Paano Ako Makahimo sing Maayo nga mga Desisyon?

I-PLAY

Ang sabat sang Biblia

Ang Biblia nagahatag sa aton sing maayo nga giya sa aton paghimo sang mga desisyon. Makabulig ini sa aton nga ‘magkuha sing kaalam kag paghangop.’ (Hulubaton 4:5) Sa pila ka kahimtangan, ginasugid sini sa aton ang pinakamaayo nga desisyon. Sa iban naman nga sitwasyon, nagahatag ini sang laygay nga makagiya sa aton sa paghimo sang maalamon nga desisyon.

Sa sini nga artikulo

Mga tip nga makabulig sa imo sa paghimo sing maayo nga desisyon

Indi magdalidali sa pagdesisyon. Ang Biblia nagasiling: “Ang tawo nga maalamon nagabinagbinag sang tagsa niya ka tikang.” (Hulubaton 14:15) Kon nagadalidali ka sa pagdesisyon, mahimo nga indi mo mabinagbinag ang importante nga impormasyon. Hatagi sing tion ang paghunahuna sing maayo sang imo mga opsyon.—1 Tesalonica 5:21.
Indi magdesisyon base lamang sa imo emosyon ukon balatyagon. Ang Biblia nagapaandam sa aton nga indi kita pirme makasalig sa aton tagipusuon. (Hulubaton 28:26; Jeremias 17:9) Halimbawa, mahimo indi maayo ang aton himuon nga desisyon kon akig kita, na-depress, naluyahan sing buot, natak-an, ukon nakapoy.—Hulubaton 24:10; 29:22.
Magpangamuyo para sa kaalam. (Santiago 1:5) Nalipay ang Dios nga sabton ini nga mga pangamuyo. Sia isa ka mainulikdon nga Amay kag gusto niya nga malikawan sang iya mga anak ang mga problema. “Si Jehova mismo ang nagahatag sing kaalam; sa iya man nagahalin ang ihibalo kag paghantop.” a (Hulubaton 2:6) Ginahatag niya ini nga kaalam paagi sa iya nasulat nga Pulong, ang Biblia.—2 Timoteo 3:16, 17.
Mag-research. Para makadesisyon ka sing maayo, kinahanglan mo ang masaligan nga impormasyon. Ang Biblia nagasiling nga “ang maalam nga tawo nagapamati kag nagabaton sing dugang pa nga pagtudlo.” (Hulubaton 1:5) Diin ka makakita sang importante kag masaligan nga impormasyon?

Una, hibalua kon ano ang ginasiling sang Biblia parte sa topiko nga ginahunahuna mo. Nahibaluan sang aton Manunuga kon ano ang pinakamaayo para sa aton, gani ara sa iya Pulong ang pinakamasaligan nga laygay. (Salmo 25:12) Sa pila ka sitwasyon nagahatag ang Biblia sang maathag nga direksion, ayhan paagi sa kasuguan ukon sugo. (Isaias 48:17, 18) Pero may mga bes man nga indi direkta nga ginasugid sang Biblia ang dapat naton himuon. Sa baylo, nagahatag ini sang mga prinsipio nga nagagiya sa aton. Nagabulig ini sa aton nga maghimo sang maayo nga desisyon, bisan pa lain ini sa desisyon sang iban. Kon gusto mo makakita sang mga teksto sa Biblia nga makabulig sa imo, mag-research sa base sa Biblia nga mga artikulo ukon mga publikasyon, pareho sa makita sa sini nga website. Wala ini sing bayad. b

Sa pila ka butang, kinahanglan mo usisaon ang masaligan nga impormasyon. Halimbawa, antes ka magbakal sang isa ka butang, labi na kon mahal ini, mas maayo kon i-research mo anay ang parte sa sini nga produkto kag ang manufacturer sini, pati man ang ila mga policy kon may damage ang item kag gusto mo ini ibalik. Siempre, siguraduhon mo gid anay nga ang produkto nga baklon mo amo gid ang kinahanglan mo.

