Nalipay ang mga Saksi ni Jehova sa pagsugid sang mensahe sang Biblia sa tanan nga tawo bangod sa ila gugma sa Dios kag sa ila isigkatawo, bisan sa mga tawo nga naghambal na sadto nga “Indi ako interesado.” (Mateo 22:37-​39) Ang amon gugma sa Dios amo ang nagapahulag sa amon nga tumanon ang sugo sang iya Anak nga “magpanaksi sing maid-id.” (Binuhatan 10:42; 1 Juan 5:3) Para mahimo ini, indi lang makaisa nga ginasugid namon sa mga tawo ang mensahe sang Dios, pareho sang ginhimo sang mga propeta sang Dios sang una. (Jeremias 25:4) Palangga namon ang mga tawo, gani ginatinguhaan gid namon nga masugid sa ila ang nagaluwas-kabuhi nga “maayong balita sang Ginharian,” bisan pa ang iban sa ila nagsiling sang primero nga indi sila interesado.​—Mateo 24:14.

 Sa masami, ang mga balay nga wala sing interesado sang primero, may interesado na pagbalik namon. Ari ang tatlo ka rason:

•   Nagasaylo ang mga tawo.

•   Ang iban nga tawo sa balay interesado sa amon mensahe.

•   Nagabag-o ang pagtamod sang mga tawo. Ang iban nga tawo nangin interesado sa Biblia kag nangin “mahunahunaon sa ila espirituwal nga kinahanglanon” bangod sa nagakatabo sa kalibutan ukon sa pagbag-o sang ila sitwasyon. (Mateo 5:3) Bisan ang mga nagapamatok mahimo magbag-o pareho kay apostol Pablo.​—1 Timoteo 1:​13.

 Pero, wala namon ginapilit ang bisan sin-o nga batunon ang amon mensahe. (1 Pedro 3:​15) Para sa amon, ang kada tawo amo dapat ang magdesisyon kon parte sa pagsimba.​—Deuteronomio 30:19, 20.