2 Ang Dios Wala Nagaulikid—Matuod Bala Ini?
2 Ang Dios Wala Nagaulikid—Matuod Bala Ini?
Ang mahimo nabatian mo: “Kon matuod nga nagaulikid ang Dios, tani gindula niya ang kalautan kag pag-antos sa kalibutan. Bisan pa nagakabalaka sia sa mga tawo, indi sia interesado sa akon.”
Ang ginatudlo sang Biblia: Indi si Jehova nga Dios ang ginhalinan sang kalautan. (Santiago 1:13) Bisan pa masarangan niya ini dulaon ano man nga oras, ginatugutan niya nga magluntad ang malaut nga katilingban para masolbar ang importante nga mga isyu nga nagsugod sa kasaysayan sang tawo. Magahulag sia para sa kaayuhan sang mga tawo kag dulaon ang tanan nga problema nga ginhimo sang mga nagasikway sa iya paggahom.—Genesis 3:1-6; Isaias 65:17. *
Ginapakita man sang Dios nga interesado gid sia sa kada isa sa aton. Mabasa sa Mateo 10:29-31 nga nahibaluan niya ang tanan parte sa aton, bisan ang wala naton nahibaluan: “Indi bala nga ginabaligya ang duha ka maya sa bili nga isa ka sensilyo nga diutay sing balor? Apang wala sing isa sa ila nga mahulog sa duta nga indi mahibaluan sang inyo Amay. Bisan ang mga buhok mismo sa inyo ulo naisip na tanan. Busa indi kamo magkahadlok: mas importante pa kamo sangsa madamo nga maya.”
Kon paano makabulig sa imo ang paghibalo sang kamatuoran: Masami nga ginalikawan naton ang mga tawo nga mapintas ukon wala sing pag-ulikid. Bangod sa kabutigan nga ang Dios wala nagaulikid, madamo ang nagalikaw nga kilalahon sia ukon nagapalapit lang sa iya kon wala na sila sing madangpan. Ang paghibalo nga si Jehova nga Dios nagaulikid magapahulag sa imo nga kilalahon sia kag mangin suod sa iya.
Halimbawa, mahimo nangamuyo ka sa Dios pero indi ka sigurado kon bala nagapamati sia ukon sabton ka niya. Ginapasalig kita sang Biblia nga ang “nagapamati sang pangamuyo” handa pirme mamati sa mga sinsero nga nagapalapit sa iya.—Salmo 65:2.
Nagsiling ang Dios nga ‘itugyan sa iya ang tanan mo nga kabalaka, bangod nagaulikid sia sa imo.’ (1 Pedro 5:7) Makasalig kita nga nagaulikid sia bisan may mga kabudlayan, kay ang iya Pulong nagasiling: “Malapit si Jehova sa mga nagaantos; kag ginaluwas niya ang mga napiutan.”—Salmo 34:18, NW.
[Nota]
^ par. 3 Para sa dugang nga impormasyon kon ngaa ginatugutan sang Dios ang pag-antos, basaha ang kapitulo 11 sang libro nga Ano Gid ang Ginatudlo Sang Biblia?
[Blurb sa pahina 5]
Kon wala nagaulikid ang Dios, ngaa nagsiling sia nga mangamuyo kita sa iya?
