Ang mga tawo magadesisyon kon sin-o nga lider ang ila pilion.

 Ano ang ginasiling sang Biblia?

 Ginasugid sang Biblia ang limitasyon sang tanan nga lider nga tawo.

•   “Indi kamo magsalig sa mga prinsipe ukon sa anak sang tawo, nga indi makaluwas. Ang iya ginhawa nagagua, nagabalik sia sa duta; sa sina mismo nga adlaw ang iya panghunahuna madula.”—Salmo 146:3, 4, footnote.

 Bisan ang pinakamanami nga mga lider nga tawo mapatay sa ulihi. Isa pa, indi sila makasigurado nga padayunon sang magabulos sa ila ang ila maayo nga mga proyekto.—Manugwali 2:18, 19.

 Ang matuod ginasugid sang Biblia nga ang mga tawo wala gintuga para gamhan ang ila kaugalingon.

•   “Wala sing ikasarang ang tawo sa pagtuytoy sang iya tikang.”—Jeremias 10:23.

 May ara bala maayo nga lider sa aton panahon subong?

 Ang Biblia nagasiling nga gintangdo sang Dios ang isa nga pinakamasaligan kag may ikasarang gid nga mangin lider: si Jesucristo. (Salmo 2:6) Si Jesus ang Hari sang Ginharian sang Dios, ang gobierno nga nagagahom halin sa langit.—Mateo 6:10.

 Batunon mo bala si Jesus bilang imo lider? Ginasugid sang Biblia kon ngaa importante gid ang imo sabat sa sini nga pamangkot:

•   “Padunggi ninyo ang anak [si Jesucristo], agod ang Dios indi maakig kag indi kamo madula sa matarong nga dalanon, kay ang Iya kaakig magasilabo sa gilayon. Malipayon ang tanan nga nagadangop sa Iya.”—Salmo 2:12.

 Kinahanglan mo na magdesisyon subong. Base sa mga tagna sa Biblia, si Jesus nagsugod sa paggahom sang 1914 kag sa indi madugay buslan sang Ginharian sang Dios ang tanan nga gobierno sang tawo.—Daniel 2:44.

 Para sa dugang nga impormasyon kon paano mo masuportahan ang paggahom ni Jesus, basaha ang artikulo nga “Magdesisyon nga Suportahan ang Ginharian sang Dios Subong!”