txoos. (1 Petus 4:10) Lawv saib xyuas lub koom txoos tej nyiaj txiag, tej koog, nqus ntaub ntawv, tso suab thiab yeeb yaj kiab, ua tub ncig num, los sis tu lub Tsev Nceeg Vaj. Lawv ua cov hauj lwm no kom lub koom txoos thiaj li ntws tau zoo zoo. (1 Kauleethaus 14:40) Ib txhia tub leg num cev lus qhuab qhia thaum muaj txoj kev sib txoos 1 thiab txoj kev sib txoos 2. Tej zaud lawv kuj pab tus kwv tij uas saib xyuas pawg mus qhia Vajlugkub. Hos muaj qee lub sij hawm lawv kuj nrog cov txwj laus mus txhawb lwm tus hauv lub koom txoos.

6. Vim li cas peb ho ris cov tub leg num txiaj ntsig?

⁶ Ib txhia xav li cas txog cov tub leg num hauv lawv lub koom txoos? Muaj ib tug muam npe hu ua Npauj b uas nyob hauv teb chaws Npaulivias (Bolivia) hais tias: “Vim muaj cov tub leg num, kuv thiaj li tau zoo mloog thaum mus kev sib txoos. Xws li kuv tau zoo hu nkauj, tsa tes teb, mloog lus qhuab qhia, saib tej yeeb yaj kiab thiab duab uas tso tawm. Lawv saib xyuas kom tsis txhob muaj xwm dab tsi, thiab pab cov uas saib kev sib txoos saum huab saum cua. Tom qab kev sib txoos lawv pab coj sawv daws tu vaj tu tsev, saib xyuas tej nyiaj txiag, thiab saib kom muaj ntaub ntawv rau sawv daws siv. Kuv yeej ris lawv txiaj ntsig kawg li!” Nyob rau teb chaws Khauloonpia (Colombia) muaj ib tug muam npe hu ua Lig muaj ib tug txiv uas yog txwj laus hais tias: “Kuv tus txiv yeej vam khom cov tub leg num los mus pab tuav cov hauj lwm nyob hauv lub koom txoos. Yog tsis muaj lawv mas ntshe hauj lwm yuav ntau heev. Kuv zoo siab kawg li uas lawv muaj lub siab dawb paug xav pab.” Ua li koj ho xav li cas txog cov tub leg num uas nyob hauv koj lub koom txoos?​—1 Timautes 3:13.

7. Peb yuav ua qhia tias peb ris cov tub leg num txiaj ntsig li cas? (Saib daim duab.)

⁷ Txawm tias peb xav tias peb ris cov tub leg num txiaj ntsig los nyob hauv phau Vajlugkub hais kom peb ua qhia tias peb ris lawv txiaj ntsig. (Kaulauxais 3:15) Nyob rau teb chaws Filees (Finland) muaj ib tug txwj laus npe hu ua Thoj qhia tias nws ris lawv txiaj ntsig li no, “Kuv xa ib daim ntawv los sis ntaus ntawv hauv xov tooj mus rau tus tub leg num. Kuv xa ib nqe Vajlugkub thiab qhia tias nws tau ua dab tsi rau dab tsi los mus txhawb kuv los sis vim li cas kuv ho ris nws txiaj ntsig.” Nyob rau  ntawm lub pov txwv Nus Khaledaunias (New Caledonia) muaj ib nkawm niam txiv niaj zaus thov Vajtswv pab cov tub leg num. Tus txiv hais tias, “Tau ntu no wb niaj zaus thov Vajtswv pab cov tub leg num thiab ua Vajtswv tsaug tias muaj lawv.” Yehauvas yeej hnov tej lus thov zoo li no thiab tej lus thov no yeej pab tau lub koom txoos heev.​—2 Kauleethaus 1:11.

