• NATAWO: 1963

• PUNGSOD: BRITAIN

• KABUHI SANG UNA: MAY MADINALAG-ON NGA PROPESYON

ANG AKON NAGLIGAD:

Natawo ako sa Croydon, South London. Ikan-om ako sa siam ka mag-ulutod. Ang akon mga ginikanan halin sa isla sang St. Vincent sa Caribbean. Metodista si Nanay. Wala ako sing interes parte sa Dios, bisan pa nanamian ako magtuon. Kon bakasyon, nagakadto ako sa sapa kag didto nagabasa sang mga libro nga ginhulam ko sa librarya.

Pila ka tuig pagkagradweyt ko, napensaran ko nga buligan ang mga kubos. Gani nagbulig ako sa mga wala sing puluy-an kag sa mga may diperensia sa lawas kag panghunahuna. Dayon nagkuha ako sang kurso sa health science (isa ka kurso kon paano ang siensia, teknolohiya, engineering, ukon matematika magamit sa ikaayong lawas). Pagkagradweyt ko, madamo ako sang naobrahan kag mataas ang akon posisyon. Nangin maluho ang akon pagkabuhi. Bilang freelance management consultant kag social researcher, laptop lang kag koneksion sa Internet ang kinahanglan ko. Sinemana ako sa iban nga pungsod, nagatener sa paborito ko nga hotel, nagalagaw sa matahom nga mga lugar, nagapa-spa kag naga-gym. Pamatyag ko, daw ara na sa akon ang tanan. Padayon gihapon ako nga nagabulig sa mga kubos.

KON PAANO GINBAG-O SANG BIBLIA ANG AKON KABUHI:

Madugay ko na nga ginapaligban, ‘Ngaa nagaluntad kita, kag ano ang katuyuan sang kabuhi?’ Pero wala gid ako nangusisa sa Biblia. Isa ka adlaw sang 1999, ang akon manghod nga si Margaret nga isa na ka Saksi ni Jehova, nagbisita sa akon upod sa iya amiga nga Saksi, nga gusto gid magtudlo sa akon. Nagsugot ako nga magtuon sa Biblia upod sa amiga sang akon manghod, pero daw wala ako nagauswag kay masako ako sa akon obra kag pagliwaliwa.

Sang tig-ilinit sang 2002, nagsaylo ako sa bagatnan-katundan sang England. Nagkuha ako didto sang kurso sa social research para mangin doctorate. Nagtambong na ako sing regular sa mga pagtilipon sa Kingdom Hall upod sa akon bata nga lalaki. Mas madamo ako sing natun-an sa Biblia kon paano masolusyunan ang mga problema sangsa natun-an ko sa kolehiyo. Matuod gid ang ginasiling sang Mateo 6:24, nga indi ka makaalagad sa duha ka agalon. Dapat  magpili ka sa Dios kag sa manggad. Nahibaluan ko nga dapat ako magdesisyon kon ano ang akon unahon.

Isa ka tuig antes sini, pirme ako nagaupod sa isa ka grupo sang mga Saksi sa ila pagtuon sa libro nga Is There a Creator Who Cares About You? a Nakumbinsi ako nga ang aton lamang Manunuga nga si Jehova, ang makahatag solusyon sa aton mga problema. Sa unibersidad, gintudluan ako nga indi na naton kinahanglan ang Manunuga sa aton kabuhi. Naakig gid ako. Pagligad sang duha ka bulan, nag-untat ako eskwela kag nagpokus sa espirituwal.

Napahulag gid ako sang Hulubaton 3:5, 6 nga bag-uhon ang akon pagkabuhi: “Salig sa GINOO sa bug-os mo nga tagiposoon, kag dili magsandig sa imo kaugalingon nga paghangup. Sa tanan mo nga dalanon kilalaha sia, kag magatuytuy sia sa imo mga banas.” Mas makalilipay ang pagtuon parte sa aton mahigugmaon nga Dios sangsa manggad kag kabantugan nga mahatag sang pagka-doctorate. Samtang nagadugang ang akon nahibaluan parte sa katuyuan ni Jehova para sa duta kag sa paghatag ni Jesus sang iya kabuhi para sa aton, nagdugang pa gid ang akon handum nga idedikar ang akon kabuhi sa aton Manunuga. Nabawtismuhan ako sang Abril 2003. Sugod sadto, ginpasimple ko na ang akon kabuhi.

