Naggua sila kag nagalinagumba ang ila pagdalagan! Tama gid kaathag sang paglaragway sa apat ka gamhanan nga kabayo kag sa mga nagasakay sa ila nga daw tuodtuod gid ini kon basahon naton sa Biblia! Ang una amo ang puti nga kabayo, nga ang nagasakay sa sini isa ka mahimayaon nga bag-o nga hari. Ang nagasunod sa iya amo ang kabayo nga daw kalayo ang kolor, nga ang nagasakay sa sini nagakuha sing paghidait sa bilog nga duta. Ang ikatlo amo ang itom nga kabayo, nga ang nagasakay sa sini nagauyat sing timbangan ukon kiluhan nga nagapahayag sing masubo nga mensahe parte sa kakulang sing pagkaon. Ang ikap-at amo ang maluspad nga kabayo, nga nagapatimaan sang balatian kag iban pa nga makamamatay nga mga butang, nga ang nagasakay sa sini amo mismo ang Kamatayon. Kag ang Lulubngan, nga amo ang kabilugan nga lulubngan sang katawhan, nagasunod para magtipon sang tanan nga nagkalamatay!—Bugna 6:1-8.

“Ginkulbaan gid ako sang una ko nga ginbasa ang parte sa apat ka manugkabayo. Pamatyag ko malapit na ang Adlaw sang Paghukom kag bangod indi pa ako handa, indi gid ako maluwas.”—Crystal.

“Nalingaw gid ako sa apat ka manugkabayo nga nagasakay sa mga kabayo nga lainlain ang kolor. Sang naintiendihan ko ini nga palanan-awon, nangin maathag na ini sa akon.”—Ed.

Pareho bala kay Crystal ang imo nabatyagan parte sa apat ka manugkabayo sang Bugna? Ukon pareho kay Ed? Diin man sa sini ang imo nabatyagan, ang pagsakay sang apat ka manugkabayo isa gid ka talalupangdon nga hitabo sa Bugna, ang katapusan nga libro sa Biblia. Nahibaluan mo bala nga makabenepisyo ka kon maintiendihan mo ini nga palanan-awon? Paano? Ang Dios nagpromisa nga matigayon mo ang matuod nga kalipay kon imo basahon, tun-an, kag iaplikar ang mga nasulat sa sining matagnaon nga libro.—Bugna 1:1-3.

Bisan pa ginakulbaan ang iban sa palanan-awon parte sa apat ka manugkabayo, wala ini ginsulat para pahugon ka. Ang matuod, napalig-on sini ang pagtuo sang minilyon kag naghatag pa gani ini sa ila sing paglaum nga may maayo nga palaabuton. Mahimo nga amo man sini ang mangin epekto sa imo! Palihug basaha ang masunod nga artikulo.