Pamangkuton Naton si Jesus

Madamo nga relihioso nga tawo ang nagapati nga dapat magpasilabot ang relihion sa pulitika. Nagapati sila nga daku ang papel sang relihion sa pagsolbar sang mga problema sang mga tawo. Pero ang iban naman nagapati nga indi dapat magpasilabot ang relihion sa pulitika. Kon ikaw ang pamangkuton, ano ang papel sang relihion sa pulitika? Dapat bala sila magbuligay?

SI Jesucristo ginlaragway subong “ang pinakaimpluwensiado nga tawo sa kasaysayan sang relihion.” Ano abi kon pamangkuton naton sia, Dapat bala magpasilabot ang relihion sa pulitika? Ano ayhan ang iya sabat? Sang diri sia sa duta, ginsabat niya ini paagi sa iya mga pulong kag buhat. Halimbawa, sa iya bantog nga Sermon sa Bukid, naghatag si Jesus sang mga prinsipio nga makabulig sa iya mga sumulunod nga maintiendihan ang ila papel sa komunidad. Binagbinagon naton ang pila ka punto sa sina nga sermon.

 May Impluwensia sa Iban

Ginlaragway ni Jesus kon paano dapat tamdon sang iya mga sumulunod ang kalibutan. Nagsiling sia: “Kamo ang asin sang duta; apang kon ang asin indi na maparat, paano mapasag-uli ang pagkaasin sini? Indi na ini magamit sa bisan ano nga butang kundi ipilak sa gua agod matapakan sang mga tawo. Kamo ang kapawa sang kalibutan. . . . Paiwaga ang inyo kapawa sa atubangan sang mga tawo, agod makita nila ang inyo maayong mga buhat kag maghimaya sa inyo Amay nga yara sa langit.” (Mateo 5:13-16) Ngaa ginpaanggid ni Jesus ang iya mga sumulunod sa asin kag kapawa?

Ginapahangop niya nga ang iya mga sumulunod kaangay sang asin kag kapawa, indi lamang para sa pila ka tawo, kundi para sa tanan. Paagi sa paggamit sini nga pagpaanggid, ginpakita ni Jesus nga indi niya luyag nga magpain ang iya mga sumulunod sa komunidad. Ngaa?

Talupangda ini: Indi makapreserbar ang asin kon indi ini pag-isamo sa pagkaon. Indi mapasanag sang suga ang kwarto kon indi ini pag-ibutang sa sulod. Gani wala ginsugo ni Jesus ang iya mga sumulunod nga magkadto sa naligwin nga lugar kag magtukod sang ila komunidad didto. Wala man niya ginsilingan ang iya mga sumulunod nga indi magsimpon sa mga tawo nga tuhay sing relihion. Sa baylo, pareho sang asin nga nagapreserbar kag kapawa nga nagapasanag, ang mga Cristiano dapat may impluwensia sa kabuhi sang iban.

“Indi Sila Bahin sang Kalibutan”

Pero, ang sugo ni Jesus sa iya mga sumulunod nga magpakig-angot sa iban nagpautwas sang importante nga pamangkot kon paano dapat tamdon sang mga Cristiano ang pulitika. Ngaa? Antes sia mapatay, nangamuyo si Jesus para sa iya mga sumulunod: “Nagapangabay ako sa imo nga indi mo sila pagkuhaon gikan sa kalibutan, kundi bantayan mo sila bangod sa isa nga malauton. Indi sila bahin sang kalibutan, subong nga ako indi bahin sang kalibutan.” (Juan 17:15, 16) Gani, paano ang mga Cristiano mangin indi bahin sang kalibutan samtang nagapakigbahin sa ila komunidad? Agod masabat ini, binagbinagon naton ang tatlo pa ka pamangkot:

• Ano ang pagtamod ni Jesus sa pulitika?

• Ano ang dapat himuon sang mga Cristiano subong?

• Paano ang Cristianong panudlo makaapektar sa komunidad?

[Blurb sa pahina 4]

Ginpakita ni Jesus nga indi niya luyag nga magpain ang iya mga sumulunod sa komunidad