Sa tanan nga butang nga makita sa aton palibot, ang isa sa pinakamaayo maglupad amo ang liso sang dandelion. Kon huypon sang hangin ang bulak sang dandelion, ang magagmay nga mga liso sini nagalupad nga daw magagmay nga mga parachute. Bisan pa manubo lang ang paglupad sini, ang iban sini nga mga liso makalab-ot sa kalayuon nga isa ka kilometro ukon sobra pa. Ngaa malayo gid ang malab-utan sini? Bag-o lang nadiskobrehan sang mga scientist nga ang paagi sa paglupad sang liso sang dandelion mas stable kag apat ka beses nga mas efficient sangsa ordinaryo nga parachute.

 Binagbinaga: Ang liso sang dandelion naangot sa isa ka punta sang stem, kag sa pihak nga punta makita naman ang pappus nga ginahuman sang daw mga buhok nga manipis kaayo. Ang pappus daw parachute nga nagabulig para makapadayon sa paglupad ang liso.

 Pero indi lang amo sina ang ginahimo sang pappus. Kon mag-agi ang hangin sa mga buhok sini, may nagaporma nga vortex sang hangin sa ibabaw sang pappus. Bangod nagatiyogtiyog ang hangin sa sini nga vortex, nagahinay ang pressure gani mabutong sini paibabaw ang pappus. Amo ini ang rason kon ngaa wala ini dayon nagakahulog sa duta.

 Naplastar gid sing maayo ang mga buhok sang pappus, gani madali makalapos ang hangin. Daw pareho gid ini sa parachute galing mas stable lang ini kag mas efficient. Isa pa, ang 90 porsiento sang pappus, space lang ukon wala sing unod. Gani gamay gid lang nga porsiento sini ang mga buhok.

 Gusto gid sang mga scientist nga mailog ang paglupad sang liso sang dandelion. Puede ini mailog sa ila pagdesinyo sa magagmay nga mga drone nga makalupad bisan diutay lang nga enerhiya ang ginagamit. Ini nga mga drone madamo sang puede gamitan pareho sang pag-monitor sang polusyon sa hangin.

 Ano sa banta mo? Ang paglupad bala sang liso sang dandelion resulta sang ebolusyon? Ukon gindesinyo ini?