BENEPISYO:

Indi gid matumbasan ang akon pagpakig-abyan kay Jehova. Nabatyagan ko ang kalinong kag kalipay kay nakilala ko sia. Nalipay man ako sa pagpakig-upod sa matuod nga mga sumilimba sang Dios.

Paagi sa akon natun-an sa Biblia kag pagtambong sa Cristianong pagtilipon, nabusog gid ang akon handum sa kamatuoran. Nanamian ako magsugid sa iban sang akon mga ginapatihan. Amo na ini ang akon karera. Paagi sini mabuligan ko na ang mga tawo nga matigayon ang maayo nga kabuhi subong kag may matahom nga paglaum nga mabuhi sa bag-o nga kalibutan. Sugod sang Hunyo 2008, naghinguyang ako sang madamo nga tion sa pagtudlo sa iban parte sa Biblia, kag mas malipayon kag kontento na ako. Ginapasalamatan ko gid si Jehova nga nasapwan ko ang matuod nga katuyuan sang kabuhi.

• NATAWO: 1973

• PUNGSOD: AUSTRIA

• KABUHI SANG UNA: SUGAROL

ANG AKON NAGLIGAD:

Nagdaku ako sa gamay nga banwa sang Braunau, Austria. Manggaranon ini nga lugar kag malaka lang ang krimen. Nagdaku ako sa pamilya nga Katoliko.

May isa ka hitabo sang bata pa ako nga may daku gid nga epekto sa akon. Sang 1984, sang mga 11 anyos pa lang ako, nadumduman ko nga nagahampang kami sang football sang akon amigo.  Sina man nga hapon, napatay sia sa aksidente sa salakyan. Nasubuan gid ako sang napatay ang akon amigo. Tinuig na ang nagligad, pero nagapalibog gihapon ako kon ano ang matabo kon mapatay kita.

Pagkagradweyt ko, nag-obra ako bilang elektrisyan. Bisan pa pirme ako nagasugal kag daku nga kantidad ang ginataya ko, wala ako sing problema sa kuarta. Masako man ako sa sports kag nanamian ako sa musika nga heavy metal kag punk rock. Pirme ako nagakadto sa diskohan kag mga party. Imoral ang akon kabuhi kag pirme ako nagalingawlingaw pero indi ako malipayon.

KON PAANO GINBAG-O SANG BIBLIA ANG AKON KABUHI:

Sang 1995, may isa ka tigulang nga Saksi nga nagduaw sa akon kag gintanyagan niya ako sang libro nga nagapaathag sang sabat sang Biblia sa pamangkot nga, Ano ang matabo kon mapatay kita? Indi ko gihapon mahangpan ang masakit nga pagkapatay sang akon amigo, gani ginbaton ko ang libro. Indi lamang ang kapitulo parte sa kamatayon ang ginbasa ko kundi ang bilog gid nga libro!

Nasabat sang akon ginbasa ang mga pamangkot ko parte sa kamatayon. Pero indi lang amo sini ang natun-an ko. Bangod ginpadaku ako nga Katoliko, si Jesus lang ang akon ginatuuhan. Apang, sang matun-an ko sing dugang pa ang Biblia, nakabulig ini sa akon nga mangin suod ko nga abyan ang Amay ni Jesus nga si Jehova nga Dios. Nalipay gid ako sang matun-an ko nga si Jehova nagaulikid sa aton kag luyag niya nga makilala naton sia. (Mateo 7:7-11) Natun-an ko man nga may balatyagon si Jehova kag pirme niya ginatuman ang iya ginahambal. Bangod sini, nagdugang pa ang akon interes nga tun-an ang mga tagna sa Biblia kag kon paano ini natuman. Napalig-on gid sini ang akon pagtuo sa Dios.

