1, 2. Ua li cas phau Vajlugkub thiaj yog ib qho khoom pub zoo kawg li los ntawm Vajtswv los?

PUAS tau muaj ib zaug uas koj tau txais ib qho khoom pub zoo heev los ntawm ib tug phoojywg los? Thaum koj tau txais qhov khoom pub ntawd, tej zaum koj yuav zoo siab kawg li. Qhov khoom pub ntawd yeej qhia tias tus neeg ntawd saib koj txojkev sib raug zoo nrog nws muaj nqes heev. Vim nws xav txog koj, koj yeej yuav nco nws txiaj ntsig thiab ua nws tsaug, puas yog?

² Phau Vajlugkub yog ib qho khoom pub los ntawm Vajtswv los. Peb yuav tsum nco Vajtswv txiaj ntsig rau qhov khoom pub no. Yeej tsis muaj ib phau ntawv zoo li phau Vajlugkub. Tej yam uas peb kawm hauv phau Vajlugkub, peb yeej kawm tsis tau lwm qhov li. Phau Vajlugkub qhia txog tej yam zoo li cas xwb? Phau Vajlugkub qhia peb txog thaum Vajtswv tsim ntuj tsim teb, thiab tsim thawj khub niam txiv. Phau Vajlugkub kuj muaj tej lus qhia uas pab peb nyiaj dhau tej kev ntxhov siab hauv lub neej no. Tsis tas li ntawd xwb, phau Vajlugkub qhia tias Vajtswv yeej yuav ua kom muaj tiav raws li nws lub ntsiab, thiab kom lub ntiajteb no rov qab  zoo tuaj. Twb yog vim li no, phau Vajlugkub thiaj yog ib qho khoom pub zoo kawg li!

3. Qhov uas peb tau txais phau Vajlugkub ua pov thawj li cas, thiab ua li cas qhov no ua rau peb zoo siab?

³ Phau Vajlugkub kuj yog ib qho khoom pub uas ua rau peb zoo siab kawg li. Vim li cas? Vim tias qhov uas peb tau txais phau Vajlugkub ua pov thawj tias Yehauvas, tus uas pub phau Vajlugkub, xav kom peb paub nws zoo. Phau Vajlugkub yeej yuav pab koj txav ze rau Yehauvas.

4. Vim li cas tsis muaj ib phau ntawv yuav zoo li phau Vajlugkub?

⁴ Yog tias koj muaj ib phau Vajlugkub, ces koj muaj ib phau ntawv uas coob leej ntau tus muaj lawm thiab. Tibneeg tau muab phau Vajlugkub txhais txog li 2,600 yam lus. Muaj tej yam lus twb txhais txhij lawm, tiamsis ib txhia txhais txog nrab xwb. Yog li ntawd, 95 feem pua ntawm cov tibneeg hauv lub qab ntuj no nrhiav tau phau Vajlugkub los nyeem. Muaj tshaj li 1 plhom phau Vajlugkub raug tseb tawm txhua txhua lub lim tiam. Thiab tau muaj qas txhiab qas vam phau Vajlugkub raug luam tawm los lawm. Twb yog vim li no, thiaj tsis muaj ib phau ntawv yuav zoo li phau Vajlugkub.

5. Ua li cas ho hais tau tias “Vajtswv tshoov neeg” sau phau Vajlugkub?

 ⁵ Tsis tas li ntawd xwb, phau Vajlugkub yog “Vajtswv tshoov neeg lub siab kom neeg sau.” (Nyeem 2 Timaute 3:16. *) Vajtswv tshoov neeg lub siab li cas? Phau Vajlugkub qhia tias Vajtswv siv nws lub hwj huam dawb huv los tshoov neeg lub siab kom lawv qhia raws li Vajtswv txojkev xav xwb. (2 Petus 1:21) Muab ua piv txwv li no: Ib leej txiv xav sau ntawv mus rau nws cov kwvtij. Yog li ntawd, nws hais kom nws tus tub pab sau rau nws. Tsab ntawv no yog leej txiv cov lus. Yog li ntawd, txawm tias tus tub yog tus pab sau los, tsab ntawv no yog leej txiv tsab ntawv. Ib yam li ntawd, phau Vajlugkub yog Vajtswv cov lus, tsis yog cov neeg uas pab sau phau Vajlugkub cov lus. Yog li ntawd, txhua nqe hauv phau Vajlugkub yeej yog “Vajtswv txojlus” tiag.​—1 Thexalaunika 2:13.

