Luyag ni Jehova nga Dios nga isugid naton pirme sa iya ang aton mga ginakabalak-an. (Lucas 18:1-7) Nagapamati sia bangod interesado sia sa aton. Ginaagda kita sang aton Amay sa langit nga mangamuyo, gani ngaa indi naton pagbatunon ang iya pangagda?—Basaha ang Filipos 4:6.

Ang pangamuyo indi lang basta pagpangayo sing bulig, kundi nagabulig ini sa aton nga mangin suod sa Dios. (Salmo 8:3, 4) Kon pirme naton ginasugid sa Dios ang aton nabatyagan, mangin suod pa gid kita nga abyan niya.—Basaha ang Santiago 4:8.

Kon nagapangamuyo kita, indi luyag sang Dios nga pakitakita ini, sulitsulit, ukon saulado. Indi man importante sa iya ang posisyon kon nagapangamuyo. Luyag ni Jehova nga mangamuyo kita sing tinagipusuon. (Mateo 6:7) Halimbawa, sa Israel sadto, nangamuyo si Ana parte sa mabug-at nga problema sang pamilya. Sang ulihi, sang nalubad na ang iya problema, nagpasalamat sia sa Dios paagi sa tinagipusuon nga pangamuyo.—Basaha ang 1 Samuel 1:10, 12, 13, 26, 27; 2:1.

May daku gid kita nga pribilehiyo nga maistorya sa Dios ang aton mga kabalaka. Madayaw man naton sia kag mapasalamatan sa iya ginahimo. Gani, dapat pabaloran gid naton ining hamili nga pribilehiyo.—Basaha ang Salmo 145:14-16.