“Indi kamo magkabalaka sa bisan ano nga butang, kundi sa tanan nga butang paagi sa pangamuyo kag pag-ampo nga may pagpasalamat, ipahibalo sa Dios ang inyo mga pangabay; kag ang paghidait sang Dios nga labaw sa tanan nga paghangop magabantay sang inyo tagipusuon kag ikasarang sa paghunahuna paagi kay Cristo Jesus.”—Filipos 4:6, 7, Bag-ong Kalibutan nga Badbad.

 “Indi kamo magpalibog sang bisan ano, kundi sa inyo mga pagpangamuyo, magpangayo kamo sa Dios sang inyo kinahanglanon nga nagapasalamat sa gihapon. Kag ang paghidait sang Dios nga indi matungkad sang paghangop sang tawo, magatipig sang inyo mga tagipusoon kag mga panghunahona paagi kay Cristo Jesus.”—Filipos 4:6, 7, Maayong Balita nga Biblia.

 Kon grabe gid ang kabalaka ukon palibog sang mga sumilimba sang Dios, makapangamuyo sila sa Dios para maghaganhagan ang ila ginabatyag. Nagpromisa sia nga hatagan niya sila sing paghidait, nga makabulig sa ila kon ano ang ila himuon kon nagakabalaka sila, para makapamensar sila sing maayo, kag makontrol ang ila emosyon. Mabasa sa bersikulo 6 ang sarisari nga porma sang pangamuyo nga makabulig sa ila nga mabaton ina nga paghidait.

 Ang pag-ampo isa ka porma sang pangamuyo diin ang isa ka tawo hugot nga nagapakitluoy nga buligan sia sang Dios. Ang isa ka tawo mahimo mag-ampo sa Dios kon grabe ang iya stress ukon ara sa katalagman ang iya kabuhi, pareho sa ginhimo ni Jesus. (Hebreo 5:7) Sa masami, ini nga mga pangamuyo indi lang kaisa, kundi madamo nga beses ini nga ginahimo.

 Ang pangabay amo ang porma sang pangamuyo kon may isa ka ka butang nga ginapangayo sa Dios. Ang iya mga sumilimba makapangabay sa iya sang “tanan nga butang,” ukon sa tagsa ka sitwasyon. Pero dapat ini nga mga pangamuyo suno sa kabubut-on sang Dios nga mabasa sa Biblia.—1 Juan 5:14.

 Kon nagapasalamat kita sa Dios sa tanan nga ginhimo niya kag himuon pa para sa aton, ginatawag ini nga pangamuyo sang pagpasalamat. Kon pirme naton pamensaron ang mga ginhimo sang Dios para sa aton nga dapat naton pasalamatan, makabulig ini sa aton nga mangin malipayon.—1 Tesalonica 5:16-18.

 Bilang sabat sa sini nga mga pangamuyo, ginahatagan sang Dios sing paghidait ang iya mga sumilimba. “Ang paghidait sang Dios” amo ang kalinong nga mabatyagan sang isa bangod suod sia sa Dios. (Roma 15:13; Filipos 4:9) Ini nga paghidait “labaw sa tanan nga paghangop” kay halin ini sa Dios kag sobra pa sa ginapaabot naton ang bulig sini nga mabaton naton.

 Ini nga teksto sa Biblia nagsiling man nga ang paghidait sang Dios magabantay sang aton tagipusuon. Ang Griego nga tinaga nga gin-translate “magabantay” isa ka termino nga ginagamit sa militar. Ginalaragway sini ang ginahimo sang isa ka grupo sang mga soldado para bantayan ang isa ka mabakod nga siudad. Sing kaanggid, ang paghidait sang Dios magabantay man sang hunahuna kag balatyagon sang isa ka tawo. Makabulig ini sa iya nga indi matam-an bisan pa grabe ang iya mga problema.

 Ang paghidait nga ginahatag sang Dios makaamlig sa aton “paagi kay Cristo Jesus.” Kay man, nangin suod kita sa Dios bangod kay Jesus. Ginhatag ni Jesus ang iya kabuhi bilang halad-gawad para sa aton mga sala. Kon may pagtuo kita sa iya, pakamaayuhon kita sang Dios. (Hebreo 11:6) Makapalapit man kita sa Dios paagi kay Jesus. Si Jesus nagsiling: “Wala sing makakadto sa Amay kon indi paagi sa akon.”—Juan 14:6; 16:23.

 Ang libro sang Filipos sa Biblia isa ka sulat ni apostol Pablo sa mga Cristiano nga nagaistar sa siudad sang Filipos. a Sa kapitulo 4 sini nga libro, ginpalig-on ni Pablo ang mga kauturan sa kongregasyon nga magkasadya. Ginpasalamatan man niya sila sa ila kaalwan nga nagpasadya sa iya. (Filipos 4:4, 10, 18) Ginpakita man ni Pablo kon paano mabaton ang paghidait sang Dios paagi sa pangamuyo. Ginsugid man niya kon ano ang dapat naton hunahunaon kag himuon para mabaton ang bulig halin sa “Dios sang paghidait.”—Filipos 4:8, 9.