“Indi Sila Bahin sang Kalibutan”

“Ang kalibutan nagdumot sa ila, bangod indi sila bahin sang kalibutan.”—JUAN 17:14.

Ano ang Buot Silingon Sini? Si Jesus indi bahin sang kalibutan kay wala sia nag-entra sa pulitika kag sa kinagamo sang mga tawo sang iya panahon. “Kon ang akon ginharian bahin sini nga kalibutan,” paathag niya, “ang akon mga alagad nakig-away kuntani agod indi ako matugyan sa mga Judiyo. Apang, ang matuod, ang akon ginharian indi gikan sa sini.” (Juan 18:36) Ginsilingan man niya ang iya mga sumulunod nga likawan ang mga paggawi, hambal, kag buhat nga ginadumilian sang Pulong sang Dios.—Mateo 20:25-27.

Paano Ini Ginpakita sang mga Cristiano sang Una? Suno sa manunulat nga si Jonathan Dymond, ang mga Cristiano sang una “wala nag-entra [sa inaway]; bisan pa pakahuy-an sila, prisuhon, ukon patyon.” Mas pilion pa nila nga mag-antos sangsa mag-entra sa inaway. Lain man sila sa iban bangod sa ila paggawi. Ang mga Cristiano ginsilingan: “Bangod wala kamo nagapadayon sa pagdalagan upod sa ila sa sini nga dalanon padulong sa amo man nga lamawan sang pagpatuyang, nagakatingala sila kag padayon nga nagapakalain sa inyo.” (1 Pedro 4:4) Ang historian nga si Will Durant nagsulat nga “ginapakonsiensia [sang mga Cristiano] ang mahuyugon sa kinalipay nga mga pagano bangod sa ila pagkadiosnon kag pagkadesente.”

Sin-o ang Nagapakita Sini Subong? Suno sa New Catholic Encyclopedia, “supak gid sa moral kon [ang isa ka Cristiano] maglikaw sa paggamit sing armas bangod sa iya konsiensia.” Ginsambit man sang artikulo sa Reformierte Presse ang report sang African Rights nga organisasyon nga sang may pinatyanay sa rasa sa Rwanda sang 1994, nag-entra ang tanan nga relihion, “luwas lang sa mga Saksi ni Jehova.”

Parte sa Nazi Holocaust, ang isa ka maestro sa hayskul nagsiling nga “wala sing grupo ukon organisasyon sang ordinaryo nga mga pumuluyo ang nagreklamo batok sa lapnag nga kabutigan kag pagpamintas.” Sa tapos sia makapangusisa sa United States Holocaust Memorial Museum, nagsulat sia: “Nahibaluan ko na ang matuod.” Nahibaluan niya nga gintindugan sang mga Saksi ni Jehova ang ila pagtuluuhan bisan pa ginpintasan sila.

Kamusta naman ang ila moralidad? “Ang kalabanan nga Katoliko nga mga pamatan-on subong wala nagaugyon sa mga panudlo sang simbahan parte sa mga isyu subong sang pag-live-in [kag] pag-sex nga wala pa nakasal,” siling sang U.S. Catholic nga magasin. Ginsambit sini ang isa ka opisyal sang simbahan, nga nagsiling: “Sa banta ko, sobra 50 porsiento ang naga-live-in antes magpakasal.” Pero ang The New Encyclopædia Britannica nagsiling nga ang mga Saksi ni Jehova “nagasunod gid sa mataas nga mga prinsipio sa moral sa ila pagkabuhi.”