Ano ang Buot Silingon sang Pag-abot sang Cristo?

I-PLAY

Ang sabat sang Biblia

Madamo sang ginsambit ang Kasulatan parte sa tion sang pag-abot sang Cristo para hukman ang mga tawo sa duta. a Halimbawa, ang Mateo 25:31-33 nagasiling:

“Kon ang Anak sang tawo [si Jesucristo] mag-abot sa iya himaya, kaupod ang tanan nga anghel, magapungko sia gilayon sa iya mahimayaon nga trono. Tipunon sa iya atubangan ang tanan nga pungsod, kag painpainon niya ang katawhan kaangay sang pagpain sang manugbantay sa mga karnero kag mga kanding. Ibutang niya ang mga karnero sa iya tuo, apang ang mga kanding sa iya wala.”

Ini nga tion sang paghukom mangin bahin sang “dakung kapipit-an” nga wala pa gid matabo sa kasaysayan sang tawo. Ini nga kapipit-an matapos sa inaway sang Armageddon. (Mateo 24:21; Bugna 16:16) Ang mga kaaway sang Cristo, nga ginlaragway bilang mga kanding sa iya ilustrasyon, “magabaton . . . sang silot nga wala sing katapusan nga kalaglagan.” (2 Tesalonica 1:9; Bugna 19:11, 15) Pero, ang iya matutom nga mga alagad, ang mga karnero, may paglaum nga “kabuhi nga wala sing katapusan.”—Mateo 25:46.

San-o magaabot ang Cristo?

Si Jesus nagsiling: “Tuhoy sina nga adlaw kag oras, wala gid sing nakahibalo.” (Mateo 24:36, 42; 25:13) Pero, ginlaragway niya ang makita nga mga “tanda” sang tion antes sang iya pag-abot.—Mateo 24:3, 7-14; Lucas 21:10, 11.

Sa pag-abot sang Cristo, ang iya bala lawas espiritu ukon unod?

Sang ginbanhaw si Jesus, ang iya lawas nangin espiritu, gani magaabot sia bilang espiritu, indi bilang unod. (1 Corinto 15:45; 1 Pedro 3:18) Amo nga nakasiling si Jesus sa iya mga apostoles sang adlaw antes sang iya kamatayon: “Sa indi madugay ang kalibutan indi na makakita sa akon.”—Juan 14:19.

Sayop nga mga pagpati parte sa pag-abot sang Cristo

Sayop nga pagpati: Kon magsiling ang Biblia nga makita sang katawhan nga si Jesus “nagakari sa mga panganod,” buot silingon makita ang pag-abot ni Jesus.—Mateo 24:30.

Ang kamatuoran: Sa Biblia, masami nga ginaangot ang mga panganod sa mga butang nga indi makita. (Levitico 16:2; Numeros 11:25; Deuteronomio 33:26) Halimbawa, ginsilingan sang Dios si Moises: “Makadto ako sa imo sa isa ka madulom nga panganod.” (Exodo 19:9) Indi literal nga nakita ni Moises ang Dios. Sing kaanggid, ang ‘pagkari sa panganod’ sang Cristo nagakahulugan nga mahantop sang katawhan ang iya pag-abot bisan pa indi nila sia makita sing literal.

Sayop nga pagpati: Ang ekspresyon nga “ang tagsa ka mata makakita sa iya,” nga ginsambit sa Bugna 1:7 parte sa pag-abot sang Cristo, dapat hangpon nga literal.

Ang kamatuoran: Ang Griego nga mga tinaga sa Biblia para sa “mata” kag “makita” nagapatuhoy kon kaisa sa paghangop ukon paghantop imbes sa literal nga panan-aw. b (Mateo 13:15; Lucas 19:42; Roma 15:21; Efeso 1:18) Nagasiling ang Biblia nga ang ginbanhaw nga si Jesus amo “ang isa . . . nga nagapuyo sa kapawa nga indi mapalapitan, nga wala sing tawo nga . . . makakita.” (1 Timoteo 6:16) Gani, ang prase nga “ang tagsa ka mata makakita sa iya” nagakahulugan nga mahantop sang tanan nga si Jesus amo ang nagapatuman sang paghukom sang Dios.—Mateo 24:30.

Sayop nga pagpati: Ginapakita sang 2 Juan 7 nga magaabot si Jesus nga may lawas nga unod.

Ang kamatuoran: Ina nga bersikulo sang Biblia nagasiling: “Naglapnag ang mga manugdaya sa kalibutan, mga tawo nga wala nagakilala nga si Jesucristo nagkari sa unod.”

Sang panahon ni apostol Juan, wala nagapati ang iban nga nagkari si Jesus sa duta bilang tawo. Gintawag sila nga Gnostiko. Ginsulat ang 2 Juan 7 para pamatud-an nga sala ang ila pagpati.

a Bisan pa madamo ang nagagamit sang termino nga “ikaduha nga pagkari” para patuhuyan ang pag-abot sang Cristo, ini nga termino indi mabasa sa Biblia.

b Tan-awa ang The New Thayer’s Greek-English Lexicon of the New Testament (1981), pahina 451 kag 470.