Makita Mo “ang Ihibalo sang Dios”
Mangin Suod sa Dios
Makita Mo “ang Ihibalo sang Dios”
SI Jehova nga Dios nagabulig sa aton nga masapwan ang bilidhon katama nga manggad, kag gusto niya nga makita naton ini. Ini nga manggad indi makahatag sang materyal nga kabuganaan kundi sang mga butang nga indi mabakal sang kuarta—kalinong sa hunahuna, pagkakontento, kag kalipay. Ano ini nga manggad? Ginpaathag ini sang maalam nga hari nga si Solomon sa Hulubaton 2:1-6.
Suno kay Solomon, ini nga manggad amo “ang ihibalo sang Dios”—ang kamatuoran parte sa Dios kag sa iya mga katuyuan nga makita sa Biblia. (Bersikulo 5) May pila ka aspekto ini nga manggad.
Matuod nga mga panudlo. Ginasabat sang Biblia ini nga mga pamangkot: Ano ang ngalan sang Dios? (Salmo 83:18) Ano ang kahimtangan sang mga patay? (Salmo 146:3, 4) Ngaa ari kita diri? (Genesis 1:26-28; Salmo 115:16) Ang sabat sa sini indi gid matumbasan sang manggad!
Maalamon nga laygay. Ginasugid sang Biblia ang pinakamaayo nga paagi sang pagkabuhi. Halimbawa, paano magdugay ang inyo pag-asawahay? (Efeso 5:28, 29, 33) Paano mo mapadaku nga responsable ang imo kabataan? (Deuteronomio 6:5-7; Efeso 6:4) Paano ka mangin malipayon? (Mateo 5:3; Lucas 11:28) Bilidhon gid ang masaligan nga laygay sa sini nga mga butang!
Ihibalo parte sa Dios kag sa iya personalidad. Makita sa Biblia ang sibu nga impormasyon parte sa Dios. Ano sia nga sahi sang Dios? (Juan 1:18; 4:24) Nagaulikid bala sia sa aton? (1 Pedro 5:6, 7) Ano ang iya pila ka panguna nga kinaiya? (Exodo 34:6, 7; 1 Juan 4:8) Indi gid mabakal sang kuarta ang kamatuoran parte sa aton Manunuga!
“Ang ihibalo sang Dios” isa gid ka espirituwal nga manggad. Paano mo ini makita? Ang sabat ara sa bersikulo 4 sang Hulubaton kapitulo 2, diin ginpaanggid ni Solomon ini nga ihibalo sa “mga bahandi nga natago.” Hunahunaa: Ang natago nga manggad wala nagamatumato kadto sa aton. Kinahanglan nga mangabudlay kita para makita ini. Amo man sini ang ihibalo sang Dios. Ini nga manggad natago sa Biblia. Para makita ini, kinahanglan nga mangabudlay kita.
Ginpaathag ni Solomon ang dapat himuon para makita “ang ihibalo sang Dios.” Ang mga tinaga nga ‘batona ang akon mga polong’ kag ‘ipahamtang ang imo tagiposoon’ nagapakita nga dapat kita mangin mabinatunon. (Bersikulo 1, 2) Ang mga tinaga nga “magtuaw,” ‘mangita,’ kag “mag-usisa” nagapakita nga kita dapat ang mangabudlay. (Bersikulo 3, 4) Gani, para makita ang manggad, dapat mangin mapisan kita kag sinsero sa pagtuon sa Biblia.—Lucas 8:15.
Kon manikasog kita, buligan kita ni Jehova nga makita ini nga manggad. “Ang GINOO nagahatag sing kaalam,” siling sang bersikulo 6. Paagi lamang sa bulig sang Dios maintiendihan naton ang mga kamatuoran sa Biblia. (Juan 6:44; Binuhatan 16:14) Kon sinsero mo ini nga usisaon, makasalig ka nga makita mo “ang ihibalo sang Dios”—ang manggad nga makahatag sa imo sing wala katapusan nga mga pagpakamaayo.—Hulubaton 2:10-21. *
Bahin sang Biblia nga Mahimo Basahon sa Oktubre:
[Nota]
^ par. 8 Ang mga Saksi ni Jehova sa bilog nga kalibutan nagatanyag sing wala bayad nga pagtuon sa Biblia sa mga gusto magtuon sini. Mahimo mo kontakon ang mga Saksi sa inyo lugar ukon magsulat sa adres nga makita sa pahina 4.
