“Gusto ko nga magkadto ka sa Columbia Studios sa New York City kag kantahon mo ang isa sa aton mga ambahanon. Himuan nila ini sang rekord. Indi mo ini pag-isugid kay bisan sin-o.”

Sang ulihi nga bahin sang 1913, gintuman ni William Mockridge ining indi kinaandan nga asaynment nga ginhatag ni Charles Taze Russell. * Ato nga kanta, nga gintawag sang iban nga “The Sweet By-and-By,” ginhimo subong isa ka 78-rpm nga rekord. Nabal-an sang ulihi ni William nga ato nga kanta amo ang gamiton sa umpisa sang “Photo-Drama of Creation,” nga isa ka palaguaon diin ginkombinar ang mga pamulongpulong sa Biblia kag musika, silent movie, kag mga piktyur nga gindrowing sa kristal nga mga slide. Ang “Photo-Drama” una nga ginpasalida sa New York City sang Enero 1914.

Ang rekord ni William isa sa sobra 50 ka kanta nga ginpatokar sang mga opereytor sang radyo pono sa ila pagpasalida sang lainlain nga bersion sang “Photo-Drama” sa Ingles. Ang kalabanan sang musika ginhimo sang iban, pero ang pila ka rekord, lakip ang iya ni William, ginhimo sang mga Estudyante sang Biblia kag ang liriko sini halin sa isa nila ka songbook nga Hymns of the Millennial Dawn.

Sa sulod sang mga tinuig, ang mga ambahanon sa pagsimba nga ginagamit sang mga Saksi ginkomposo sang iban. Pero kon kinahanglan, ginaislan nila ang mga tinaga para magsanto sa ila paghangop sa Kasulatan.

Halimbawa, ang isa ka kanta nga ginpatokar sa “Photo-Drama” may tig-ulo nga “Our King Is Marching On,” nga ginbase sa “Battle Hymn of the Republic.” Ang una nga stanza sang “Battle Hymn” nagasiling: “Nakita sang akon mga mata ang himaya sang pagkari sang Ginuo.” Pero gin-islan sang mga Estudyante sang Biblia ang liriko sing: “Nakita sang akon mga mata ang himaya sang presensia sang Ginuo.” Ginbag-o nila ini para ipakita ang ila pagpati nga ang paggahom ni Jesucristo nagalakip indi lamang sang iya pagkari kundi sang iya presensia sa isa ka talalupangdon nga kalawigon sang tion.​—Mateo 24:3.

Sang ginbalhag ang Singing and Accompanying Yourselves With Music in Your Hearts ang 1966, gindula ang musika nga may sekular nga ginhalinan ukon iya sang iban nga relihion. Sina nga tuig, ang mga Saksi naghimo sing gamay nga orkestra kag ginrekord nila ang 119 ka kanta sa sini nga songbook. Gingamit sang mga kongregasyon ini nga rekord kon magkanta sila sa mga miting, kag ang iban nga Saksi nanamian magpamati sa sini sa ila mga balay.

Sang 2009, ang mga Saksi ni Jehova naghimo sing bag-o nga songbook nga Mag-amba kay Jehova. Ang vocal rendition sang mga kanta sini ginrekord sa madamo nga lenguahe. Sang 2013 ginsugdan sang mga Saksi ang paghimo sing mga music video para sa mga bata. Ang isa sini may tig-ulo nga Mangamuyo Pirme. Kada bulan, minilyon sining mga kanta ang gina-download sang mga nagabukas sang jw.org.

Madamo gid ang nagpasalamat sa sini nga musika. Si Julie nagsulat parte sa Mag-amba kay Jehova: “Katahom gid sang bag-o nga mga kanta! Kon ako lang isa, ginapatokar ko ang mga kanta nga santo gid sa akon ginabatyag. Gani, nabatyagan ko nga nagabakod pa gid ang akon kaangtanan kay Jehova kag mas determinado ako nga ihatag sa iya ang akon bug-os nga masarangan.”

Ang iloy nga si Heather nagsulat kon paano ang video nga Mangamuyo Pirme nakaapektar sa iya kabataan, nga pito kag siam ka tuig, “Nagbulig ini sa ila nga mangamuyo, indi lamang sa pagsugod sang adlaw ukon kon upod nila kami, kundi bisan san-o nga gusto nila istoryahon si Jehova.”