Nagdaku ako sa Rmaysh, malapit sa dulunan sang Israel kag Lebanon, sang tion nga may inaway sibil. Madumduman ko pa ang paglupok sang mga land mine kag ang inosente nga mga biktima nga wala na sing kamot ukon tiil. Pigado ang pangabuhi, kag lapnag ang krimen kag kasingki.

Ang amon pamilya miembro sang Maronite Church, isa sa mga Eastern Catholic Church. Masako pirme si Tatay sa pag-aman sa amon sa materyal kay 12 kami sa pamilya, pero ginapat-od ni Nanay nga makasimba kami tanan. Pero nabatyagan ko sang ulihi, nga ang simbahan pareho man sa katilingban nga indi makasuportar sa mga maluya.

Sang pamatan-on ako, nanamian ako sang kung fu. Naghanas ako sing maayo kag nangin sampaton sa pagsumbag kag pagsipa kag sa iban pa nga gamit sa martial art. Naghunahuna ako, ‘Indi ko mapauntat ang inaway, pero puede ko mapauntat ang masingki nga mga tawo.’ Kon may makita ako nga nagainaway, nagatambag dayon ako. Madali ako maakig, amo nga nahadlok sa akon ang mga tawo sa nabagatnan sang Lebanon kay nagapakigbato ako batok sa inhustisya kag kasingki.

Sang 1980, nag-entra ako sa kung fu club sa Beirut. Kada adlaw, nagalinupok ang mga bomba, missile, kag mga raket, pero padayon gihapon ako sa paghanas. Nagakaon lang ako, nagatulog, kag nagakabuhi pareho ni Bruce Lee, isa ka artista nga Chinese-American kag kampeon sa kung fu. Gin-ilog ko ang iya estilo sang buhok, paglakat, kag pagsinggit kon naga-kung fu. Wala gid ako nagayuhum.

Gusto ko gid nga mangin propesyonal sang kung fu sa China. Isa ka gab-i, nagahanas gid ako bilang paghanda sa pagkadto sa China sang may nanuktok. Ang amigo ko gali nga may upod nga duha ka Saksi ni Jehova. Nakauniporme ako sang  itom, kag grabe ang akon pamalhas. Ginsilingan ko sila, “Wala ’ko sing nabal-an sa Biblia.” Pero amo gali yadto ang magapabag-o sang akon kabuhi.

Ginpakita sang mga Saksi sa akon sa Biblia kon ngaa indi gid magmadinalag-on ang mga tawo sa pagdula sang inhustisya kag kasingki. Ginpaathag nila nga si Satanas nga Yawa ang ginhalinan sining mga problema. (Bugna 12:12) Nagdayaw gid ako sa paghidait kag kompiansa sang mga Saksi. Kag nakibot gid ako sang gintudlo nila sa akon nga may ngalan ang Dios. (Salmo 83:18) Ginpakita man nila sa akon ang 1 Timoteo 4:8, nga nagasiling, “Ang paghanas sa lawas may diutay nga kapuslanan; apang ang diosnon nga debosyon mapuslanon sa tanan nga butang, kay nagasaad ini sang kabuhi karon kag sa palaabuton.” Daku gid ang epekto sini sa akon.

Ugaling wala na ako nakaistorya sa mga Saksi, kay ginsilingan sila sang akon pamilya nga indi na magbalik. Pero namat-od ako nga mag-untat na sa kung fu kag magtuon sa Biblia. Indi magpasugot ang akon mga utod, pero gusto ko gid nga makita liwat ang mga Saksi ni Jehova kag magtuon sa Biblia upod sa ila.

Ginpangita ko ang mga Saksi pero indi ko sila makita. Nasubuan man ako bangod gulpi lang napatay si Tatay, kag bangod sang iban pa nga problema sa pamilya. Nag-obra ako sa kompanya sang konstruksion, kag isa ka bes ang akon kaupod sa trabaho nga si Adel nagmuno nga kasubo kuno sa akon. Gin-istoryahan niya ako parte sa pagkabanhaw sa Biblia. Sa sulod sang siam ka bulan, ining mahigugmaon kag mainayuhon nga Saksi mapinasensiahon nga nagtudlo sa akon sa Biblia.

Samtang padayon ang amon pagtuon, nahangpan ko nga dapat ko bag-uhon ang akon personalidad. Indi ini mahapos. Nagapanginit ako pirme. Natun-an ko sa Biblia kon paano kontrolon ang akon kaakig. Halimbawa, mabasa sa Mateo 5:44 ang laygay ni Jesus: “Padayon nga higugmaa ang inyo mga kaaway kag ipangamuyo ang mga nagahingabot sa inyo.” Kag ang Roma 12:19 nagapaandam: “Indi kamo magtimalos, . . . kay nasulat na: ‘Akon ang pagtimalos; ako ang magabalos, siling ni Jehova.’” Ini nga mga teksto kag ang iban pa amat-amat nga nakabulig sa akon nga mangin kalmado.

Bisan pa nga namalabag sadto ang akon pamilya nga magtuon ako sa mga Saksi ni Jehova, ginatahod na nila subong ang mga Saksi. Ang isa ko gani ka manghod nga lalaki nangin Saksi man, kag ginapangapinan ni Nanay ang amon pagtuo asta sang napatay sia.

Ginpakamaayo man ako sang dalayawon kag mainunungon nga asawa nga si Anita, nga akon suod nga kaupod sa bug-os tion nga ministeryo. Sugod sang tuig 2000, nag-istar kami ni Anita sa Eskilstuna, Sweden, kag nagabulig kami sa mga tawo nga nagahambal sing Arabic nga matun-an ang Biblia.

Naluoy gihapon ako sa mga tawo nga nagaantos tungod sang kasingki. Bangod nahibaluan ko ang matuod nga kabangdanan sini, kag sa dili madugay dulaon na ini sang Dios, nabatyagan ko ang matuod nga kalipay kag kalinong.—Salmo 37:29.