Sibu nga Siensia

“Wala bala ako magsulat sa imo sang maayong mga butang sang mga laygay kag ihibalo, sa pagpakilala sa imo sang kalig-onan sang mga polong sang kamatooran, agud nga makapabalik ka sing mga polong sang kamatooran?”—HULUBATON 22:20, 21.

ANO ANG KINALAIN SANG BIBLIA? Ang mga libro sadto pirme nagasambit sang indi masaligan kag delikado nga mga ideya nga napamatud-an nga indi matuod sang moderno nga siensia. Bisan subong, dapat bag-uhon sang mga awtor ang mga libro para ipasibu ini sa bag-o nga mga nadiskobrehan. Pero ang Biblia nagapangangkon nga ang awtor sini amo ang Manunuga kag nga ang iya Pulong “nagapabilin sing dayon.”—1 Pedro 1:25.

HALIMBAWA: Ang kasuguan nga ginhatag sang Dios kay Moises nagsugo sa mga Israelinhon nga ilubong ang ila mga tai “sa guwa sang kampo.” (Deuteronomio 23:12, 13, APD) Kon makatandog sila sang patay nga sapat ukon tawo, dapat manghugas sila. (Levitico 11:27, 28; Numeros 19:14-16) Ang mga aruon sadto ginakuarentina asta nga makompirmar nga indi na sila makapanglaton.—Levitico 13:1-8.

ANG GINAPAKITA SANG MODERNO NGA MEDISINA: Ang nagakaigo nga paglubong sang tai, pagpanghinaw, kag pagkuarentina epektibo gihapon nga paagi sa paglikaw sa mga balatian. Kon wala sing kasilyas, ang U.S. Centers for Disease Control and Prevention (CDC) nagarekomendar: “Kon mamus-on, dapat masobra 30 metros ang kalayuon sa ginakuhaan sang tubig kag dayon ilubong ini.” Kon ginalubong sing maayo sang mga pumuluyo ang ila tai, maganubo sang 36 porsiento ang kaso sang lupot, siling sang World Health Organization. Mga 200 ka tuig ang nagligad, nadiskobrehan sang mga doktor nga napaliton nila ang mga balatian sa madamo nga pasyente kay wala sila nagapanghinaw pagkatapos mag-uyat sang mga bangkay. Ang CDC nagakabig gihapon sa pagpanghinaw nga amo “lamang ang pinakaepektibo nga paagi nga malikawan ang paglaton sang balatian.” Kamusta naman ang pagkuarentina sang mga aruon kag sang iban pa nga balatianon? Sining karon lang, ang Saudi Medical Journal nagsiling: “Kon bag-o pa lang ang epidemia, ang pagpain kag pagkuarentina mahimo amo lamang ang pinakaepektibo nga pagkontrol sang makalalaton nga mga balatian.”

ANO SA BANTA MO? May iban pa bala nga sagrado nga libro nga sibu sa moderno nga siensia? Ukon pinasahi gid ang Biblia?

[Blurb sa pahina 6]

“Makadalayaw gid ang detalyado nga mga instruksion parte sa katinlo sang panahon ni Moises.”—MANUAL OF TROPICAL MEDICINE, NANDAY DR. ALDO CASTELLANI KAG DR. ALBERT J. CHALMERS