Txij thaum Xamuyee me, nws yeej nyob thiab ua haujlwm ntawm lub tsev ntaub, uas yog qhov chaw uas tibneeg mus pe hawm Yehauvas. Koj puas paub yog vim li cas Xamuyee ho tau nyob thiab ua haujlwm ntawm lub tsev ntaub? Ua ntej peb kawm txog qhov no, cia peb mus kawm txog Hana uas yog Xamuyee niam tso.

Tau ntev heev, Hana xav muaj menyuam los nws muaj tsis taus li. Yog li ntawd, Hana thiaj thov Yehauvas pab kom nws muaj taus menyuam. Nws tau cog lus rau Yehauvas tias yog Yehauvas pab nws yug tau ib tug tub, ces nws yuav cia mus nyob thiab ua haujlwm ntawm lub tsev ntaub. Yehauvas ua li Hana thov, ces Hana thiaj yug tau ib tug tub. Hana muab tus tub ntawd hu ua Xamuyee. Thaum Xamuyee muaj li 3 lossis 4 xyoos, Hana thiaj coj nws mus nyob ntawm lub tsev ntaub teev tiam Yehauvas li nws tau cog lus tseg.

Eli yog tus pov thawj hlob ntawm lub tsev ntaub. Nws 2 tug tub los kuj ua haujlwm ntawd thiab. Koj puas nco qab, lub tsev ntaub yog qhov chaw uas pe hawm Yehauvas. Yog li ntawd, cov neeg uas ua haujlwm ntawm lub tsev ntaub yuav tsum ua qhov zoo xwb. Tiamsis Eli 2 tug tub ua phem heev. Xamuyee kuj pom nkawd ua phem heev thiab. Ua li, Xamuyee puas ua phem li Eli 2 tug tub?— Xamuyee tsis ua phem. Rau qhov nws niam nws txiv qhia kom nws ua zoo xwb.

Koj xav puas zoo rau Eli muab nws 2 tug tub rau txim?— Eli yuav tsum muab nkawd rau txim. Thiab nws yuav tsum tsis txhob pub nkawd ua haujlwm ntawm Vajtswv lub tsev ntaub ntxiv lawm. Tiamsis Eli tsis ua li ntawd. Yog li ntawd, Yehauvas thiaj npau taws rau nws thiab nws 2 tug tub. Yehauvas thiaj rau txim rau lawv.

Muaj ib hmos thaum Xamuyee pw, nws hnov ib tug hu nws tias: ‘Xamuyee!’ Ces nws txawm dhia mus ntawm Eli, tiamsis Eli hais tias: ‘Kuv tsis tau hu koj.’ Txawm muaj li no 2 zaug ntxiv. Tom qab zaum 3, Eli thiaj qhia rau Xamuyee tias yog nws hnov tus ntawd hu nws dua, ces nws yuav tsum teb tias: ‘Yehauvas, thov cia li hais, kuv tabtom  mloog koj.’ Xamuyee thiaj ua li Eli tau qhia nws. Yehauvas thiaj hais rau Xamuyee tias: ‘Mus hais rau Eli tias kuv yuav rau txim rau Eli thiab nws tsev neeg rau tej kev phem uas lawv tau ua.’ Koj xav Xamuyee puas ntshai mus qhia cov lus no rau Eli?— Xamuyee ntshai heev. Tiamsis txawm nws ntshai heev los, nws ua raws nkaus li Yehauvas hais rau nws. Thaum kawg, thiaj muaj raws nkaus li Yehauvas hais. Eli 2 tug tub raug tua tuag, thiab Eli los kuj tuag lawm.

Xamuyee ua tau zoo heev rau peb kawm. Txawm lwm tus ua phem los, nws tsis ua li lawv. Nws tsuas ua zoo xwb. Ua li, koj ne? Koj puas xav kom koj ua tau li Xamuyee thiab es ua zoo xwb? Yog koj xav, koj yuav ua rau Yehauvas thiab koj niam koj txiv zoo siab heev.