Sa bilog nga kalibutan, madamo nga tawo nga nagapangangkon nga sumulunod ni Jesucristo ang nagaentra sa pulitika. Ginasuportahan sang mga relihion ang isa ka pulitiko ukon isa ka partido para mas madamo nga tawo ang magpati sa ila mga ginapatihan kag mga prinsipio. Sa pihak naman nga bahin, ginagamit sang mga pulitiko ang mga isyu parte sa moral ukon sa kabuhi sang mga tawo para makuha ang suporta sang relihioso nga mga tawo. Kinaandan lang sa mga lider sang relihion nga magpadalagan bilang kandidato sa pulitika. Kag sa pila ka pungsod, ang isa kuno ka “Cristiano” nga relihion mahimo kabigon nga amo ang relihion sang isa ka pungsod.

 Ano sa banta mo? Dapat bala mag-entra sa pulitika ang mga sumulunod ni Jesucristo? Mabal-an mo ang sabat kon usisaon mo ang halimbawa nga ginpakita ni Jesus. Nagsiling sia: “Naghatag ako sa inyo sang sulundan, nga ang ginhimo ko sa inyo, dapat man ninyo himuon.” (Juan 13:15) Ano nga sulundan ang ginhatag ni Jesus parte sa pulitika?

 Wala. Wala nag-entra si Jesus sa pulitika sang kalibutan.

 Wala gintinguhaan ni Jesus nga makakuha sing posisyon sa pulitika. Nangindi sia nga mangin manuggahom sang gobierno sang tawo. Natabo ini sang gintanyag ni Satanas nga Yawa sa iya “ang tanan nga ginharian sang kalibutan.” (Mateo 4:8-10) a May tion man nga sang natalupangdan sang mga tawo ang maayo nga mga kinaiya ni Jesus, naghunahuna sila nga mangin maayo gid sia nga lider, gani ginpilit nila sia nga mag-entra sa pulitika. Pero ang Biblia nagsiling: “Pagkahibalo ni Jesus nga piliton nila sia nga mangin ila hari, nagkadto sia liwat sa bukid nga nagaisahanon lamang.” (Juan 6:15) Wala nagpadala si Jesus sa gusto sang mga tawo nga himuon niya. Sa baylo, nagpangindi sia nga mag-entra sa pulitika.

 Wala sing may gindampigan si Jesus sa mga isyu sa pulitika. Halimbawa, sang panahon ni Jesus naugot gid ang mga Judiyo bangod kinahanglan nila magbayad sing buhis sa gobierno sang Roma. Para sa ila, indi ini makatarunganon. Sang gintinguhaan nila nga kuhaon ang opinyon ni Jesus parte sa sini nga isyu, wala na nakigbais si Jesus kon bala insakto ukon indi ang pagbayad sina nga buhis. Ginsilingan niya sila: “Ihatag ninyo sa Cesar ang mga butang nga iya sang Cesar, apang sa Dios ang mga butang nga iya sang Dios.” (Marcos 12:13-17) Nangin neutral sia sa isyu sa pulitika pero ginsilingan niya sila nga dapat nila bayaran ang buhis nga ginapangayo sang gobierno sang Roma, nga amo ang ginarepresentar sang Cesar. Ginpakita man niya nga may limitasyon ang pagtuman sa sugo sang gobierno. Kay man, indi dapat pag-ihatag sang isa ka tawo sa gobierno ang mga butang nga para lang sa Dios, pareho sang debosyon kag pagsimba.—Mateo 4:10; 22:37, 38.

 Ginsuportahan ni Jesus ang isa ka gobierno sa langit, ang Ginharian sang Dios, kag gintudlo ini sa iban. (Lucas 4:43) Wala nag-entra si Jesus sa pulitika bangod kabalo sia nga ang Ginharian sang Dios lamang, indi ang gobierno sang tawo, ang makahimo sang katuyuan sang Dios sa duta. (Mateo 6:10) Naintiendihan niya nga indi paggamiton sang Dios ang mga gobierno sang tawo, kundi buslan ini sang Ginharian sang Dios.—Daniel 2:44.

 Wala. Ginsunod sang mga sumulunod ni Jesus ang iya sugo nga dapat “indi [sila] bahin sang kalibutan.” (Juan 15:19) Ginsunod nila ang iya halimbawa kag wala sila nag-entra sa bisan ano nga pulitika sa kalibutan. (Juan 17:16; 18:36) Imbes nga mag-entra sa pulitika, gintuman nila ang ginsugo ni Jesus nga magbantala kag magpanudlo parte sa Ginharian sang Dios.—Mateo 28:18-20; Binuhatan 10:42.

 Gin-una sang mga Cristiano sang unang siglo ang pagtuman sa Dios, pero kabalo man sila nga dapat nila respetuhon ang sekular nga awtoridad. (Binuhatan 5:29; 1 Pedro 2:13, 17) Gintuman nila ang mga kasuguan kag nagbayad sila sing buhis. (Roma 13:1, 7) Bisan pa wala sila nag-entra sa pulitika, ginaapresyar nila ang proteksion kag serbisyo nga ginahatag sang gobierno.—Binuhatan 25:10, 11; Filipos 1:7.

 Ginasugid sang Biblia nga si Jesus kag ang iya mga sumulunod sang una wala gid nag-entra sa pulitika. Bangod sini, bilang mga Cristiano, ang mga Saksi ni Jehova sa bilog nga kalibutan neutral man sa bisan ano nga isyu sa pulitika. Pareho sa mga Cristiano sang unang siglo, ginasunod man nila ang sugo ni Jesus nga ibantala “ining maayong balita sang Ginharian.”—Mateo 24:14.