Makita sa sini nga artikulo ang mga pamangkot nga mahimo ginapaligban mo kag kon diin sa Biblia mabasa ang mga sabat. Nalipay gid ang mga Saksi ni Jehova nga buligan ka sa pagbinagbinag sini.

1. Ngaa gin-organisar sang Dios ang mga Israelinhon?

Gin-organisar sang Dios ang mga kaliwat sang patriarka nga si Abraham nga mangin isa ka pungsod kag ginhatagan sila sang kasuguan. Ini nga pungsod gintawag niya nga Israel kag ginhatag sa ila ang responsibilidad nga proteksionan ang matuod nga pagsimba kag ang Balaan nga Kasulatan. (Salmo 147:19, 20) Paagi sini, pakamaayuhon ang tanan nga pungsod.—Basaha ang Genesis 22:18.

Ginpili sang Dios ang mga Israelinhon nga mangin iya mga saksi. Makabenepisyo sila sa kasuguan sang Dios kon matinumanon sila. (Deuteronomio 4:6) Kon tun-an naton ang kasaysayan sang mga Israelinhon, makilala pa gid naton ang matuod nga Dios.—Basaha ang Isaias 43:10, 12.

2. Ngaa gin-organisar ang matuod nga mga Cristiano?

Sang ulihi, nadula sang Israel ang pabor ni Jehova, kag gin-islan niya ini sang Cristianong kongregasyon. (Mateo 21:43; 23:37, 38) Sadto, mga Israelinhon ang iya mga saksi. Subong, ang matuod nga mga Cristiano amo na ang mga saksi ni Jehova.—Basaha ang Binuhatan 15:14, 17.

Gin-organisar ni Jesus ang iya mga sumulunod nga magtudlo parte kay Jehova kag maghimo sang mga disipulo sa tanan nga pungsod. (Mateo 10:7, 11; 24:14; 28:19, 20) Ini nga hilikuton malapit na matapos. Minilyon na halin sa tanan nga pungsod ang gintipon ni Jehova para sa matuod nga pagsimba. (Bugna 7:9, 10) Gin-organisar man ang matuod nga mga Cristiano para pabakuron kag buligan ang isa kag isa. Sa bilog nga kalibutan, palareho nga mga programa sa Biblia ang ila ginatun-an sa ila pagtilipon.—Basaha ang Hebreo 10:24, 25.

 3. Paano nagsugod ang mga Saksi ni Jehova sa aton panahon?

Ang organisasyon sang mga Saksi ni Jehova subong nagsugod sang dekada 1870. Gintun-an liwat sang gamay nga grupo sang mga estudyante sang Biblia ang nalimtan na nga mga kamatuoran sa Biblia. Nahibaluan nila nga gin-organisar ni Jesus ang Cristianong kongregasyon para magwali. Gani ginsugdan nila ang pagwali sang Ginharian sa bilog nga kalibutan. Sang 1931, gingamit nila ang ngalan nga mga Saksi ni Jehova.—Basaha ang Binuhatan 1:8; 2:1, 4; 5:42.

4. Paano ginaorganisar ang mga Saksi ni Jehova subong?

Sang unang siglo, ang Cristianong mga kongregasyon sa madamo nga lugar nakabenepisyo sa nagadumala nga hubon nga nagakilala kay Jesus bilang Ulo sang kongregasyon. (Binuhatan 16:4, 5) Ginakilala man sang mga Saksi ni Jehova subong si Jesus bilang ila Lider. (Mateo 23:9, 10) Nakabenepisyo man sila sa paggiya sang Nagadumala nga Hubon sang eksperiensiado nga mga lalaki nga nagapabakod kag nagahatag sing instruksion sa sobra 100,000 ka kongregasyon. Sa kada kongregasyon, may kalipikado nga mga lalaki nga manugdumala, ukon manugtatap. Ginaatipan nila sing mahigugmaon ang katawhan sang Dios.—Basaha ang 1 Pedro 5:2, 3.

Ang mga Saksi ni Jehova gin-organisar para magwali sang maayong balita kag maghimo sang mga disipulo. Para mabuligan ang tanan nga tawo, naga-translate sila, nagaimprinta, kag nagapanagtag sang mga publikasyon parte sa Biblia sa sobra 500 ka lenguahe. Pareho sa mga apostoles, nagawali man sila sa mga balay. (Binuhatan 20:20) Nagatanyag sila sang pagtuon sa Biblia sa mga interesado sa kamatuoran. Bangod prioridad sang katawhan ni Jehova nga pahamut-an ang Dios kag buligan ang iban, malipayon sila bilang isa ka organisasyon.—Basaha ang Salmo 33:12; Binuhatan 20:35.

Para sa dugang nga impormasyon, basaha ang kapitulo 19 sini nga libro, Ano Gid ang Ginatudlo Sang Biblia? nga ginhimo sang mga Saksi ni Jehova.