Koj puas ntshai tus kab mob COVID-19? Tus kab mob no puas ua rau koj ntxhov siab? Yog tus kab mob no ua rau koj ntxhov siab, tsis yog koj tib leeg xwb thiaj ntxhov siab li no. Twb tau ntau lub hli los lawm uas tib neeg thoob ntiaj teb yuav tau hloov lawv lub neej vim tus kab mob no. Tus kws kho mob Ham Khunkas uas saib xyuas lub koom haum tshuaj xyuas kev noj qab haus huv (WHO) sab Yus Luv hais tias coob tus “siv zog los tiv thaiv tus kab mob COVID-19, thaum muaj li no ua rau ib txhia cia li tsis qab siab thiab tsis xav ua ib yam dab tsi li lawm. Qhov no qhia tias coob tus tab tom nyuaj siab rau tus kab mob kis no.”

 Tus kab mob no puas ua rau koj qaug zog zis? Yog tus kab mob no ua rau koj nyuaj siab tsis txhob qaug zog. Phau Vajlugkub twb pab tau coob leej ntau tus nyiaj dhau thaum muaj tus kab mob kis no lawm. Kuj yuav pab tau koj thiab.

•  Dab tsi qhia tias koj tab tom qaug zog rau tus kab mob kis?

•  Yog koj qaug zog yuav tsim teeb meem li cas?

•  Vajlugkub tej hauv paus ntsiab lus twg yuav pab tau koj kov yeej tus kab mob no?

•  Tej nqe Vajlugkub uas pab tau koj rau lub sij hawm muaj tus kab mob kis

 Txij ntua thaum muaj tus kab mob no ua rau coob leej ntau tus qaug zog kawg nkaus li thiab tsis paub lub neej yav tom hauv ntej yuav zoo li cas. Yog koj qaug zog qhov ntawd tsis yog ib tug mob. Nram no yog qee yam uas qhia tias koj qaug zog:

•   Koj tsis qab siab ua ib yam dab tsi li

•   Koj noj thiab pw tsis zoo li qub lawm

•   Koj ua tsis taus siab ntev

•   Koj nyuaj siab txog tej yam hauj lwm yooj yim

•   Koj pheej xav txog ntau yam

•   Koj tag kev cia siab

 Yog peb nyuaj siab dhau lawm ces yuav tsim teeb meem rau peb thiab lwm tus. Yog peb tsis ceev faj yuav ua rau peb qaug zog thiab tsis nco tiv thaiv tus kab mob COVID-19. Yog pheej zoo li no, ntev mus ntev tuaj txawm tus kab mob no tseem kis thiab ua rau coob tus tas sim neej los, peb yuav cia li kav liam. Yog peb coj li no peb yuav kis tau kab mob thiab kis tau rau lwm tus.

 Lub sij hawm uas muaj kev ntxhov siab no, muaj ib nqe Vajlugkub uas pab tau coob leej ntau tus. Nqe Vajlugkub ntawd hais tias: “Yog koj qaug zog thaum raug kev ntxhov siab ces yog koj siab yau heev.” (Pajlug 24:10) Phau Vajlugkub muaj tej hauv paus ntsiab lus uas txhawb tau peb lub zog rau lub caij uas muaj tus kab mob kis no.

•   Nyob nrug deb tiam sis tsis yog nyob twm zeej

   Phau Vajlugkub hais tias: “Tej phoojywg . . . paub sib pab thaum muaj kev txomnyem.”—Pajlug 17:17.

   Ua cas ho tseem ceeb? Phooj ywg zoo ib leeg yeej txhawb ib leeg lub zog. (1 Thexalaunikes 5:11) Tiam sis yog peb nyob ib leeg twm zeej xwb, ces yuav tsis zoo rau peb tus kheej.—Pajlug 18:1.

   Sim ua li no: Siv tej twj ntawm tes hu mus nrog koj cov phooj ywg tham, ntaus ntawv los sis xa E-mail los kuj tau thiab. Tej hnub yog koj kho siab dhau lawm cia li hu mus nrog koj cov phooj ywg tham, nug lawv moo seb lawv nyob li cas. Qhia seb neb ib leeg tiv thaiv tus kab mob ib leeg li cas. Ua tej yam zoo pub rau koj tus phooj ywg. Yog koj ua li no koj thiab koj tus phooj ywg neb yuav kaj siab tuaj.

•   Ua npaum li koj ua tau rau lub sij hawm no

   Phau Vajlugkub hais tias: “Nej yuav tsum siv txhua lub sijhawm kom muaj nqis.”—Efexus 5:16.

