Abraham—Tawo nga Mapainubuson

Si Abraham nagapasilong sa iya tolda bangod sa makapalaso nga init sang adlaw. Samtang nagatulok sia sa malayo, nakita niya ang tatlo ka lalaki nga nagabisita sa ila lugar. * Dalidali niya sila nga ginsugata, gin-abiabi, kag ginsilingan nga magpahuway sing makadali. Ginhatagan niya sila sing “isa ka hungit nga tinapay,” kag ginhandaan sing manamit nga pagkaon pareho sang bag-ong luto nga tinapay, mantikilya, gatas, kag mahumok nga karne. Ang ginhimo ni Abraham nagapakita nga indi lamang sia maabiabihon kundi mapainubuson man.—Genesis 18:1-8.

ANO ANG PAGKAMAPAINUBUSON? Ang pagkamapainubuson kabaliskaran sang pagkabugalon kag pagkamatinaastaason. Ginabaton sang tawo nga mapainubuson nga ang iban mas labaw sa iya. (Filipos 2:3) Ginapamatian niya ang ila suhestyon, kag handa sia maghimo sing kubos nga mga buluhaton para sa ila.

PAANO SI ABRAHAM NAGPAKITA SING PAGKAMAPAINUBUSON? Nalipay si Abraham nga magserbisyo sa iban. Subong sang ginsambit sa umpisa, sang nakita ni Abraham ang tatlo ka bisita, naghulag sia dayon para mahatag ang ila kinahanglanon. Ang iya asawa nga si Sara naghanda dayon sing pagkaon. Pero ang nangabudlay gid amo si Abraham. Nagdalidali sia sa pagsugata sa mga bisita, nagtanyag sia sa ila sing makaon, nagdalagan sia sa iya mga baka kag nagpili sing ilihawon, kag sia ang nagserbe sang pagkaon sa mga bisita. Sa baylo nga ipaobra ini sa iya mga alagad, ginhimo sining mapainubuson nga tawo ining kubos nga buluhaton. Wala sia nagpensar nga nagapakanubo sa iya ang pagserbisyo sa iban.

Ginpamatian ni Abraham ang suhestyon sang iban. Pila lamang ka pag-istoryahanay  nanday Abraham kag Sara ang narekord sa Biblia. Pero duha ka beses nga mabasa naton nga ginpamatian ni Abraham ang suhestyon ni Sara kag ginhimo ini. (Genesis 16:2; 21:8-14) Isa ka bes, ‘nasubuan’ gid si Abraham sa suhestyon ni Sara. Pero sang gin-istorya sia ni Jehova, narealisar ni Abraham nga maayo ang ideya ni Sara kag mapainubuson nga ginsunod niya ini.

ANO ANG MATUN-AN NATON? Kon mapainubuson kita, nalipay kita sa pagserbisyo sa iban. Nalipay man kita sa paghimo sang aton masarangan para sa ila kaayuhan.

Mapakita man naton ang pagkamapainubuson kon ginapamatian naton ang suhestyon sang iban. Kon kaisa, mas maayo nga batunon naton ang ila ideya bisan pa lain ini sangsa aton ginahunahuna. (Hulubaton 15:22) Ini nga kinaiya makabulig gid sa mga tawo nga may awtoridad. “Natun-an ko nga ang maayo nga amo dapat mahapos palapitan sang mga tawo,” siling sang madugay na nga superbisor nga si John. Nagsiling pa sia: “Ang pagpaubos kinahanglan kay mahimo nga mas maayo ang ideya sang imo mga tinawo sangsa imo. Kay man, wala sing tawo nga may maayo pirme nga ideya, bisan boss pa sia.”

Kon ginailog naton si Abraham paagi sa pagpamati sa suhestyon sang iban kag pagserbisyo sa ila, malipay sa aton si Jehova. Kay man, “ginapamatukan sang Dios ang mga matinaastaason, apang nagahatag sia sang wala tupong nga kaayo sa mga mapainubuson.”—1 Pedro 5:5.

[Nota]