Natawo ako sa Bilbao, sa naaminhan nga Espanya nga may kasarangan ang pagkabuhi. Ikaduha ako sa apat ka kabataan. Ang amon pamilya debotado nga Katoliko, kag nagatambong ako sa Misa adlaw-adlaw. Sang 23 anyos ako, nangin manunudlo ako—ang obra nga nanamian ko gid sa sulod sang 40 ka tuig. Lakip sa iban ko pa nga ginatudlo, nanamian gid ako nga itudlo ang Katoliko nga relihion, kag kada gab-i nagaalagad ako subong katekista, nga nagatudlo sa mga bata nga babayi antes sang ila una nga pagpangalawat.

Pagkatapos sang 12 ka tuig nga malipayon nga pag-asawahay, nabalo ako nga may salaguron nga apat ka bata nga babayi. Treintay tres pa lang ako sadto. Nangita ako sing paumpaw sa akon relihion nga Katoliko, pero madamo ako sing ginapaligban: ‘Ngaa nagakapatay gihapon ang mga tawo kay gingawad na kita sang Cristo? Ngaa nagapangamuyo kita nga magkari ang Ginharian sang Dios kon ang maayo nga mga tawo mapalangit?’ Kag labaw sa tanan, nahunahuna ko: ‘Kon ginahukman kita sang Dios kon mapatay kita, ngaa kinahanglan pa naton biyaan ang langit, purgatoryo, ukon impierno para sa katapusan nga paghukom?’

Ginpamangkot ko ini sa pila ka pari. Ang isa sa ila nagsabat: “Wala ko kabalo. Pamangkuta ang obispo. Ngaa ginapaligban mo gid ina? Nagapati ka sa Dios, indi bala? Pabay-i na lang ’na!” Pero padayon ko gihapon nga ginpangita ang mga sabat. Sang ulihi, nagtambong ako sa mga Jesuita, Pentecostal, kag Gnostic. Pero wala gihapon nasabat ang akon mga pamangkot.

Sang mga sisentahon ako, gin-agda ako sang siete anyos nga estudyante nga magtambong sa pagtilipon sang mga Saksi ni Jehova. Nanamian ako sa akon nakita kag nabatian, pero bangod sang kasakuon, wala na ako nakaistorya liwat sa mga Saksi. Duha ka tuig sang ulihi, ang mag-asawa nga Saksi nga sanday Juan kag Maite nagkadto sa balay. Sa sulod sang tatlo ka bulan, madamo ako sing pamangkot nga nasabat nila, kag sang ulihi nagtuon ako sa Biblia.

 Nalangkag gid ako sa amon pagtuon! Gin-usisa ko gid sing maayo kon ginatudlo sang mga Saksi ni Jehova ang kamatuoran paagi sa paggamit sang tatlo ka translation sang Biblia. Wala madugay narealisar ko nga wala gali ako sing namang-an sa relihion sa sulod sang malawig nga tinuig. Natublag ako kay lain gid ang akon ginapatihan sadto sa akon natun-an sa Biblia. Nagmag-an ang akon pamatyag, nga daw subong bala nga ang akon mga ginpatihan sadto daw pareho sang nanggamot nga kahoy nga gingabot.

Sang ulihi, nagbalatian sing malala ang akon ikaduha nga bana kag napatay. Sa sina man nga tion, nagretiro ako sa akon obra kag naghalin sing makadali sa Bilbao. Nagsaylo man sa iban nga lugar sanday Juan kag Maite. Nasubuan gid ako kay nauntat ang amon pagtuon sa Biblia. Pero, nahibaluan ko nga nakakita ako sing bahandi. Indi ko gid yadto malipatan.

Mga 20 ka tuig sang ulihi, sang 82 anyos ako, nagbalik sanday Juan kag Maite sa Bilbao kag ginduaw nila ako. Nalipay gid ako nga makita sila liwat. Narealisar ko nga wala gid ako ginkalimtan ni Jehova, kag nagpadayon ako sa pagtuon. Mapinasensiahon gid sanday Juan kag Maite bisan pa sulitsulit lang ang akon ginapamangkot sa ila. Kinahanglan nga sulitsulit ko nga pamatian ang sabat sang Biblia para mabaton ko nga sala ang akon mga pagpati sadto. Luyag ko nga handa ako nga ipaathag ang kamatuoran sa Biblia sa akon mga abyan kag pamilya.

Ang adlaw sang akon bawtismo, sa edad nga 87, amo ang pinakamasadya sa akon kabuhi. Ginhiwat ang bawtismo sa asembleya sang mga Saksi ni Jehova. Ang isa ka Cristiano nga gulang naghatag sing base sa Biblia nga pamulongpulong nga ginapatuhoy ilabi na sa amon nga mga balawtismuhan. Nakahibi gid ako. Nagapamati ako sa sini nga daw si Jehova ang nagapakighambal sa akon. Sa tapos ako mabawtismuhan, madamo nga Saksi ang nagpalapit kag nagpangamusta sa akon, bisan pa nga ang iban sa ila wala ko pa makilala.

Nahibaluan ko nga si Jesucristo “ang dalan.” (Juan 14:6) Pero paagi sa pagtuon ko sa Biblia nakilala ko si Jehova, ang isa nga luyag ni Jesus nga makilala naton. Subong makapangamuyo na ako sa Dios bilang akon suod nga Amay kag Abyan. Daku gid ang pagbag-o sa akon kabuhi sang ginbasa ko ang libro nga Mangin Suod kay Jehova. * Sa primero ginbasa ko ini sa isa lang ka gab-i! Natandog gid ako nga mahibaluan kon daw ano ka maluluy-on si Jehova.

Kon mahunahuna ko ang akon malawig nga pagpangita sang kamatuoran, madumduman ko ang ginsiling ni Jesus: “Padayon sa pagpangayo, kag hatagan kamo; padayon sa pagpangita, kag inyo makita; padayon sa pagpanuktok, kag pagabuksan kamo.” (Mateo 7:7) Subong nga nakita ko na ang mga sabat, nalipay ako nga isugid ini sa iban.

Bisan pa 90 na ako subong, madamo gihapon ako sing dapat tun-an parte kay Jehova. Espesyal gid para sa akon ang kada pagtilipon sa Kingdom Hall, kay nagatigayon ako sing kaalam kag nagapakig-upod ako sa akon pinalangga nga mga kauturan. Gusto ko gid nga mangin manunudlo liwat sa ginsaad sang Dios nga Paraiso sa duta. (Bugna 21:3, 4) Ginapaabot ko gid ang tion nga makita ko liwat ang akon napatay nga mga hinigugma kag matudluan sila sang kamatuoran sa Biblia. (Binuhatan 24:15) Nalangkag gid ako nga isugid sa ila ang hamili nga regalo nga ginhatag ni Jehova sa akon sang tigulang na ako!