“Mapaslawan ang mga plano kon wala sing paghambalanay,” siling sang Biblia (Hulubaton 15:22) Gani antes ka magdesisyon, makig-istorya anay sa masaligan nga mga tawo. Halimbawa, mas maayo nga magpakonsulta sa doktor antes ka magdesisyon parte sa imo ginabatyag. (Mateo 9:12) Makabulig man nga makig-istorya ka sa mga tawo nga pareho ang sitwasyon sa imo. Pero dumduma nga indi sila, kundi ikaw gid ang dapat magdesisyon kag ikaw man ang magaatubang sa mga resulta sang imo desisyon.—Galacia 6:4, 5.
Binagbinaga ang tanan antes magdesisyon. Base sa nabal-an mo nga impormasyon, ilista ang imo mga opsyon pati na ang mga bentaha kag disbentaha sang kada isa. Binagbinaga sing maayo ang posible nga resulta sang imo desisyon. (Deuteronomio 32:29) Halimbawa, ano ang mangin epekto sini sa imo, sa imo pamilya, ukon sa iban pa? (Hulubaton 22:3; Roma 14:19) Ang paghunahuna sini nga mga pamangkot base sa mga panudlo sang Biblia makabulig sa imo nga maghimo sing maalamon kag mahigugmaon nga desisyon.
Magdesisyon. Kon kaisa wala kita dayon nagadesisyon kay indi kita sigurado. Pero kon pirme na lang kita nagaduhaduha, mahimo madula ang kahigayunan ukon indi gani, mabutang kita sa indi maayo nga kahimtangan. Kon sa aton pa, kon indi kita magdesisyon daw pareho lang nga naghimo kita sang sala nga desisyon. Ginpaanggid man ini sang Biblia sa pagpanguma. Nagasiling ini: “Kon maghulat ka tubtob mag-ayo ang panahon kag indi gid mabaskog ang hangin, indi ka gid makatanom, kag wala ka gid sing may mapatubas.”—Manugwali 11:4, Maayong Balita nga Biblia.

Dumduma man nga bisan maayo gid ang imo desisyon, indi ini perpekto kag kon kis-a may ara kita isakripisyo. Mahimo may matabo man nga wala mo ginapaabot. (Manugwali 9:11) Gani sunda ang impormasyon nga matigayon mo, kag pilia ang opsyon nga mas daku ang tsansa nga magmadinalag-on.

Bag-uhon ko bala ang akon ginhimo nga desisyon?

May mga desisyon nga puede pa mabag-o. Mahimo magbag-o ang imo kahimtangan, ukon mahibaluan mo nga ang imo nauna nga desisyon may wala ginapaabot nga resulta. Kon amo sina ang matabo, puede mo liwaton ang imo desisyon, kag mangita sang isa ka opsyon nga mas maayo ang resulta.

Pero may mga desisyon nga indi mo puede bag-uhon. (Salmo 15:4) Halimbawa, gusto sang Dios nga tumanon sang mga mag-asawa ang ila panumpa sa pag-asawahay. c (Malaquias 2:16; Mateo 19:6) Kon may problema ang pag-asawahay, dapat nila himuon ang tanan agod solbaron ini sa baylo nga magbulagay.

Ano ang himuon ko kon sala ang akon desisyon kag indi ko na ini mabag-o?

Kon kis-a, makahimo kita sang sala ukon indi maalamon nga desisyon. (Santiago 3:2, footnote) Normal lang nga masubuan kita ukon maghinulsol. (Salmo 69:5) Maayo man kon nagabatyag kita sining negatibo nga mga balatyagon ilabi na kon makabulig ini nga indi kita makahimo liwat sang sala nga desisyon! (Hulubaton 14:9) Pero, ginalaygayan kita sang Biblia nga likawan ang tuman nga kasubo kay makapaluya ini sang aton buot kag indi kita makapamensar sing maayo. (2 Corinto 2:7) d “Si Jehova maluluy-on kag mainawaon,” siling sang Biblia. (Salmo 103:8-13) Gani magtuon gikan sa sala nga desisyon nga indi mo na mabag-o kag himua ang masarangan mo para mag-ayoayo ang sitwasyon.

a Si Jehova ang ngalan sang Dios sa Biblia.—Salmo 83:18.

b Puede ka man mag-search sa jw.org paagi sa pag-type sang tinaga ukon mga tinaga parte sa imo desisyon. Makakita ka sing madamo nga laygay sang Biblia sa sarisari nga topiko sa sini nga website. Puede mo man i-search ang isa ka tinaga sa “Indese sang mga Tinaga sa Biblia” sa Bag-ong Kalibutan nga Badbad sang Balaan nga Kasulatan.

c Kabubut-on sang Dios nga mag-updanay ang mag-asawa asta nga buhi sila. Ginapasugtan lamang Niya ang diborsio kag pagpangasawa ukon pagpamana liwat kon ang isa sa ila makasala sang seksuwal nga imoralidad. (Mateo 19:9) Kon may problema sa inyo pag-asawahay, mabuligan kamo sang Biblia nga solbaron ini sa mahigugmaon kag maalamon nga paagi.

d Para sa dugang nga impormasyon, basaha ang artikulo nga “Mabuligan Bala Ako sang Biblia Kon Ginakonsiensia Ako?”