6, 7. Vim li cas tsim nyog qhuas qhov uas phau Vajlugkub sib dhos?

⁶ Tau siv sijhawm ntev li 1,600 xyoo los sau phau Vajlugkub. Cov neeg uas sau phau Vajlugkub nyias muaj nyias ib lub neej, thiab nyias nyob nyias ib tiam. Ib txhia yog neeg ua liaj ua teb, ib txhia yog neeg ntaus ntses, thiab ib txhia yog neeg yug yaj. Tsis tas li ntawd xwb, ib txhia yog cov neeg cev Vajtswv lus, ib txhia yog cov ua thawj, thiab ib txhia yog cov vajntxwv. Tus uas sau phau ntawv Luka yog ib tug kws kho mob. Txawm tias cov neeg sau phau Vajlugkub nyias muaj nyias ib lub neej los, phau Vajlugkub tsis sib cov nyom. Txhua nqe hauv phau Vajlugkub yeej hais sib dhos huv tibsi.

⁷ Tej keeb kwm hauv phau Vajlugkub qhia txog ntau txhiab xyoo. Thawj phau ntawv hauv phau Vajlugkub qhia tias noob neej tej teeb meem pib li cas. Ces phau ntawv tom kawg qhia tias yuav muab tag nrho lub ntiajteb kho ua ib lub vaj kaj siab.  Txhua nqe puavleej pab peb to taub tias Vajtswv lub ntsiab yog dabtsi, thiab lub ntsiab ntawd yuav muaj tiav li cas. Qhov uas txhua nqe hauv phau Vajlugkub sib dhos li no ua rau peb xav tsis thoob li! Tej no pab kom peb pom tias phau Vajlugkub los ntawm Vajtswv los tiag, puas yog?

8. Ua li cas peb thiaj paub tias tej txujci ntsig txog lub ntiajteb uas phau Vajlugkub qhia txog muaj tseeb tiag?

⁸ Tej txujci ntsig txog lub ntiajteb uas phau Vajlugkub qhia txog, yeej muaj tseeb tiag. Muaj tej yam uas tibneeg tsis tau tshawb nrhiav txog, tiamsis phau Vajlugkub twb qhia ua ntej txog tej ntawd lawm. Zoo li yav thaum ub, tej haiv neeg uas nyob ib ncig cov Yixayee tsis paub txog qhov uas tu cev kom huv siab si, thiab muab cov neeg muaj mob cais rau lwm qhov. Tiamsis phau Vajlugkub twb qhia ua ntej hauv phau ntawv Levi Tej Kevcai tias, cov Yixayee yuav tsum coj li ntawd. Yav thaum ub tibneeg kuj xav yuam kev tias lub ntiajteb tiaj tiaj. Tiamsis phau Vajlugkub twb hais ua ntej lawm tias lub ntiajteb kheej kheej li ib lub voj voos. (Yaxaya 40:22, NW) Muaj ib txhia kuj ntseeg tias muaj dabtsi txheem lossis dai lub ntiajteb. Tiamsis phau Vajlugkub qhia tseeb ua ntej lawm tias lub ntiajteb “dai rau lub chaw uas nyob khoob ntshuv.” (Yauj 26:7) Phau Vajlugkub tsis yog ib phau ntawv uas yuav qhia txhua yam txog tej txujci hauv lub ntiajteb. Tiamsis thaum phau Vajlugkub qhia txog tej txujci ntawd, yeej muaj tseeb tiag. Ib phau ntawv uas los ntawm Vajtswv los yeej yuav tsum qhia tseeb li ntawd, puas yog?