   Ua cas ho tseem ceeb? Yog koj siv lub sij hawm kom muaj nqis koj yuav tau hau ntsoov rau tej yam zoo xwb, koj yuav tsis txhawj xeeb txog tej kev nyuaj siab dhau lawm.—Lukas 12:25.

   Sim ua li no: Txhob xav txog tej yam uas yus ua tsis tau, tiam sis xav txog tej uas yus ua tau xwb. Xws li, koj nyiam ua tej yam twg kuj siv lub sij lawm no los ua tej ntawd. Los sis siv sij hawm nrog koj tsev neeg nyob kom ntau zog los kuj tau thiab.

•   Ua raws li koj teem tseg

   Phau Vajlugkub hais tias: “Txhua yam uas nej ua, nej yuav tsum ua kom zoo thiab tsis txhob lam ua dog ua dig.”—1 Kauleethaus 14:40.

   Ua cas ho tseem ceeb? Ib txhia yuav zoo siab dua yog lawv paub tias txhua hnub lawv yuav ua dab tsi.

   Sim ua li no: Npaj seb hnub no koj yuav ua dab tsi. Koj yuav nrhiav noj nrhiav haus, ua koj tej ntawv, tu vaj tu tsev thiab kawm Vajlugkub rau thaum twg? Muab koj tej hauj lwm no sau cia. Kuj zoo rau koj qee sij hawm los nrog koj tsev neeg, los dhia ua si thiab tawm mus ncig sab nraud. Ib sij los saib tej uas koj teem cia thiab muab kho raws li qhov tsim nyog.

•   Hloov raws caij raws nyoog

   Phau Vajlugkub hais tias: “Tus neeg paub qabhau pom tej xwm uas yuav los raug nws, nws txawm zam kev lawm.”—Pajlug 22:3.

   Ua cas ho tseem ceeb? Nyob ntawd seb koj nyob tham chaw twg, tej zaum thaj chaw koj nyob tej huab cua yuav tsis zoo koj tawm mus ncig ua si sab nraud zoov, yog zoo li no yuav tsis zoo rau koj lub cev, thiab yuav ua rau koj nyuaj siab.

   Sim ua li no: Lub caij ntuj no, kho koj chav nyob los sis chav ua hauj lwm kom tej sab hnub ci tuaj txog. Txawm yuav no los txhob nyob twj ywm hauv tsev xwb tawm mus ncig sab nraud thiab. Hnav khaub ncaws kom tuab xwv koj thiaj nyob tau sab nraud ntev zog.

   Lub caij ntuj sov, coob tus nyiam tawm mus nyob sab nraud. Yog koj yuav tawm rooj npaj seb koj yuav mus qhov twg, lub sij hawm twg thiaj tsis muaj neeg coob.

•   Kav tsij tiv thaiv tus kab mob COVID-19

   Phau Vajlugkub hais tias: “Cov neeg ruam tsis paub ceev faj, lawv lam tau lam ua.”—Pajlug 14:16.

   Ua cas ho tseem ceeb? Tus kab mob COVID-19 no tsiv heev txov tau peb txoj sia, yog peb tsis xyuam xim peb yuav kis tau tus kab mob no thiab.

   Sim ua li no: Ib sij saib xov xwm seb ntawm koj thaj tsam luag tiv thaiv tus kab mob li cas lawm, thiab koj puas tseem ua raws nraim li ntawd. Nco ntsoov tias tej uas koj ua tsis yog raug koj tus kheej xwb tseem yuav raug koj tsev neeg thiab luag lwm tus.

•   Nrog Vajtswv sib raug zoo

   Phau Vajlugkub hais tias: “Nej cia li los nyob ze Vajtswv, Vajtswv thiaj li los nyob ze nej.”—Yakaunpaus 4:8.

   Ua cas ho tseem ceeb: Vajtswv yuav pab tau koj nyiaj dhau koj tej teeb meem.—Yaxayas 41:13.

   Sim ua li no: Nyeem Vajtswv txoj lus txhua hnub. Daim kom tswj nyeem Vajkugkub no yuav pab tau koj ua li ntawd.

 Nrog Yehauvas Cov Tim Khawv ib tug tham thiab mus koom lawv tej kev sib txoos yuav pab tau koj. Txawm muaj tus kab mob COVID-19 los lawv tseem sib txoos tsis tu ncua. Lawv tuaj sib txoos saum huab saum cua ua ke txhua txhua lub lim tiam, thaum ua nco txog Yexus txoj kev tuag, thiab rau tej rooj sib txoos 1 hnub los sis 3 hnub.

 Yaxayas 33:24: “Yuav tsis muaj leej twg nroo hais tias ‘Kuv muaj mob.’”

 Qhov no txhais tias: Vajtswv cog lus tias nws yuav rhuav tshem tej kev mob kev nkeeg huv si mus.