Si Juan nga Manugbawtismo isa ka propeta sang Dios. (Lucas 1:76) Natawo sia antes natawo si Jesus. Ginhatagan sia sang Dios sing asaynment nga ihanda ang dalan para sa Mesias, ukon Cristo. Ginhimo ini ni Juan paagi sa pagsugid sang mensahe sang Dios sa pareho niya nga mga Judiyo para magbalik sila sa Dios.—Marcos 1:1-4; Lucas 1:13, 16, 17.

 Ang mensahe ni Juan makabulig para makilala sang sinsero nga mga tawo nga si Jesus nga taga-Nazaret amo ang ginpromisa nga Mesias. (Mateo 11:10) Ginpalig-on ni Juan ang mga nagapamati sa iya nga maghinulsol sa ila mga sala kag magpabawtismo bilang tanda sang ila paghinulsol. (Lucas 3:3-6) Madamo sia sing ginbawtismuhan nga mga tawo, gani gintawag sia nga si Juan nga Manugbawtismo. Ang pinakaimportante nga pagbawtismo nga ginhimo ni Juan amo ang iya pagbawtismo kay Jesus. a—Marcos 1:9.

Sa sini nga artikulo

•  Ngaa pinasahi gid si Juan nga Manugbawtismo?

•  Sin-o ang mga ginikanan ni Juan nga Manugbawtismo?

•  Sin-o ang nagpapatay kay Juan nga Manugbawtismo?

•  Kontrahanay bala si Juan nga Manugbawtismo kag si Jesus?

•  Pila ka tawo sa Biblia ang may ngalan nga Juan?

 Gintagna ang iya himuon: Paagi sa iya pagbantala, gintuman ni Juan ang tagna parte sa mensahero ni Jehova. (Malaquias 3:1; Mateo 3:1-3) Napamatud-an nga sia ang ‘naghanda sang katawhan para kay Jehova.’ Buot silingon, ginbuligan niya ang pareho niya nga mga Judiyo nga mangin handa sa pagbaton sang mensahe sang panguna nga representante ni Jehova nga Dios, si Jesucristo.—Lucas 1:17.

 Paglaum: Si Jesus nagsiling nga “wala pa gid sing natawo nga labaw pa kay Juan nga Manugbawtismo, apang ang tawo nga kubos sa Ginharian sang langit labaw pa sa iya.” (Mateo 11:11) Si Juan indi lamang isa ka propeta kundi sia man ang gintagna nga “mensahero.” Gani wala sing alagad sang Dios nga nagkabuhi antes niya nga labaw pa sangsa iya. Nagsiling man si Jesus nga si Juan indi mangin hari sa Ginharian sang Dios. b Kay napatay ining matutom nga propeta antes ginbuksan sang Cristo ang kahigayunan para makapalangit ang iban nga tawo. (Hebreo 10:19, 20) Pero mangin sakop si Juan sang Ginharian sang Dios diri sa duta. May paglaum sia nga mabuhi sing wala katapusan sa Paraiso.—Salmo 37:29; Lucas 23:43.

 Ang mga ginikanan ni Juan amo ang mag-asawa nga si Zacarias kag si Elisabet. Si Zacarias isa ka Judiyo nga saserdote. Isa ka milagro ang pagkatawo ni Juan kay ang iya nanay baw-as, ukon indi makabata. Isa pa, “tigulang na sila” sang iya bana nga si Zacarias.—Lucas 1:5-7, 13.

 Si Juan, ginpapugutan sang ulo ni Hari Herodes Antipas. Ginhimo niya ini bangod sa pagsulsol sang iya asawa nga si Herodias. Akig gid si Herodias kay Juan kay nagsiling si Juan kay Herodes, nga ginakilala man kuno nga isa ka Judiyo, nga ang ila pag-asawahay ni Herodias ilegal base sa kasuguan sang mga Judiyo.—Mateo 14:1-12; Marcos 6:16-19.

 Ini nga pagpati wala ginatudlo sang Biblia. (Juan 3:25-30) Ang matuod, si Juan mismo nagsiling nga responsibilidad niya nga ihanda ang dalan para sa Mesias, indi nga kontrahon ang Mesias. Si Juan nagsiling: “Nagabawtismo ako paagi sa tubig agod mapakilala sia sa Israel.” Nagsiling pa sia: “Sia amo ang Anak sang Dios.” (Juan 1:26-34) Gani nalipay gid si Juan nga mabalitaan ang parte sa maayo nga resulta sang pagministeryo ni Jesus.