9. (1) Ua li cas peb thiaj paub tias phau Vajlugkub qhia tseeb raws li keeb kwm? (2) Cov uas sau phau Vajlugkub yeej tsis zais lawv tej kev txhaum li. Qhov no ua rau koj xav li cas txog phau Vajlugkub?

⁹ Phau Vajlugkub qhia tseeb raws li tej keeb kwm. Phau Vajlugkub yeej piav meej txog tej yam uas tau muaj tshwm sim. Phau Vajlugkub tsis yog qhia txog cov neeg yav tas los tej npe xwb, tiamsis phau Vajlugkub kuj qhia tias cov neeg ntawd los ntawm caj ces twg los. * Tsis tas li ntawd xwb, cov neeg uas sau phau Vajlugkub yog neeg ncaj ncees. Lawv tau muab lawv  thiab lawv haiv neeg tej kev txhaum sau cia rau hauv phau Vajlugkub. Lawv coj txawv ntawm lwm cov neeg sau keeb kwm, uas muab tej yam tsis zoo txog lawv haiv neeg zais cia. Zoo li hauv phau ntawv Xwm Txheej Taug Kev, Mauxe sau txog thaum nws tau ua txhaum loj heev, Vajtswv thiaj tau ntuas nws. (Xwm Txheej Taug Kev 20:2-12) Tsis muaj ib phau ntawv keeb kwm yuav qhia tseeb li phau Vajlugkub rau qhov phau Vajlugkub yog los ntawm Vajtswv los.

10. Vim li cas phau Vajlugkub yog ib phau ntawv uas pab tau tibneeg heev?

¹⁰ Phau Vajlugkub yog Vajtswv tshoov kom neeg sau, thiaj “siv tau qhuab qhia, qhuab ntuas, qhia tus uas txhaum rov ua zoo, thiab cob qhia ua ncaj ua ncees.” (2 Timaute 3:16) Yog li ntawd, phau Vajlugkub yog ib phau ntawv uas pab tau peb tiag, rau qhov phau Vajlugkub yog los ntawm Vajtswv Yehauvas lub tswvyim los! Nws yog tus Tswv Tsim uas paub peb txojkev xav thiab paub peb lub siab. Nws tseem paub peb zoo tshaj peb paub peb tus kheej lawm thiab. Tsis tas li ntawd xwb, Yehauvas paub tias peb yuav tsum ua li cas peb thiaj muaj kev zoo siab. Nws kuj paub tias peb yuav tsum tau zam tej yam twg thiab.

11, 12. (1) Thaum Yexus hais nws zaj lus qhuab qhia saum roob, nws qhia txog dabtsi xwb? (2) Phau Vajlugkub qhia txog dabtsi ntxiv? Thiab vim li cas tej lus qhia ntawd yuav pab tau tibneeg lub neej mus li?

¹¹ Xav txog Yexus zaj lus qhuab qhia saum roob. Yexus cov lus qhia ntawd tau muab sau cia rau hauv Mathai tshooj 5 txog 7. Zaj lus qhia ntawd zoo tshaj plaws li. Yexus tau qhia txog ntau yam. Nws qhia tias yuav ua li cas thiaj muaj kev zoo siab tiag, yuav thov Vajtswv li cas, thaum muaj kev tsis sib haum xeeb yuav tu plaub ntug li cas, thiab peb yuav tsum xav li cas txog nyiaj txiag thiab tej qhov txhia chaw. Lub sijhawm ntawd, Yexus cov lus pab tau cov tibneeg kawg li. Niaj hnub no los Yexus cov lus qhia ntawd tseem pab tau peb ib yam nkaus thiab.

