“Wala sing makalabaw sa gugma sang isa nga naghatag sang iya kabuhi para sa iya mga abyan.”—Juan 15:13, Bag-ong Kalibutan nga Badbad.

 “Wala sing paghigugma nga labaw pa sini, ang paghalad sang tawo sang iya kabuhi para sa iya mga abyan.”—Juan 15:13, Biblia sang Katilingban sang mga Kristiano.

 Ginbuligan ni Jesus ang iya mga sumulunod nga maintiendihan nga dapat mabakod gid ang ila gugma amo nga handa sila nga mapatay para sa isa kag isa.

 Antes sini, ginsilingan ni Jesus ang iya mga apostoles: “Ini amo ang akon sugo, nga maghigugmaanay kamo kaangay sang paghigugma ko sa inyo.” (Juan 15:12) Ano nga klase sang pagpalangga ang ginpakita ni Jesus para sa ila? Gugma ini nga wala nagapokus sa kaugalingon kundi nagasakripisyo para sa iban. Sang nagabantala si Jesus diri sa duta, gin-una niya ang mga kinahanglanon kag kaayuhan sang iya mga sumulunod sangsa iya kaugalingon. Gin-ayo niya ang mga nagamasakit kag gintudluan niya sila parte sa Ginharian sang Dios. a Naghimo pa sia gani sang manubo nga mga obra para sa kaayuhan sang iban. (Mateo 9:35; Lucas 22:27; Juan 13:3-5) Pero sobra pa sa sini ang gugma nga ginapatuhuyan ni Jesus sa Juan 15:13. Ang matuod, pila pa lang ka oras sa tapos niya ini mahambal, ginpakita niya ining mas daku nga gugma sang ginhatag niya “ang iya kabuhi nga gawad kabaylo sang madamo.” (Mateo 20:28; 22:39) Gani, sa dalayawon nga paagi ginpakita niya nga mas palangga niya ang iban sangsa iya kaugalingon.

 Palangga ni Jesus ang mga tawo. Pero mas palangga niya ang mga nagasunod sa iya mga panudlo. Ginkabig niya ang iya mga disipulo nga iya suod nga mga abyan bangod ginsunod nila ang iya mga sugo kag gin-unungan gid nila sia sa iya mga pagtilaw. (Lucas 22:28; Juan 15:14, 15) Gani mas may rason pa gid sia nga ihatag ang iya kabuhi para sa ila.

 Ginsunod gid sang mga Cristiano sang unang siglo ang ginsiling ni Jesus, gani handa sila nga mapatay para sa isa kag isa. (1 Juan 3:16) Ang masinakripisyuhon nga gugma nga ginpakita ni Jesus amo ang magapakilala kon sin-o gid ang matuod nga mga Cristiano.—Juan 13:34, 35.

 Mabasa sa kapitulo 13 asta 17 sang Ebanghelyo ni Juan ang katapusan nga laygay ni Jesus para sa iya 11 ka apostoles kag ang iya katapusan nga pangamuyo upod sa ila. Pagligad sang pila ka oras napatay sia. Sa kapitulo 15, ginpaanggid ni Jesus ang iya mga disipulo sa mga sanga sang puno sang ubas. Paagi sa sini, ginpakita niya sa ila nga dapat gid sila magpabilin nga nahiusa sa iya para mapamatud-an nga mga disipulo gid niya sila. Ginpalig-on niya sila nga padayon nga ‘magpamunga sing madamo.’ (Juan 15:1-5, 8) Ang isa ka paagi para mapakita nila ang ila nagasakripisyo nga gugma amo ang pagbantala sang mensahe nga ginbantala ni Jesus. Amo ini ang “maayong balita sang Ginharian sang Dios.”—Lucas 4:43; Juan 15:10, 17.

 Tan-awa ining malip-ot nga video para mahibaluan mo ang sumaryo sang libro sang Juan.