COV TXWJ LAUS “MUAB SIAB RAU UA HAUJLWM”

8. Vim li cas Povlauj ho sau tias cov txwj laus nyob thawj 100 xyoo “muab siab rau ua haujlwm”? (1 Thexalaunikes 5:12, 13)

⁸ Nyob rau thawj 100 xyoo, cov txwj laus yeej sib zog ntsos ua hauj lwm heev hauv lub koom txoos. (Nyeem 1 Thexalaunikes 5:12, 13; 1 Timautes 5:17) Lawv coj kev sib txoos thiab ua cov txiav txim siab rau lub koom txoos. Lawv kuj qhuab ntuas cov kwv tij nkauj muam xwv thiaj pab tau cov kwv tij nkauj muam tuav rawv kev ntseeg. (1 Thexalaunikes 2:11, 12; 2 Timautes 4:2) Tsis tas li ntawd, cov txwj laus kuj sib zog mus khwv kom koob tau lawv lub cuab lub yig thiab lawv yeej tsav lawv txoj kev sib raug zoo nrog Yehauvas kom ruaj khov khwb kho.​—1 Timautes 3:2, 4; Titus 1:6-9.

9. Cov txwj laus tes hauj lwm yog dab tsi?

⁹ Cov txwj laus niaj hnub nim no khwv heev. Lawv qhia txoj xov zoo rau tib neeg. (2 Timautes 4:5) Lawv ntaus thawj hlo mus tshaj tawm txoj xov zoo, lawv npaj seb yuav mus qhia koog twg, thiab lawv cob qhia peb kom txawj mus tshaj tawm. Lawv kuj tu plaub ntug, thiab thaum lawv tu los lawv muaj lub siab khuv leej thiab tsis xaiv leej twg ntsej muag. Thaum ib tug twg hauv lub koom txoos ua txhaum loj, cov txwj laus yeej pab kho kom tus ntawd rov qab nrog Yehauvas sib raug zoo dua. Lawv kuj ua tib zoo saib xyuas kom lub koom txoos dawb huv. (1 Kauleethaus 5:12, 13; Kalatias 6:1) Cov txwj laus zoo tam li cov tswv yug yaj. (1 Petus 5:1-3) Lawv cev lus qhuab qhia, nrog txhua tus tham kom paub txhua tus zoo, thiab lawv mus txhawb cov kwv tij nkauj muam lub zog. Ib txhia txwj laus kuj pab kho thiab tu lub Tsev Nceeg Vaj, npaj lub rooj sib txoos loj, ua pab kwv tij sawv cev kev kho mob, ua pab kwv tij mus txhawb cov muaj mob, thiab lwm yam hauj lwm uas hais tsis txhij tsis txhua. Cov txwj laus yeej khwv heev los pab peb!

10. Vim li cas peb ho ris cov txwj laus txiaj ntsig?

¹⁰ Yehauvas tau qhia tseg tias yuav muaj ib co tswv yug yaj los saib xyuas peb mas peb yuav “tsis txhawj tsis ntshai.” (Yelemis 23:4) Nyob teb chaws Filees muaj ib tug muam npe hu ua Maim uas nws niam muaj mob hnyav heev. Maim hais tias: “Yeej tsis yooj yim rau kuv qhia siab rau leej twg. Tiam sis muaj ib tug txwj laus uas kuv tsis paub zoo pes tsawg ua siab ntev rau kuv, thov Vajtswv rau kuv, thiab qhia tias Yehauvas hlub kuv. Kuv tsis nco qab tej nws hais tag lawm tiam sis kuv nco ntsoov tias kuv tsis ntshai dab tsi li lawm. Kuv ntseeg hais tias Yehauvas txib nws tuaj pab kuv raws caij raws nyoog kawg li.” Ua li cov txwj laus nyob hauv koj lub koom txoos tau pab koj li cas?