¹² Tej lus qhia hauv phau Vajlugkub pab tau lub cuab lub yig, pab kom tibneeg paub ua haujlwm zoo, thiab pab kom tibneeg muaj kev sib raug zoo nrog lwm leej lwm tus. Tej lus qhia hauv phau Vajlugkub yeej pab tau txhua haiv neeg. Tej lus ntawd yeej yuav pab tau tibneeg lub neej mus li. Vajtswv thiaj tshoov kom nws tus tub qhe Yaxaya sau li no txog tej lus qhia hauv phau Vajlugkub: “Kuv yog [Yehauvas], yog nej tus Vajtswv, kuv qhuab qhia tej uas muaj nuj nqes rau nej.”​—Yaxaya 48:17.

13. Yehauvas tau tshoov kom Yaxaya qhia li cas txog lub nroog Npanpiloo?

¹³ Phau Vajlugkub muaj ntau zaj lus faj lem. Muaj ntau zaj twb tiav lawm. Cia peb kawm txog ib zaj lus faj lem hauv phau Vajlugkub. Thaum ub Vajtswv tau tshoov kom nws tus tub qhe Yaxaya cev nws tej lus. Yaxaya tau cev lus ua ntej tias lub nroog Npanpiloo yuav raug puam tsuaj. (Yaxaya 13:19; 14:22, 23) Yaxaya qhia meej li no: Yuav muaj ib pab tub rog tuaj ua rau Npanpiloo tus dej nqhuab, ces lawv yuav hla mus rau hauv lub nroog, tsis tas ntaus rog kiag li. Tsis tas li ntawd xwb, Yaxaya zaj lus faj lem tseem qhia ntxiv tias tus vajntxwv uas kov yeej Npanpiloo lub npe yuav hu ua Xailab.​—Nyeem Yaxaya 44:27–45:2.

14, 15. Tej uas Yaxaya tau qhia meej txog Npanpiloo tau muaj tiav li cas?

¹⁴ Ob puas xyoo tom qab Yaxaya hais zaj lus faj lem ntawd, nyob rau lub 10 Hli tim 5, thaum ib tag hmo, xyoo 539 U.Nt.Y., * muaj ib pab tub rog tuaj tsuam yeej ze Npanpiloo.  Lawv tus thawj tub rog yog leejtwg? Yog ib tug vajntxwv Pawxia hu ua Xailab. Zaum no yuav muaj tiav raws li Yaxaya zaj lus faj lem tiag. Tiamsis Xailab cov tub rog puas yuav nkag tau mus rau hauv nroog Npanpiloo li tau hais tseg?

¹⁵ Hmo ntawd cov Npanpiloo ua noj ua haus tso siab lug, vim lawv xav tias lawv tej ntsa loog tuab thiab siab kawg li tiv thaiv lawv. Tiamsis thaum lawv tabtom ua tej ntawd, Xailab muab tus dej uas ntws ib ncig Npanpiloo cais mus rau lwm qhov lawm. Thaum tus dej nqeg lawm, Xailab thiab nws cov tub rog mam hla mus rau ntawm Npanpiloo tus ntsa loog. Tiamsis zaum no lawv yuav nkag mus rau hauv lub nroog li cas? Ua ciav, hmo ntawd lub rooj loog nyob qheb lug cia xwb!

16. (1) Yaxaya qhia tias thaum kawg yuav ua li cas rau Npanpiloo? (2) Yaxaya zaj lus faj lem txog Npanpiloo tau muaj tiav li cas?

¹⁶ Yaxaya tau qhia tseg li no txog Npanpiloo: “Yuav tsis muaj leejtwg mus nyob hauv Npanpiloo lossis nyob txhua tiam neeg. Yuav tsis muaj ib tug Alam mus tsa tsev ntaub rau hauv, thiab tsis muaj ib tug yug yaj yuav coj nws pab yaj mus pw rau qhov ntawd.” (Yaxaya 13:20) Zaj lus faj lem no tsis yog qhia tias lub nroog Npanpiloo yuav poob xwb. Tiamsis nqe no qhia tias Npanpiloo yuav nyob do cuas cia mus li. Niaj hnub no yeej muaj raws nraim li zaj lus faj lem no tiag.  Tamsim no lub nroog Npanpiloo nyob deb li 50 mais kev rau sab qab teb ntawm lub nroog Baghdad, hauv tebchaws Iraq. Yeej tsis muaj neeg nyob lub nroog Npanpiloo ntawd los txog niaj hnub nimno. Tej no qhia tias muaj raws li Yehauvas tau hais rau Yaxaya tias: “Kuv yuav xuas rab khaub rhuab uas yog kev puam tsuaj cheb kom du lug.”​—Yaxaya 14:22, 23.

