“Ginabilin ko sa inyo ang paghidait nga ginhatag ko sa inyo. Ang paghidait nga ginahatag ko sa inyo tuhay sa paghidait nga ginahatag sa inyo sang kalibutan. Indi kamo magkasubo ukon magkahadlok.”—Juan 14:27, Bag-ong Kalibutan nga Badbad.

 “Ang paghidait ginabilin ko sa inyo, ang akon paghidait ginahatag ko sa inyo. Ginahatag ko ini sa inyo indi subong sang paghatag sang kalibutan. Indi kamo magpalibog kag magkatublag, indi kamo magkahadlok.”—Juan 14:27, Maayong Balita nga Biblia.

 Sa sini nga teksto, ginapalig-on ni Jesus ang iya mga apostoles nga indi sila magkabalaka sing sobra kon may mga problema sila. Pareho sa iya, mabatyagan man nila ang paghidait kon buligan sila sang Dios.

 Ano nga paghidait ang ibilin ukon ihatag ni Jesus sa iya mga apostoles? Ginhatag ni Jesus sa ila ang iya paghidait, ang paghidait nga iya mismo naeksperiensiahan. Indi buot silingon sini nga indi na gid maeksperiensiahan sang iya mga apostoles ang paghingabot ukon kabudlayan. (Juan 15:20; 16:33) Bisan pa nga ginmaltrato si Jesus kag ginpatay sang ulihi, may paghidait sia ukon kalinong sa iya hunahuna kag tagipusuon. (Lucas 23:27, 28, 32-34; 1 Pedro 2:23) Nabatyagan niya ini nga kalinong kay nabal-an niya nga palangga sia sang iya Amay nga si Jehova, kag nalipay ang iya Amay sa iya ginahimo. a—Mateo 3:16, 17.

 Ginhatagan ni Jesus sing paghidait ang iya mga apostoles paagi sa pagpasalig sa ila nga palangga sila sang iya Amay kag nalipay ang iya Amay sa ila. Ginpasalig man sila ni Jesus nga amo man sina ang iya ginabatyag para sa ila. (Juan 14:23; 15:9, 10; Roma 5:1) Ini nga paghidait, nga nabase sa pagtuo nga si Jesus amo ang Anak sang Dios, nakabulig para indi sila mahadlukan kag magkabalaka. (Juan 14:1) Bisan pa indi na nila makaupod si Jesus, nagpromisa sia nga ang balaan nga espiritu sang Dios magabulig sa ila para may kompiansa sila kag kalinong. (Juan 14:25-27) Bangod bal-an sang mga sumulunod ni Jesus nga nalipay si Jehova sa ila kag ginabuligan Niya sila, may kaisog na sila sa pag-atubang sang mga problema.—Hebreo 13:6.

 Sang si Jesus diri sa duta, ginatamyaw sang mga tawo ang kada isa sing paghidait. (Mateo 10:12) Pero wala lang gintamyaw ni Jesus ang iya mga apostoles sing paghidait; kundi ginhatagan niya sila sang paghidait. Dugang pa, ang paghidait nga ginhatag ni Jesus sa ila lain sa paghidait nga mahimo mahatag sang kalibutan. b Ang kalibutan makahatag sa mga tawo sing paghidait paagi sa mga relasyon, manggad, kabantugan, ukon posisyon. Pero ang paghidait nga halin kay Jesus wala nabase sa sini nga mga butang. Bangod ang paghidait nga halin sa iya nagapadayon asta san-o.

 Ginhambal ini ni Jesus sa iya matutom nga mga apostoles sang gab-i antes sia mapatay. Sina nga gab-i, ginsilingan niya sila nga dali na lang niya sila biyaan. (Juan 13:33, 36) Nasubuan gid ang iya mga apostoles. (Juan 16:6) Gani ginpasalig sila ni Jesus paagi sa pagsugid sa ila sing rason kon ngaa indi sila dapat masubuan ukon mahadlok kon magbiya na sia.

 Ang ginsiling ni Jesus makapabakod man sa mga Cristiano subong. Matigayon man naton ang paghidait. (2 Tesalonica 3:16) Sang nangin disipulo kita ni Jesus, natun-an naton nga ginpalangga kita ni Jesus kag sang iya Amay nga si Jehova, kag nalipay sila sa aton. (Colosas 3:15; 1 Juan 4:16) Bilang resulta, wala gid kita nagakabalaka sing sobra. Ngaa? Bangod ang Dios kaupod naton.—Salmo 118:6; Filipos 4:6, 7; 2 Pedro 1:2.

Tan-awa ining malip-ot nga video para mahibaluan mo ang sumaryo sang libro sang Juan.