Coob tus xav tias ntshe yuav tsis muaj ib hnub uas ib haiv neeg saib taus ib haiv li.

•   Athauni-au Nkutiles (António Guterres) uas yog tus sawv cev rau lub koom haum UN tau hais tias: “Kev xaiv ntsej xaiv muag yeej muaj nyob rau hauv tej tsev ua hauj lwm, tej koom haum, thiab hauv txhua haiv neeg thiab lawv tej kev coj noj coj ua.”

 Puas yuav muaj ib hnub uas ib haiv neeg saib taus ib haiv? Phau Vajlugkub ho hais li cas?

 Phau Vajlugkub qhia seb Vajtswv xav li cas txog txhua haiv neeg.

•   “Vajtswv tsim txhua haivneeg tawm hauv tib tug neeg li roj ntsha los xwb, thiab kom lawv mus nyob thoob plaws hauv lub ntiajteb.”—Tes Haujlwm 17:26.

•   “Vajtswv tsis xaiv leejtwg ntsejmuag. Txawm yog haivneeg twg los xij, Vajtswv lees yuav txhua tus uas hwm Vajtswv thiab ua haum Vajtswv siab.”—Tes Haujlwm 10:34, 35.

 Phau Vajlugkub qhia tias txhua haiv neeg puav leej los ntawm ib tug pog tus yawg los thiab Vajtswv txais yuav txhua haiv neeg huv si.

 Vajtswv lub Nceeg Vaj uas yog lub tseem fwv saum ntuj yuav kho kom ib haiv neeg saib taus ib haiv. Lub tseem fwv ntawd yuav qhia seb tib neeg yuav coj li cas kom lawv thiaj tsis ua neeg xaiv ntsej xaiv muag ntxiv lawm.

•   “Tej neeg hauv qab ntuj . . . kawm paub koj txojkev ncaj ncees.”—Yaxayas 26:9.

•   “Thaum ntawd txhua tus yuav ua ncaj ua ncees, yuav muaj kev thajyeeb thiab nyob kaj siab lug mus ibtxhis.”—Yaxayas 32:17.

 Niaj hnub nim no qas txhiab qas vam tus tib neeg los kawm phau Vajlugkub kom ib leeg paub hwm ib leeg thiab ib leeg saib taus ib leeg.

•   Yog xav paub ntxiv, mus nyeem phau Tsim Dheev! uas muaj lub ntsiab hu ua “Puas Kho Tau Kev Xaiv Ntsej Muag?”

•   Nyeem zaj “Talking to Children About Racism” seb cov niam cov txiv yuav pab cov me nyuam li cas kom lawv tsis txhob ua neeg xaiv ntsej xaiv muag.