“Magpanawag ka sa akon, kag sabton ko ikaw dayon kag sugiran ko ikaw sang makatilingala kag makatalanhaga nga mga butang nga wala mo pa mahibaluan.”—Jeremias 33:3, Bag-ong Kalibutan nga Badbad.

 “Tawgon mo ako kag magasabat ako. Isugid ko sa imo ang mga dungganon kag tinago nga butang nga wala mo nahibaloan.”—Jeremias 33:3, Biblia sang Katilingban sang mga Kristiano.

 Ini nga mga tinaga pangagda sang Dios sa mga tawo nga mangamuyo sa iya. Kon batunon sang mga nakabati ang pangagda kag mangamuyo sa Dios, isugid niya sa ila ang matabo sa palaabuton.

 “Magpanawag ka sa akon, kag sabton ko ikaw.” Ang ekspresyon nga “magpanawag ka sa akon” wala lang nagakahulugan nga nagapanawag ukon nagasinggit sang ngalan sang Dios. Nagakahulugan ini nga nagapangamuyo sa Dios kag nagapangabay sang bulig niya kag paggiya.—Salmo 4:1; Jeremias 29:12.

 Posible nga pangagda ini para sa pungsod sang Israel sadto. Ini nga pungsod nangin indi matutom sa Dios, kag gin-atake sila sang mga soldado sang Babilonia. (Jeremias 32:1, 2) Gin-agda ni Jehova a ang mga Israelinhon nga magbalik sa iya paagi sa pagpanawag sa iya sa pangamuyo.

 “Sugiran ko ikaw sang makatilingala kag makatalanhaga nga mga butang nga wala mo pa mahibaluan.” Ang mga butang nga ginpromisa sang Dios nga isugid niya “makatalanhaga” (ukon, indi mahangpan) kay indi ini maintiendihan sang mga tawo sa ila lang kaugalingon nga ikasarang. Ang ekspresyon nga “makatalanhaga nga mga butang” puede man i-translate nga “tinago nga mga butang.”

 Ano nga “tinago nga mga butang” ang isugid sang Dios? Ang mga hitabo sa palaabuton, nga amo ang pagkaguba sang daan nga siudad sang Jerusalem kag indi na ini pag-istaran. Pero gintagna man nga kay-uhon ini kag istaran liwat sang mga tawo. (Jeremias 30:1-3; 33:4, 7, 8) Ginpromisa man sang Dios nga ang iya mga sumilimba indi madula bilang isa ka pungsod.—Jeremias 32:36-38.

 Nabaton ni manalagna Jeremias ini nga mensahe halin kay Jehova sang 608 B.C.E., sa ikanapulo nga tuig sang paggahom ni Hari Sedequias. Gintagna ni Jeremias nga ang Jerusalem mapierde kag si Sedequias prisuhon. Bangod wala nanamian ang hari sa sini nga mensahe, ginpapriso niya si Jeremias.—Jeremias 32:1-5; 33:1; 37:21.

 Amo sini ang nagakatabo sang ginhambal sang Dios ang iya pangagda nga mabasa sa Jeremias 33:3. Pero, si Hari Sedequias kag ang kalabanan nga mga tawo sang pungsod padayon nga nagrebelde. (Jeremias 7:26; 25:4) Wala sila nangamuyo sa Dios para mangabay sang iya direksion. Pagligad sang isa ka tuig, napierde si Sedequias, naguba ang Jerusalem, kag ang kalabanan nga nakaluwas ginbihag kag gindala sa Babilonia.—Jeremias 39:1-7.

 Ginapahanumdom sang mga tinaga sa Jeremias 33:3 ang mga bumalasa subong nga ang Dios makahatag sang “sibu nga ihibalo tuhoy sa iya kabubut-on” kag makasugid sang “madalom nga mga butang” sa mga nagapangamuyo sa iya kag nagatuon sa iya Pulong, ang Biblia. (Colosas 1:9; 1 Corinto 2:10) Ining madalom nga mga butang nagalakip sang mga promisa sang Dios nga himuon niya sa palaabuton.—Bugna 21:3, 4.

 Tan-awa ining malip-ot nga video para mahibaluan mo ang sumaryo sang libro sang Jeremias.