Madula Na ang mga Kalamidad!

ANO ang reaksion mo kon may magsiling sa imo nga malapit na madula ang mga kalamidad? Mahimo masabat ka, “Basi nagadamgo ka lang. Parte na sang kabuhi ang mga kalamidad.” Ukon basi mamensar ka nga nagalahog lang sia.

Bisan pa parte na sang kabuhi ang mga kalamidad, may basihan nga madula ini sa ulihi. Pero indi paagi sa pagtinguha sang tawo. Limitado lang ang nahibaluan sang mga tawo parte sa palibot, gani diutay lang ang ila mahimo para makontrol ini ukon mapabag-o. Ang maalam kag mausisaon nga si Hari Solomon sa Israel sang una, nagsulat: “Ang tawo indi makatungkad sang buluhaton nga ginahimo sa idalum sang adlaw. Bisan daw ano gid nga pagpangabudlay sang tawo sa pagpangita sini, indi gid sia makakita sini; bisan ang maalam nga tawo nagahunahuna sa paghibalo sini, indi gid sia sarang makakita sini.”—Manugwali 8:17.

Kon indi makontrol sang mga tawo ang mga kalamidad, sin-o ang makakontrol sini? Ginapakita sang Biblia nga ang Manunuga lamang. Sia ang nagplastar sang mga sistema sa palibot, pareho sang siklo sang tubig. (Manugwali 1:7) Kag indi pareho sa tawo, wala sing limitasyon ang gahom sang Dios. Mapamatud-an ini sa ginsiling ni propeta Jeremias: “O GINOONG Dios! Gintuga mo ang langit kag ang duta sa imo daku nga gahom kag kusog. Wala sing mabudlay nga butang para sa imo.” (Jeremias 32:17, Maayong Balita nga Biblia, HPV) Siempre, bangod gintuga sang Dios ang duta kag ang tanan nga elemento sini, nahibaluan niya kon paano ini kontrolon para ang mga tawo magkabuhi diri sing malinong kag malipayon.—Salmo 37:11; 115:16.

Paano ini himuon sang Dios? Ginbinagbinag sa ikaduha nga artikulo nga ang makahaladlok nga mga butang nga nagakatabo subong bahin sang “tanda” sang “katapusan sang sistema sang mga butang.” Si Jesus nagsiling: “Kon makita ninyo nga nagakahanabo ini nga mga butang, mahibaluan ninyo nga ang ginharian sang Dios malapit na.” (Mateo 24:3; Lucas 21:31) Ang Ginharian sang Dios, nga gobierno sang Dios sa langit, magahimo sing daku nga pagbag-o sa duta kag magakontrol sa natural nga mga elemento sini. Bisan pa may gahom si Jehova nga Dios sa paghimo sini, gintugyan niya ini nga buluhaton sa iya Anak. Parte sa sini nga Anak, si propeta Daniel nagsiling: “Ginhatagan sia sing pagbulut-an kag himaya kag ginharian, agud nga ang tanan  nga mga katawohan, mga pungsud, kag mga hambal mag-alagad sa iya.”—Daniel 7:14.

Si Jesucristo, nga Anak sang Dios, ginhatagan sing gahom nga bag-uhon ang duta para mangin makalilipay ini istaran. Sang nagligad nga 2,000 ka tuig, ginpakita ni Jesus diri sa duta nga masarangan niya kontrolon ang natural nga mga elemento. Isa ka bes, sang nagapanakayon sila sang iya mga disipulo sa Dagat sang Galilea, nag-abot ang “isa ka mabaskog nga unos, kag ang mga balod nagsalta sa sakayan, amo nga madali na lang magkapan ang sakayan.” Hinadlukan ang mga disipulo, gani nangayo sila sing bulig kay Jesus. Ano ang ginhimo ni Jesus? “Ginsaway [niya] ang hangin kag nagsiling sa dagat: ‘Hipos! Maglinong ka!’ Kag nagtunong ang hangin, kag naglinaw.” Natingala ang iya mga disipulo kag nagsiling: “Sin-o gid ini, bangod bisan ang hangin kag dagat nagatuman sa iya?”—Marcos 4:37-41.

Sang nagbalik si Jesus sa langit, ginhatagan sia sing daku nga gahom kag awtoridad. Bilang Hari sa Ginharian sang Dios, may responsibilidad sia kag ikasarang sa paghimo sang mga pagbag-o para mangin malinong kag makalilipay ang pagkabuhi sang mga tawo sa duta.

Pero subong sang makita naton, ang madamo nga problema kag mga kalamidad ginhimo kag ginpalala sang sakon nga mga tawo. Ano ang himuon sang Ginharian sa sini nga mga tawo kag sa mga indi gusto magbag-o? Ang Biblia nagasiling nga si Ginuong Jesus magaabot “gikan sa langit upod sa iya gamhanan nga mga anghel sa nagadabdab nga kalayo, samtang ginatimalusan niya ang mga wala nagakilala sa Dios kag ang mga wala nagatuman sa maayong balita tuhoy sa aton Ginuong Jesus.” Ginapakita sini nga ‘laglagon ni Jesus ang mga nagalaglag sang duta.’—2 Tesalonica 1:7, 8; Bugna 11:18.

Pagkatapos sini, kontrolon ni Jesucristo, nga “Hari sang mga hari,” ang tanan nga elemento sang duta. (Bugna 19:16) Siguraduhon niya nga indi na mag-antos sa mga kalamidad ang mga sakop sang Ginharian. Paagi sa iya gahom, kay-uhon niya ang klima sang duta para sa kaayuhan sang mga tawo. Matuman na ang ginpromisa ni Jehova nga Dios sa iya katawhan: “Ihatag ko ang inyo mga ulan sa ila panagon, kag ang duta magapatubas, kag ang mga kahoy sang latagon magapatubas sang ila bunga.” (Levitico 26:4) Ang mga tawo indi na mahadlok nga maguba sang mga kalamidad ang ila mga balay: “Magapatindug sila sing mga balay kag puy-an sila; magatanum sila sing mga ulubasan kag magakaon sang bunga nila.”—Isaias 65:21.

Ano ang Dapat Mo Himuon?

Pat-od nga nalipay ka man nga magkabuhi sa kalibutan nga wala na sang mga kalamidad. Pero, ano ang dapat mo himuon para maeksperiensiahan ini? Bangod “ang mga wala nagakilala sa Dios kag ang mga wala nagatuman sa maayong balita” indi makaistar sa kalibutan nga wala na sang kalamidad, dapat magtuon ang isa parte sa Dios kag suportahan ang iya kahimusan sang paggahom sa duta. Ginapatuman sang Dios nga kilalahon naton sia kag sundon ang maayong balita sang Ginharian nga gintukod niya paagi sa iya Anak.

Para mahimo ini, importante nga tun-an sing maayo ang Biblia, kay nagatudlo ini sang dapat himuon para makaistar sa kalibutan nga luwas sa katalagman sa idalom sang paggahom sang Ginharian. Pangabaya ang mga Saksi ni Jehova nga buligan ka nga matun-an ang ginatudlo sang Biblia. Nalipay gid sila nga buligan ka. Makasalig ka nga kon kilalahon mo ang Dios kag tumanon ang maayong balita, maeksperiensiahan mo ang ginasiling sang Hulubaton 1:33 (Ang Pulong sang Dios, APD): “Ang nagapamati sa akon magakabuhi nga luwas sa katalagman. Indi siya maano kag wala siya sing kahadlukan.”