17. Qhov uas tej lus faj lem hauv phau Vajlugkub muaj tiav tiag, txhawb tau peb txojkev ntseeg li cas?

¹⁷ Qhov uas tej lus faj lem hauv phau Vajlugkub tau muaj tiav tiag, txhawb tau peb txojkev ntseeg kawg li, puas yog? Yog tias Yehauvas twb ua raws li nws tej lus cog tseg yav tas los, ces peb yeej tso siab tau tias, nws yuav ua raws li nws lo lus cog tseg txog lub vaj kaj siab. (Nyeem Xwm Txheej Taug Kev 23:19.) Yog li ntawd, peb “muaj vam tias yuav tau txojsia ib txhis tsis kawg uas Vajtswv tus tsis txawj dag tau cog lus tseg thaum chiv keeb los lawm.”​—Titau 1:2. *

18. Tus tubtxib Povlauj tau hais li cas txog “Vajtswv txojlus”?

¹⁸ Raws li peb tau kawm hauv tshooj no, peb pom tseeb tias yeej tsis muaj ib phau ntawv uas zoo li phau Vajlugkub. Peb tau kawm tias txhua nqe hauv phau Vajlugkub yeej hais sib dhos, phau Vajlugkub qhia tseeb txog lub ntiajteb thiab qhia raws li tej keeb kwm, phau Vajlugkub tej lus qhia yeej pab tau tibneeg lub neej tiag, thiab phau Vajlugkub muaj tej lus faj lem uas peb ntseeg tau. Tiamsis phau Vajlugkub tseem zoo tshaj li peb tau kawm no thiab. Tus tubtxib Povlauj tau sau li no: “Vajtswv txojlus muaj sia zees nyob thiab muaj hwjchim.  Txojlus ntawd ntse dua rab ntaj ob sab ntse nkaug mus txog nruabplab nruabplawv, nruabnqaij nruabtxha. Txojlus ntawd paub tej uas neeg xav thiab neeg lub siab.”​—Henplais 4:12, VTL.

19, 20. (1) Phau Vajlugkub yuav pab koj ntsuam xyuas koj tus kheej li cas? (2) Koj yuav qhia tias koj nco Yehauvas txiaj ntsig rau phau Vajlugkub li cas?

¹⁹ Yog tias peb nyeem Vajtswv “txojlus” hauv phau Vajlugkub, yuav hloov tau peb lub neej. Phau Vajlugkub pab kom peb hajyam paub ntsuam xyuas peb tus kheej seb peb zoo li cas tiag. Tej zaum peb hais tias peb hlub Vajtswv, tiamsis lub neej uas peb coj puas qhia tau tias peb mloog Vajtswv Txojlus tiag? Phau Vajlugkub yuav pab tau peb pom tias peb lub siab zoo li cas tiag.

²⁰ Phau Vajlugkub yeej yog ib phau ntawv uas los ntawm Vajtswv los tiag tiag li. Zoo rau peb nyeem thiab kawm phau Vajlugkub, thiab peb yuav tsum saib phau Vajlugkub rau nqe. Yog tias peb niaj hnub nyeem phau Vajlugkub ces yuav qhia tias peb nco Yehauvas txiaj ntsig rau qhov khoom pub no. Thaum peb ua li no, ces peb hajyam yuav to taub Vajtswv lub ntsiab rau noob neej. Nyob rau Tshooj 3, peb yuav kawm ntxiv txog lub ntsiab ntawd, thiab kawm seb lub ntsiab ntawd yuav muaj tiav li cas.