Pagbag-o sang Klima kag ang Aton Palaabuton—Ang Ginasiling sang Biblia
“Ang pagbag-o sang klima nangin isa ka kalamidad. Amat-amat na nga indi maistaran ang duta.”—The Guardian.
Ang mga tawo may serioso nga problema nga sila mismo ang naghimo. Madamo nga scientist ang nagapati nga ang global warming resulta sang mga ginahimo sang mga tawo. Bangod sa pag-init sang temperatura, nagbag-o ang klima kag nagdamo ang makahalalit nga mga kalamidad. Nalakip sa sini ang masunod:
Pirmepirme kag grabe nga mga kalamidad, pareho sang mga heat wave, mas malawig nga tingadlaw, kag mga bagyo, nga ginabangdan sang dugang pa nga pagbaha kag mga wildfire.
Nagakatunaw nga mga glacier kag ice sa Arctic.
Pagtaas sang nibel sang dagat.
Ang problema sa klima mabatyagan sa tanan nga bahin sang kalibutan. Pagkatapos mabinagbinag ang mga kahimtangan sa 193 ka pungsod, ang New York Times nagsiling: “Nagapangayo na sing tabang ang aton planeta.” Bangod sang kamatayon kag pag-antos nga resulta sang pagbag-o sang klima, gintawag ini sang World Health Organization nga “pinakadaku nga katalagman sa panglawas nga ginaatubang sang mga tawo.”
Pero, may paglaum kita sa palaabuton. Gintagna sang Biblia ang mga nagakatabo subong, kag kon ngaa makapaabot kita nga magapasilabot ang Dios kag kon ano ang iya himuon para proteksionan ang aton palaabuton.
Gintagna bala sang Biblia ang pagbag-o sang klima?
Huo. Ang mga problema sa klima bangod sang global warming nalakip sa mga gintagna sang Biblia nga matabo sa aton tion subong.
Tagna: Ang Dios magalaglag sa “mga nagalaglag sang duta.”—Bugna 11:18.
Gintagna sang Biblia nga maabot ang tion nga bangod sa mga ginahimo sang mga tawo daw maguba na ang duta. Mas nagadasig ang pagguba sang mga tawo sa planeta kay ang ila mga ginahimo amo ang rason sang global warming.
Ini nga tagna nagapakita sang isa ka rason kon ngaa indi naton mapaabot nga maluwas sang mga tawo ang duta. Talupangda nga ang Dios magapasilabot samtang ang mga tawo “nagalaglag sang duta.” Gani bisan ano pa ang himuon sang mga tawo nga gusto proteksionan ang duta, indi gid nila mapunggan ang pagkaguba sini.
Tagna: “Makahaladlok nga mga talan-awon.”—Lucas 21:11.
Gintagna sang Biblia nga sa aton tion subong may “makahaladlok nga mga talan-awon,” ukon makahaladlok nga mga hitabo. Ang pagbag-o sang klima nagresulta sa makahaladlok nga mga klima sa bilog nga kalibutan. Subong, ang pila ka tawo may eco-anxiety ukon ang kahadlok nga basi indi na mabuhi ang mga tawo bangod sa halit sa palibot.
Tagna: “Sa katapusan nga mga adlaw magaabot ang makahalanguyos nga mga tion nga mabudlay atubangon. Kay ang mga tawo mangin mahigugmaon sa kaugalingon, mahigugmaon sa kuarta, . . . indi mainunungon, . . . indi magsugot sa bisan ano nga kasugtanan, . . . maluib, matig-a sing ulo.”—2 Timoteo 3:1-4.
Gintagna sang Biblia ang mga batasan sang mga tawo nga nangin kabangdanan sang pagbag-o sang klima. Ginapasulabi sang mga gobierno kag sang mga negosyante ang kuarta sangsa kaayuhan sang mga tawo sa ulihi. Bisan pa nga tinguhaan nila nga magbuligay, indi gihapon sila mag-ugyunay kon ano ang himuon para mauntat ang global warming.
Ginapakita sini nga tagna nga indi kita dapat magpaabot nga ang kalabanan nga tawo magabag-o kag protektahan nila ang duta. Sa baylo, ang Biblia nagasiling nga ang mga tawo nga kaugalingon lang ang ginapensar “magalain pa gid.”—2 Timoteo 3:13.
Kon ngaa makasalig kita nga may himuon ang Dios
Ginapakita sang Biblia nga ang aton planeta kag ang mga nagaistar sa sini, importante gid kay Jehova a nga Dios nga aton Manunuga. Binagbinaga ang tatlo ka bersikulo sa Biblia nga nagapakita nga may himuon gid ang Dios.
1. Ang Dios “wala nagtuga [sang duta] sa wala sing pulos, kundi nagbuhat sini agod puy-an.”—Isaias 45:18.
Tumanon sang Dios ang iya katuyuan sa duta. (Isaias 55:11) Indi niya pagtugutan nga maguba ini ukon indi na mapuy-an.
