GINPAATHAG ANG MGA BERSIKULO SA BIBLIA

Mateo 6:33—“Unaha Ninyo ang Pagpangita sang Ginharian sang Dios”

I-PLAY

“Gani, padayon ninyo nga unahon ang pagpangita sa Ginharian kag sa pagkamatarong sang Dios, kag ini tanan idugang sa inyo.”—Mateo 6:33, Bag-ong Kalibutan nga Badbad.

“Sa baylo sini, unaha ninyo ang pagpangita sang Ginharian sang Dios kag sang iya katarungan kag hatagan niya kamo sini tanan nga mga butang.”—Mateo 6:33, Maayong Balita nga Biblia.

Kahulugan sang Mateo 6:33

Ang Ginharian sang Dios isa ka gobierno sa langit nga magahimo sang kabubut-on sang Dios diri sa duta. (Mateo 6:9, 10) Ginauna sang isa ka tawo ang pagpangita sa Ginharian kon amo ini ang pinakaimportante sa iya kabuhi. a Nalakip sa sini ang pagtuon parte sa Ginharian sang Dios kag ang pagsugid sa iban sang maayo nga mga butang nga himuon sini nga Ginharian. (Mateo 24:14) Ang tawo nga nagapangita sang Ginharian nagapangamuyo man nga magkari ini.—Lucas 11:2.

Nalakip sa pagkamatarong sang Dios ang iya mga kasuguan parte sa insakto kag sala nga paggawi. (Salmo 119:172) Gani, mapakita sang isa ka tawo nga ginapangita niya ang pagkamatarong sang Dios kon ginasunod niya ini nga mga kasuguan. Ang pagtuman sa sini nga mga kasuguan may maayo gid nga epekto sa kabuhi sang isa ka tawo.—Isaias 48:17.

Ang mga tinaga nga hatagan niya kamo sini tanan nga mga butang isa ka promisa sang Dios. Buot silingon, ihatag niya ang mga kinahanglanon sang mga nagauna sang iya Ginharian kag nagasunod sang iya mga kasuguan sa ila kabuhi.—Mateo 6:31, 32.

Kaingod nga mga Teksto sang Mateo 6:33

Ining mga ginsiling ni Jesus mabasa naton sa Mateo kapitulo 5-7. Ini nga mga kapitulo sa Biblia gintawag nga Sermon sa Bukid. Ang kalabanan sa mga nagapamati sadto kay Jesus mga pigado. Mahimo ginapamensar nila nga bangod pigado sila, kinahanglan nila magbakabaka obra para mabuhi. Amo nga wala na sila sing tion para pangitaon ang Ginharian. Pero ginsilingan sila ni Jesus nga panilagan kon paano ginaatipan sang Dios ang iya mga tinuga, pareho sang mga tanom kag mga sapat. Nagapromisa ang Dios nga kon unahon man sang mga tawo ang pagpangita sang iya Ginharian, atipanon man niya sila.—Mateo 6:25-30.

Sala nga Pagpati Parte sa Mateo 6:33

Sala nga pagpati: Ang isa ka tawo nga nagapangita sang Ginharian mangin manggaranon.

Ang matuod: Nagsiling si Jesus nga kon unahon sang isa ka tawo ang Ginharian sang Dios makatigayon sia sang iya kinahanglanon, pareho sang pagkaon kag bayo. (Mateo 6:25, 31, 32) Pero wala sia nagpromisa nga mangin manggaranon ini nga tawo. Wala man nagsiling si Jesus nga kon manggaranon ka, ebidensia ina nga ginapakamaayo ka sang Dios. Ginpaandaman pa gani ni Jesus ang iya mga tagpalamati nga indi nila dapat pagpanikasugan nga mangin manggaranon, kay mas mabudlayan pa gid sila nga unahon ang pagpangita sa Ginharian. (Mateo 6:19, 20, 24) Nagpangabudlay gid si apostol Pablo nga unahon ang Ginharian sang Dios. Pero nagsiling sia nga ginakulang man sia kon kis-a sa iya mga kinahanglanon. Pareho kay Jesus, ginpaandaman man niya ang iban parte sa halit nga resulta sang pagpanikasog nga magmanggaranon.—Filipos 4:11, 12; 1 Timoteo 6:6-10.

Sala nga pagpati: Ang mga Cristiano indi na kinahanglan mag-obra para mabuhi.

Ang matuod: Ang Biblia nagsiling nga ang mga Cristiano dapat mag-obra para masuportahan ang ila mga kinahanglanon kag ang kinahanglanon sang ila pamilya. (1 Tesalonica 4:11, 12; 2 Tesalonica 3:10; 1 Timoteo 5:8) Wala ginsilingan ni Jesus ang iya mga sumulunod nga ang Ginharian lamang ang dapat nila pangitaon. Sa baylo, nagsiling sia nga dapat nila unahon ang pagpangita sa Ginharian.

Ang mga nagauna sa pagpangita sa Ginharian sang Dios kag nagapangabudlay para mabuhi makasalig nga hatagan sila sang Dios sang ila mga kinahanglanon.—1 Timoteo 6:17-19.

a Ang ‘padayon nga pagpangita’ gin-translate halin sa isa ka Griego nga tinaga nga nagapatuhoy sa isa ka butang nga padayon nga ginahimo sang isa ka tawo. Mahimo man ini i-translate nga “wala untat nga pagpangita.” Gani, ang pag-una sa Ginharian indi lang dapat paghimuon sa pila lang ka tion, dayon mauntat na. Sa baylo, ang Ginharian dapat amo pirme ang pinakaimportante sa aton kabuhi.