Huo. Ang masunod nga apat ka prinsipio sa Biblia makabulig sa imo problema sa kuarta kag utang:

1.   Planuha ang imo paggasto. “Kon magplano ka sing maayo kag magmapisan, sigurado nga magauswag ka. Kon magpadasodaso ka, sigurado nga magaimol ka.” (Hulubaton 21:5, Ang Pulong sang Dios, APD) Indi magpadalidali sa pagbakal sang isa ka butang bangod lang kay sale ini. Maghimo sing badyet kag sunda ini.

2.   Likawi ang indi kinahanglan nga pagpangutang. “Ang nagahulam alagad sa nagapahulam.” (Hulubaton 22:7) Kon may utang ka na kag indi ka makabayad suno sa kontrata, istoryaha ang imo gin-utangan kon san-o mo ini bayaran. Padayon nga maghingyo. Sunda ang laygay sang Biblia sa mga di-maalamon nga naggarantiya sang utang kag gani amo ang nangin responsable sa pagbayad. “Paubsa ang imo kaugalingon, kag pakilooyi ang imo isigkatawo. Dili pagpatologa ang imo mga mata ukon pagpatuyoha ang imo mga ilalakub.” (Hulubaton 6:1-5) Bisan pa gindis-ayrihan ka sang primero, padayon nga maghingyo.

3.   Husto nga pagtamod sa kuarta. “Ang tawo nga dalok sa kuwarta nagadali gid nga magmanggaranon, pero wala siya kahibalo nga magaimol gali siya.” (Hulubaton 28:22, APD) Indi lamang problema sa kuarta ang resulta sang kahisa kag kakagod, kundi ginaguba man sini ang imo relasyon sa Dios.

4.   Mangin kontento. “Kon kita may pagkaon, panapton kag pasilungan, mangin kontento na kita sa sini nga mga butang.” (1 Timoteo 6:8) Indi mabakal sang kuarta ang kalipay. Ang pila sa pinakamalipayon nga mga tawo wala sing madamo nga kuarta. Pero may ara sila suod nga relasyon sa Dios kag pamilya kag mga abyan nga nagapalangga gid sa ila.​—Hulubaton 15:17; 1 Pedro 5:6, 7.