2. “Ang mga mahagop magapanubli sang duta, kag mangin malipayon gid sila sa bugana nga paghidait. Ang mga matarong magapanubli sang duta, kag magapuyo sila sa sini sa wala sing katubtuban.”—Salmo 37:11, 29.
Nagpromisa ang Dios nga ang mga tawo mapuyo sa duta sing wala katapusan kag may paghidait na.
3. “Ang mga malauton utdon sa duta.”—Hulubaton 2:22.
Nagpromisa ang Dios nga dulaon niya ang mga tawo nga padayon nga nagahimo sing malain, pati ang mga tawo nga nagaguba sang duta.
Kon ano ang himuon sang Dios sa palaabuton
Paano tumanon sang Dios ang iya mga ginpromisa nga himuon sa sini nga duta? Himuon niya ini paagi sa isa ka gobierno nga magagahom sa bilog nga duta nga ginatawag Ginharian sang Dios. (Mateo 6:10) Ini nga Ginharian magagahom halin sa langit. Indi na ini magnegosyar sa mga gobierno sang tawo parte sa duta kag sa palibot. Sa baylo, buslan sang Ginharian sang Dios ang mga gobierno sang tawo.—Daniel 2:44.
Ang Ginharian sang Dios isa ka maayong balita para sa tanan nga tawo kag sa planeta mismo. (Salmo 96:10-13) Binagbinaga kon ano ang himuon ni Jehova nga Dios paagi sa iya Ginharian.
Kay-uhon niya ang palibot
Ang ginasiling sang Biblia: “Ang kamingawan kag ang kigas nga duta magahugyaw, kag ang desyerto nga kapatagan magakalipay kag mapuno sing mga bulak.”—Isaias 35:1.
Ang buot silingon sini parte sa aton palaabuton: Kay-uhon ni Jehova ang planeta, bisan ang mga lugar nga ginhalitan gid sang mga tawo.
Kontrolon niya ang abnormal nga tiempo
Ang ginasiling sang Biblia: “Ginpauntat [ni Jehova] ang unos; naglinong ang mga balod sang dagat.”—Salmo 107:29.
Ang buot silingon sini parte sa aton palaabuton: May gahom si Jehova nga kontrolon ang mga puersa sang kinaugali. Indi na mag-antos ang mga tawo bangod sa abnormal nga tiempo.
Tudluan niya ang mga tawo kon paano atipanon ang duta
Ang ginasiling sang Biblia: “Hatagan ko ikaw sing paghangop kag tudluan ko ikaw sang dalanon nga dapat mo laktan.”—Salmo 32:8.
Ang buot silingon sini parte sa aton palaabuton: Ginhatagan ni Jehova ang mga tawo sing responsibilidad nga atipanon ang duta. (Genesis 1:28; 2:15) Tudluan niya kita kon paano himuon sing maayo ang aton papel bilang manugdumala sang iya mga tinuga, kag indi na naton paghalitan ang palibot.
a Si Jehova ang ngalan sang Dios. (Salmo 83:18) Tan-awa ang artikulo nga “Sin-o si Jehova?”
Basi Manamian Ka Man
ANG LALANTAWAN
Makay-o Pa Bala ang Duta nga Ginaguba sang Tawo?
Ginsugid sing abanse sang Biblia indi lang ang pagkaguba sang palibot subong, kundi kon ano man ang matabo sa sini sa ulihi.
IBAN PA NGA TOPIKO
Sin-o ang Magasalbar sa Duta?
Suno sa pila ka environmental expert, mas grabe na gid ang halit nga ginahimo sang tawo sa kabuhi sa duta amo nga may mga klase sang tanom kag sapat nga madali na lang maubos.
PADAYON NGA MAGBANTAY!
Grabe nga Tigpalamangag—Ano ang Ginasiling sang Biblia?
May solusyon pa bala ini nga problema sa bilog nga kalibutan? May paglaum pa bala nga mag-ayo ang sitwasyon sa palaabuton?
IBAN PA NGA TOPIKO
Makabulig Bala sa Imo ang Biblia Kon Maapektuhan Ka sang Abnormal nga Tiempo?
May mga laygay ang Biblia nga makabulig sa imo antes, sa tion, kag pagkatapos sang kalamidad.
IMPORTANTE NGA MGA PANUDLO SANG BIBLIA
Ano ang Ginharian sang Dios?
Sang diri sia duta, pirme ginatudlo ni Jesus ang parte sa Ginharian sang Dios. Madugay na nga ginapangamuyo sang iya mga sumulunod nga magkari ang Ginharian.
ANG LALANTAWAN
Ano ang Himuon sang Ginharian sang Dios?
Kabalo si Jesus nga ang Ginharian sang Dios amo lamang ang gobierno nga makasolbar sang mga problema sa duta. Ano na ang nahimo sang Ginharian nga nangin rason para saligan naton ini?