11. Peb yuav ris cov txwj laus txiaj ntsig li cas? (Saib daim duab.)

¹¹ Yehauvas xav kom peb ris cov txwj laus txiaj ntsig “rau qhov lawv muab siab rau ua haujlwm.” (1 Thexalaunikes 5:12, 13) Nyob hauv teb chaws Filees kuj muaj ib tug muam npe hu ua Nplias hais tias: “Txawm cov txwj laus yeej txaus siab hlo pab lwm tus los lawv kuj muaj qav muaj num ntau ntau ua thiab lawv kuj muaj lawv teeb meem hauv lawv lub neej thiab. Muaj qee lub sij hawm kuv qhia rau lawv paub tias, ‘Kuv xav kom koj paub tias koj  yog ib tug txwj laus zoo heev.’” Nyob hauv teb chaws Rhawkis (Türkiye) muaj ib tug muam npe hu ua Vab hais tias: “Cov txwj laus yuav tau muaj kev txhawb zog thiab, lawv thiaj ua taus lawv tes hauj lwm. Peb thiaj li sau ntawv mus rau lawv, caw lawv nrog peb noj ib pluag mov ua ke, los sis nrog lawv mus tshaj tawm txoj xov zoo.” Ua li puas muaj ib tug txwj laus uas koj ris nws txiaj ntsig? Nco ntsoov nrhiav ib txoj hau kev los qhia tias koj ris nws txiaj ntsig.​—1 Kauleethaus 16:18.

COV SAIB XYUAS THAJ TSAM TXHAWB SAWV DAWS LUB ZOG

12. Yexus tau muab leej twg los mus txhawb tej koom txoos thiab? (1 Thexalaunikes 2:7, 8)

¹² Yexus kuj xaiv ib co txiv neej los mus pab lub koom txoos. Nws siv cov txwj laus hauv lub nroog Yeluxalees kom xa Povlauj, Npananpas thiab lwm cov mus ua cov saib xyuas thaj tsam. (Tes Hauj Lwm 11:22) Tau tsa cov saib xyuas thaj tsam no los mus txhawb tej koom txoos. (Tes Hauj Lwm 15:40, 41) Lawv txaus siab tso ntau yam tseg thiab sej lawv txoj sia los mus qhia thiab txhawb lwm tus lub zog.​—Nyeem 1 Thexalaunikes 2:7, 8.

13. Cov saib xyuas thaj tsam tes hauj lwm yog dab tsi?

¹³ Cov saib xyuas thaj tsam mus ncig xyuas txhua qhov. Tej txhia lawv yuav tau mus deb deb kom thiaj mus txog tej koom txoos. Txhua txhua lub lim tiam tus saib xyuas thaj tsam cev lus qhuab qhia thiab mus txhawb cov kwv tij nkauj muam. Nws kuj ua tus coj thaum mus tshaj tawm txoj xov zoo, ntsib nrog cov tho kev, thiab cov txwj laus. Nws npaj lus qhuab qhia rau tej rooj sib txoos thiab saib xyuas kom txhua yam ntws mus zoo. Nws qhia txoj kev kawm rau cov thov kev, npaj txoj kev sib txoos tshwj xeeb nrog cov tho kev hauv nws thaj tsam, thiab ua tej yam uas ceg Npe-ee txib kom nws ua.

14. Vim li cas peb ho ris cov saib xyuas thaj tsam txiaj ntsig?

 ¹⁴ Cov saib xyuas thaj tsam pab tau tej koom txoos li cas? Nyob rau teb chaws Rhawkis muaj ib tug kwv tij hais tias: “Qhov uas tus saib xyuas thaj tsam tuaj xyuas lub koom txoos, pab tau kom kuv muaj siab xav mus pab cov kwv tij nkauj muam. Kuv ntsib ntau tus saib xyuas thaj tsam, yeej tsis muaj ib tug yuav ua zoo nkaus li nws tsis muaj sij hawm nrog kuv tham li.” Maim nrog tus saib xyuas thaj tsam mus tshaj tawm txoj xov zoo tiam sis tsis muaj neeg nyob tsev. Nws hais tias: “Txawm li ntawd los kuv yeej yuav nco ntsoov hnub ntawd. Kuv ob tug viv ncaus tsiv mus nyob deb deb lawm mas kuv nco nkawd heev. Tus saib xyuas thaj tsam txhawb kuv tias txawm peb cov viv ncaus nyob ntuj ncua kev deb lawm los tsuas yog ib nyuag ntu xwb. Thaum txog lub ntiaj teb tshiab, peb yuav muaj sij hawm ntau heev nyob ua ke.” Muaj coob leej ntau tus saib xyuas thaj tsam yeej pab tau cov uas lawv mus xyuas.​—Tes Hauj Lwm 20:37–21:1.