Wala magdugay, narealisar ko nga ang mga Saksi ni Jehova amo gid lang ang interesado sa pagbulig sa mga tawo nga mahangpan ang Biblia. Ginabasa ko sa akon Katoliko nga Biblia ang mga teksto nga ginasambit sa mga publikasyon sang mga Saksi. Sa dugang ko nga pagpangusisa, nakumbinsi ako nga nakita ko na ang kamatuoran.

Sa akon pagtuon sa Biblia, natun-an ko nga dapat ko tumanon ang mga talaksan ni Jehova. Suno sa nabasa ko sa Efeso 4:22-24, nahangpan ko nga dapat ko biyaan ang akon “daan nga personalidad,” nga resulta sang akon “paggawi anay” kag “magsuklob [ako] sang bag-o nga personalidad nga gintuga suno sa kabubut-on sang Dios.” Gani ginbiyaan ko ang akon imoral nga pagkabuhi. Narealisar ko nga dapat ko man untatan ang pagsugal, kay ginahimo ako sini nga mangin materyalistiko kag makagod. (1 Corinto 6:9, 10) Nakahibalo ako nga para magbag-o ako, dapat ko untatan ang pagpakig-upod sa mga abyan ko sadto kag mangita sang bag-o nga mga kaupdanan nga may pareho nga prinsipio sa akon.

Indi ini mahapos. Pero nagtambong na ako sa mga pagtilipon sang mga Saksi sa Kingdom Hall kag nakig-abyan sa ila. Padayon man ako nga nagtuon sing personal. Bangod sini, ginbag-o ko ang akon nanamian nga musika, tulumuron sa kabuhi, kag gintadlong ang akon hitsura. Sang 1995, nabawtismuhan ako bilang Saksi ni Jehova.

MGA BENEPISYO:

Balanse na subong ang akon pagtamod sa kuarta kag manggad. Maakigon  ako anay, pero subong kalmado na ako. Indi na man sobra ang akon pagkabalaka sa palaabuton.

Nalipay gid ako nga mangin bahin sang grupo sang mga tawo nga nagaalagad kay Jehova sa bilog nga kalibutan. Diri ko nakita ang mga tawo nga matutom gihapon sa Dios bisan nagaatubang sang mga problema. Nalipay gid ako kay ginagamit ko subong ang akon tion kag kusog, indi para paayawan ang akon handum, kundi para simbahon si Jehova kag maghimo sing maayo.

• NATAWO: 1963

• PUNGSOD: ENGLAND

• KABUHI SANG UNA: NALUGAW-AN SA KABUHI

ANG AKON NAGLIGAD:

Natawo ako sa England, pero nagsaylo ang amon pamilya sa Australia sang siete anyos ako. Nag-istar kami sa Gold Coast, isa ka lugar nga ginakadtuan sang mga turista sa Queensland, Australia. Bisan pa indi kami manggaranon, wala man kami nagakawad-an sang amon mga kinahanglanon.

Bisan masulhay ang amon pangabuhi, indi ako malipayon. Nalugaw-an ako sa akon kabuhi. Palahubog si Tatay kag pirme niya ginasakit si Nanay. Wala gid ako nakabatyag sang iya pagpalangga. Sang ulihi ko na lang naintiendihan kon ngaa amo sina ang iya batasan, tungod gali sang iya mga inagihan bilang soldado sa Malaya.

Nagsugod ako sa pagpahubog sang hayskul ako. Sang 16 anyos ako, nag-untat ako sa pag-eskwela kag nagsulod sa navy. Nagdroga ako kag naadik sa sigarilyo. Nagalalain man ako kon indi ako makainom. Sang primero, kada Sabado kag Domingo lang ako nagainom, pero sang ulihi kada adlaw na.

Sang mga 20 anyos na ako, nagpalibog ako kon nagaluntad gid man bala ang Dios. ‘Kon may Dios gid man,’ pamangkot ko, ‘ngaa ginatugutan niya nga mag-antos ang mga tawo kag mapatay?’ Nagsulat pa gani ako sang binalaybay nga nagabasol sa Dios sang tanan nga kalautan sa kalibutan.

