Mabasa sa Biblia ang pinakamaayo nga impormasyon nga makabulig sa aton pagkabuhi. Kon pirme mo ini basahon, pamalandungan, kag iaplikar ang imo natun-an, “mangin madinalag-on ka.” (Josue 1:8; Salmo 1:1-3) Makilala mo man ang Dios kag ang iya Anak nga si Jesus, kag paagi sini nga ihibalo matigayon mo ang kaluwasan.—Juan 17:3.

Dapat mo gid bala pasunuron ang pagbasa sang mga libro sa Biblia? May opsyon ka. Ini nga iskedyul sa pagbasa sang Biblia makabulig sa imo nga mabasa sing pasunod ang mga libro sang Biblia ukon basahon ini base sa topiko. Halimbawa, puede mo basahon ang pila ka bahin nga nagasugid parte sa kasaysayan sang pagpakig-angot sang Dios sa Israel sang una. Puede mo man basahon ang iban nga bahin para matun-an kon paano nagsugod kag nag-uswag ang Cristianong kongregasyon sang unang siglo. Kon mabasa ka sing pila ka kapitulo kada adlaw, mabasa mo ang bilog nga Biblia sa isa ka tuig.

Kon gusto mo man basahon ang Biblia kada adlaw, ukon nagapangita ka sing iskedyul nga mabasa ang Biblia sa sulod sang isa ka tuig, ukon kon bag-uhan ka kag gusto mo basahon ang Biblia, ini nga iskedyul makabulig sa imo. I-download ining ma-print nga plano sa pagbasa sang Biblia, kag sugdi dayon ang pagbasa.