15. (1) Raws li 3 Yauhas 5-8, peb yuav ris cov saib xyuas thaj tsam txiaj ntsig li cas? (Saib daim duab.) (2) Vim li cas peb yuav tau ris cov kwv tij uas saib xyuas lub koom txoos cov poj niam txiaj ntsig, thiab peb yuav ua li ntawd li cas? (Saib lub ntsiab “ Nco Ntsoov Lawv Cov Poj Niam.”)

¹⁵ Tus tub txib Yauhas txhawb kom Nkayus tos txais cov kwv tij uas tuaj txhawb cov koom txoos thiab hais tias: “Thaum lawv yuav mus lwm qhov, thov koj pab lawv kom tsimnyog qhov uas lawv ua Vajtswv txoj haujlwm.” (Nyeem 3 Yauhas 5-8.) Qhov uas peb ua li Yauhas hais yog thaum peb caw ib tug saib xyuas thaj tsam mus noj mov. Hos ib qho yog peb mus koom txoj kev sib txoos mus tshaj tawm thaum tus saib xyuas thaj tsam tuaj xyuas. Lig kuj hais tias: “Kuv thov kom Yehauvas pab lawv muaj txawm peem. Kuv tus txiv wb kuj sau ntawv mus qhia rau nkawd tias  qhov uas nkawd tuaj xyuas ntawd pab tau wb heev.” Nco ntsoov tias cov saib xyuas thaj tsam yeej txawj nkees ib yam li peb thiab. Tej thaud lawv kuj muaj mob muaj nkeeg, muaj kev nyuaj siab thiab qaug zog. Tej zaud koj lo lus zoo los sis qhov khoom koj muab pub yog yam uas lawv thov Yehauvas txog.​—Pajlug 12:25.

PEB XAV TAU COOB TUS KWV TIJ LOS TUAV HAUJ LWM

16. Raws li Pajlug 3:27, cov kwv tij yuav tau rov tshuaj lawv tus kheej li cas?

¹⁶ Nyob thoob plaws hauv ntiaj teb no peb yeej xav tau cov kwv tij los mus tuav hauj lwm hauv lub koom txoos. Yog koj yog ib tug kwv tij uas twb ua kev cai raus dej lawd, koj puas kam pab? (Nyeem Pajlug 3:27.) Koj puas npaj koj tus kheej kom ua tau ib tug tub leg num? Yog tias koj yog ib tug tub leg num, koj puas npaj kom koj ua tau ib tug txwj laus? c Koj puas hloov tau tej yam hauv koj lub neej xwv koj thiaj mus kawm tau txoj Kev Kawm Rau Cov Qhia Lub Nceeg Vaj? Lub tsev kawm ntawv no yuav pab tau kom Yexus yim huab siv tau koj ua ntau yam. Yog tias koj xav tias koj zoo tsis txaus ces thov Yehauvas pab. Thov kom Yehauvas muab nws lub hwj huam dawb huv pab koj ua tau tes hauj lwm uas tau muab rau koj.​—Lukas 11:13; Tes Hauj Lwm 20:28.

17. Cov tuav hauj lwm hauv lub koom txoos qhia li cas txog peb tus Vaj Ntxwv Yexus Khetos?

¹⁷ Tej hauj lwm uas cov kwv tij sib sib zog ua no qhia tias Yexus yog tus uas coj peb nyob rau lub sim ceeb kawg no. (Mathais 28:20) Peb yeej ris txiaj ntsig tias peb muaj ib tug Vaj Ntxwv uas muaj kev hlub thiab siab dawb siab zoo heev nws thiaj li npaj ib co kwv tij los mus pab peb. Nco ntsoov nrhiav txoj hau kev los mus qhia tias koj ris cov kwv tij no tus txiaj tus ntsig. Tsis tas li ntawd, ua Yehauvas tsaug vim nws yog tus muab “ib puas tsav yam uas zoo thiab ib puas tsav yam koob hmoov uas zoo kawg nkaus” rau peb.​—Yakaunpaus 1:17.