Naghalin ako sa navy sang 23 anyos ako. Dayon, nagsulod ako sa lainlain nga obra kag nagbiyahe pa gani sa luwas sang pungsod sa sulod sang isa ka tuig. Pero indi gihapon ako malipayon. Daw wala sing direksion ang akon kabuhi. Daw wala sing pulos ang pag-angkon sang balay, permanente nga trabaho kag mataas nga posisyon. Ang “makapaumpaw” lang sa akon amo ang alkohol kag musika.

Madumduman ko pa ang tion nga gusto ko gid mahibaluan kon ano ang katuyuan sang kabuhi. Sa Poland ako sadto nga nagabisita sa bantog nga kampo konsentrasyon sa Auschwitz. Nabasa ko ang parte sa kapintas nga natabo didto. Pero sang didto na ako mismo kag nakita ang tuman ka daku nga kampo, naglalain gid ako. Indi ko mahangpan kon ngaa ginapintasan sang tawo ang iya isigkatawo. Madumduman ko pa nga nagahilibion ako  samtang nagalibot sa kampo nga nagapamangkot, ‘Ngaa?’

KON PAANO GINBAG-O SANG BIBLIA ANG AKON KABUHI:

Sang 1993, pagpauli ko halin sa luwas sang pungsod, nagbasa ako sang Biblia para pangitaon ang sabat. Wala madugay, duha ka Saksi ni Jehova ang nagbisita sa akon kag gin-agda ako nga magtambong sa kombension nga pagahiwaton sa malapit nga istadyum. Nagtambong ako.

Pila ka bulan antes sini, ara man ako sa sina nga istadyum nga nagalantaw sang hampang, pero tuhay gid ini nga kombension. Ang mga Saksi matinahuron kag mahipid mamayo, kag mabuot ang ila mga kabataan. Nagdayaw gid ako sa akon nakita sang tigpalanyaga. Ginatos ka Saksi ang nagpanyaga sa halampangan sang istadyum, pero sang nagbalik na sila sa ila pulungkuan, wala gid ako sang nakita nga nabilin nga basura! Labaw sa tanan, daw kontento sila kag malipayon—ang butang nga gusto ko gid mabatyagan. Wala gid ako sang madumduman nga pamulongpulong sina nga adlaw, pero indi ko gid malimtan ang paggawi sang mga Saksi.

Sina nga gab-i, nadumduman ko ang akon pakaisa nga nagabasa sang Biblia kag nagatuon parte sa lainlain nga relihion. Ginsugiran niya ako sadto nga nagsiling si Jesus nga makilala mo ang matuod nga relihion paagi sa mga bunga sini. (Mateo 7:15-20) Napensaran ko nga dapat ko usisaon kon ngaa lain gid ang mga Saksi. Sa una nga tion sa akon kabuhi, nakabatyag ako sing paglaum.

Pagkasunod nga semana, ginbalikan ako sang duha ka Saksi nga nag-agda sa akon sa kombension. Gintanyagan nila ako sang pagtuon sa Biblia, kag nagpasugot ako. Nagtambong na man ako sa ila Cristiano nga mga pagtilipon.

Samtang nagatuon ako sa Biblia, nagbag-o ang akon pagtamod sa Dios. Natun-an ko nga indi sia ang ginhalinan sang kalautan kag pag-antos kay sia mismo nasakitan kon maghimo sing malain ang mga tawo. (Genesis 6:6; Salmo 78:40, 41) Gintinguhaan ko gid nga indi masakitan ang balatyagon ni Jehova. Gusto ko nga mapahalipay sia. (Hulubaton 27:11) Gin-untatan ko ang pagpahubog kag pagpanigarilyo, kag amo man ang imoralidad. Sang Marso 1994, nabawtismuhan ako bilang Saksi ni Jehova.

MGA BENEPISYO:

Kontento na ako kag malipayon. Wala na ako nagapahubog para malimtan ang akon mga problema. Sa baylo, natun-an ko nga itugyan ini kay Jehova.—Salmo 55:22.

Napulo na ka tuig nga nakasal ako sa isa ka matahom nga Saksi nga si Karen, kag may guapa ako nga manak nga si Nella. Nalipay kami nga tatlo nga gamiton ang amon madamo nga tion sa pagwali kag sa pagbulig sa iban nga matun-an ang kamatuoran parte sa Dios. May katuyuan na gid man ang akon kabuhi.